Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Exodo 32:1-35

32  Kabayatanna nakita dagiti umili a ni Moises nakabaybayag a sumalog iti bantay.+ Gapuna dagiti umili naguummongda ken Aaron ket kinunada kenkuana: “Tumakderka, iyaramidannakami iti dios a mapanto nga umun-una kadakami,+ agsipud ta no maipapan itoy a Moises, ti lalaki a nangipanaw kadakami iti daga ti Egipto,+ pudno unay a saanmi nga ammo no ania ti napasamaken kenkuana.”  Gapu itoy kinuna kadakuada ni Aaron: “Alas-asenyo dagiti aritos a balitok+ nga adda kadagiti lapayag ti assawayo a babbai, annakyo a lallaki ken annakyo a babbai ket iyegyo ida kaniak.”  Ket amin dagiti umili rinugianda nga inalas-as dagiti aritos a balitok nga adda kadagiti lapayagda ket inyegda ida ken Aaron.  Idin innalana ti balitok iti im-imada, ket binukelna dayta+ babaen ti rimienta a pagkitikit ket inaramidna a sinukog nga estatua ti kigaw a baka.+ Ket rinugianda a kunaen: “Daytoy ti Diosmo, O Israel, a nangipanaw kenka iti daga ti Egipto.”+  Idi nakita daytoy ni Aaron, nangbangon iti altar iti sanguanan dayta. Kamaudiananna nagpukkaw ni Aaron ket kinunana: “Adda piesta ken Jehova inton bigat.”  Gapuna iti sumaganad nga aldaw nasapada a bimmangon, ket nangrugida a nagidaton kadagiti daton a mapuoran ken nagidiaya kadagiti sakripisio a pakikaykaysa. Kalpasan dayta nagtugaw dagiti umili tapno mangan ken uminumda. Kalpasanna timmakderda tapno agraragsakda.+  Ni Jehova kinunana ita ken Moises: “Mapanka, sumalogka, agsipud ta dagiti umilim nga impanawmo iti daga ti Egipto nagtignayda iti makadadael.+  Sidadaras a simiasida iti dalan nga imbilinko a papananda.+ Inyaramidanda ti bagbagida iti sinukog nga estatua ti kigaw a baka ket agrukruknoyda iti dayta ken agisaksakripisioda iti dayta ken kunkunada, ‘Daytoy ti Diosmo, O Israel, a nangipanaw kenka iti daga ti Egipto.’”+  Ket intultuloy ni Jehova a kunaen ken Moises: “Kinitak daytoy nga ili ket adtoy maysa nga ili a natangken ti panaglenglengngesna.+ 10  Gapuna ita bay-annak, tapno gumil-ayab ti ungetko maibusor kadakuada ket talipuposek ida,+ ket bay-annak a pagbalinenka a maysa a dakkel nasion.”+ 11  Ket pinalukneng ni Moises ti rupa ni Jehova a Diosna+ ket kinunana: “Apay, O Jehova, a gumil-ayab ti ungetmo+ maibusor iti ilim nga inruarmo manipud daga ti Egipto babaen ti dakkel a pannakabalin ken babaen ti napigsa nga ima? 12  Apay koma a kunaen dagiti Egipcio,+ ‘Buyogen ti dakes a panggep inruarna ida tapno papatayenna ida iti tengnga ti bambantay ken tapno talipuposenna ida iti rabaw ti daga’?+ Agbaw-ingka manipud sumsumged nga ungetmo+ ket pagladingitam+ ti dakes a maibusor iti ilim. 13  Lagipem da Abraham, Isaac ken Israel nga ad-adipenmo, isuda a nagsapataam a mismo,+ a kinunam kadakuada, ‘Paaduekto ti bin-iyo a kas kadagiti bituen ti langlangit,+ ket isuamin daytoy a daga nga intudingko itedkonto iti bin-iyo,+ tapno pudno a matagikuada dayta agingga iti tiempo a di nakedngan.’”+ 14  Ket nangrugi a pagladingitan ni Jehova ti dakes a sinaona nga aramidenna iti ilina.+ 15  Kalpasan dayta nagbaw-ing ni Moises ket simmalog iti bantay+ a siiiggem iti dua a tapi ti Pammaneknek,+ taptapi a nasuratan ti agsumbangirda. Nasuratanda iti daytoy a sikigan ken iti bangir. 16  Ket dagiti tapi gapuanan idi ti Dios, ket ti surat surat idi ti Dios a naikitikit iti rabaw dagiti tapi.+ 17  Ket nangrugi a mangngeg ni Josue ti arimbangaw dagiti umili gapu iti panagpupukkawda, ket kinunana ken Moises: “Adda arimbangaw ti bakal+ idiay pakarso.” 18  Ngem kinunana:“Saan nga uni dayta ti panagkanta gapu iti mannakabalin a gapuanan,+Ket saan nga uni dayta ti panagkanta iti pannakaabak;Uni ti sabali a panagkanta ti mangmangngegko.” 19  Gapuna naaramid nga apaman a nakaasideg iti pakarso ken makitana ti kigaw a baka+ ken dagiti sala, nangrugi a gumil-ayab ti unget ni Moises, ket madagdagus nga imbarsakna dagiti tapi manipud im-imana ket imburakna ida iti sakaanan ti bantay.+ 20  Kalpasanna innalana ti kigaw a baka nga inaramidda ket pinuoranna iti apuy ket rinumekna agingga a nagbalin a napino,+ a kalpasan dayta inwarisna iti rabaw ti dandanum+ ket pinainumna iti dayta ti annak ti Israel.+ 21  Kalpasan dayta ni Moises kinunana ken Aaron: “Ania ti inaramid kenka daytoy nga ili ta inyegam iti naindaklan a basol?” 22  Iti daytoy kinuna ni Aaron: “Saan koma a gumil-ayab ti unget ni apok. Sika pagaammom unay dagiti umili, nga agannayasda iti dakes.+ 23  Gapuna kinunada kaniak, ‘Iyaramidannakami iti dios a mapanto nga umun-una kadakami,+ agsipud ta no maipapan itoy a Moises, ti lalaki a nangipanaw kadakami iti daga ti Egipto, pudno unay a saanmi nga ammo no ania ti napasamaken kenkuana.’ 24  Ngarud kinunak kadakuada, ‘Siasino ti addaan iti aniaman a balitok? Masapul nga alas-asenda iti bagbagida tapno maitedda dayta kaniak.’ Ket impuruakko iti apuy ket rimmuar daytoy a kigaw a baka.” 25  Ket nakita ni Moises a dagiti umili saan a magawgawidanen, agsipud ta binay-an ida ni Aaron a saan a magawgawidanen+ a pakaibabainan kadagiti bumusbusor kadakuada.+ 26  Idin nagtakder ni Moises iti ruangan ti pakarso ket kinunana: “Siasino ti adda iti dasig ni Jehova? Umay kaniak!”+ Ket ti amin nga annak ni Levi nangrugida a naguurnong kenkuana. 27  Kinunana ita kadakuada: “Daytoy ti kinuna ni Jehova a Dios ti Israel, ‘Ikabil tunggal maysa kadakayo ti kampilanna iti sikiganna. Lumasatkayo ken agsublikayo manipud iti ruangan agingga iti ruangan iti pakarso ket papatayenyo tunggal maysa ti kabsatna ken tunggal maysa ti kaduana ken tunggal maysa ti nasinged nga am-ammona.’”+ 28  Ket ti annak ni Levi+ inaramidda kas iti kinuna ni Moises, iti kasta adda napasag kadagiti umili iti dayta nga aldaw nga agarup tallo ribu a lallaki. 29  Ket kinuna ni Moises: “Punnuenyo ti imayo ita nga aldaw iti pannakabalin maipaay ken Jehova,+ agsipud ta tunggal maysa kadakayo ket maibusor iti bukodna nga anak ken iti bukodna a kabsat,+ ken tapno ipaayna koma ti bendision kadakayo ita nga aldaw.”+ 30  Ket naaramid iti mismo a sumaganad nga aldaw a kinuna ni Moises kadagiti umili: “Dakayo—nagbasolkayo iti dakkel a basol,+ ket ita sumang-atak ken Jehova. Bareng mabalinko ti makiinnurnos maipaay iti basolyo.”+ 31  Gapuna ni Moises nagsubli ken Jehova ket kinunana: “Ah, ngem daytoy nga ili nagbasol iti dakkel a basol, ta inyaramidanda ti bagbagida iti maysa a dios a balitok!+ 32  Ngem ita no pakawanemto ti basolda,+—ket no saan, punasennak,+ pangngaasim, iti librom+ nga insuratmo.” 33  Nupay kasta, ni Jehova kinunana ken Moises: “Siasinoman a nagbasol maikaniwas kaniak, punasekto iti librok.+ 34  Ket ita, umayka, iturongmo ti ili iti disso a sinaok kenka. Adtoy! Ti anghelko mapanto iti sanguanam,+ ket iti aldaw a panangyegko iti pannusa sigurado nga iyegkonto ti pannusa kadakuada gapu iti basolda.”+ 35  Ket rinugian ni Jehova a sinaplit dagiti umili agsipud ta inaramidda ti kigaw a baka, nga inaramid ni Aaron.+

Footnotes