Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 30:1-38

30  “Ket masapul a mangaramidka iti altar a pagpuoran iti insienso;+ manipud iti kayo ti akasia aramidemto dayta.  Maysa a kasiko ti kaatiddogna ken maysa a kasiko ti kaakabana, rebbeng a kuadrado, ket ti kangatona dua a kasiko. Dagiti sarana agtaud iti dayta.+  Ket masapul a kalupkopam iti puro a balitok, ti rabawna ken dagiti sikiganna iti aglawlaw ken dagiti sarana; ket masapul nga iyaramidam iti maysa a bilid a balitok iti aglawlaw.+  Iyaramidamto met iti dua a singsing a balitok. Aramidemto ida iti baba ti bilidna iti dua kadagiti sikiganna, iti dua nga agsinnumbangir a sikigan dayta, yantangay masapul nga agserbida kas pangpatibker kadagiti assiw a pangawit iti dayta.+  Ket masapul nga aramidem dagiti assiw a kayo ti akasia ket kalupkopam ida iti balitok.+  Ket masapul nga ikabilmo iti sanguanan ti kortina nga adda iti asideg ti lakasa ti pammaneknek,+ iti sanguanan ti kalub nga adda iti rabaw ti Pammaneknek, a pagparangakto kenka.+  “Ket masapul a pagasuken ni Aaron ti napabanglo nga insienso+ iti rabaw dayta.+ Binigat, no saganaenna dagiti pagsilawan,+ pagasukennanto dayta.  Ket no gangtan ni Aaron dagiti pagsilawan iti nagbaetan ti dua a rabii, pagasukennanto dayta. Maysa dayta nga insienso a patinayon iti sanguanan ni Jehova bayat ti kapkaputotanyo.  Dikay mangidaton iti rabawna iti di mayalubog nga insienso+ wenno maysa a daton a mapuoran wenno maysa a daton a bukbukel; ket dikay mangiparukpok iti daton nga inumen iti rabawna. 10  Ket ni Aaron masapul a mangaramid iti panangabbong kadagiti sara dayta iti maminsan ti makatawen.+ Babaen ti dadduma iti dara ti daton ti panangabbong gapu iti basol+ isu mangaramidto iti panangabbong maipaay iti dayta maminsan ti makatawen bayat ti kapkaputotanyo. Kasasantuan dayta ken Jehova.” 11  Ket intultuloy ni Jehova ti agsao ken Moises, a kunkunana: 12  “Kaanoman nga alaem ti pakagupgopan ti annak ti Israel kas panangsensus kadakuada,+ ngarud masapul a mangtedda tunggal maysa ken Jehova iti subbot maipaay iti kararuana no agsensuska kadakuada,+ tapno awan koma ti dumteng a saplit kadakuada no agsensuska kadakuada.+ 13  Daytoy ti itedto amin dagidiay a lumasat nga agturong kadagidiay nabilang: kagudua a siklo iti siklo ti nasantuan a disso.+ Ti duapulo a gera katupagna ti maysa a siklo. Ti kagudua a siklo isu ti kontribusion ken Jehova.+ 14  Tunggal maysa a lumasat nga agturong kadagidiay naipasalista manipud duapulo ti tawenna ken agpangato itednanto ti kontribusion ni Jehova.+ 15  Ti nabaknang saan a mangted iti ad-adu, ket ti nanumo saanto a mangipaay iti basbassit ngem iti kagudua a siklo,+ tapno ited ti kontribusion ni Jehova iti kasta mangaramid iti panangabbong maipaay kadagiti kararuayo.+ 16  Ket masapul nga alaem iti annak ti Israel ti kuarta a pirak ti panangabbong ket itedmo maigapu iti panagserbi iti tolda ti gimong,+ iti kasta pudno nga agserbi kas pakalaglagipan iti sanguanan ni Jehova maipaay iti annak ti Israel, tapno mangaramid iti panangabbong maipaay kadagiti kararuayo.” 17  Ket ni Jehova nagsao pay ken Moises, a kunkunana: 18  “Masapul a mangaramidka iti palanggana a gambang ken pagsaadanna a gambang a maipaay a pagbugguan,+ ket masapul nga ikabilmo iti nagbaetan ti tolda ti gimong ken ti altar ket ikkam iti danum.+ 19  Ket ni Aaron ken ti annakna masapul a bugguanda ti im-imada ken ti saksakada iti dayta.+ 20  No sumrekda iti tolda ti gimong agbuggodanto iti danum tapno saanda a matay, wenno no umasidegda nga agserbi iti altar tapno mamagasukda iti naipuor a daton ken Jehova.+ 21  Ket masapul a bugguanda ti im-imada ken ti saksakada tapno saanda a matay,+ ket masapul nga agserbi dayta a kas alagaden agingga iti tiempo a di nakedngan maipaay kadakuada, maipaay kenkuana ken iti putotna iti intero a kapkaputotanda.”+ 22  Ket intuloy ni Jehova ti agsao ken Moises, a kunkunana: 23  “No maipapan kenka, alaem dagiti kasayaatan a bangbanglo:+ mirra+ a timmangken a tartaredted lima gasut a yunit, ken nasam-it a kanela+ a kagudua dayta a kaadu, dua gasut ket limapulo a yunit, ken nasam-it a kalamo+ dua gasut ket limapulo a yunit, 24  ken kasia+ lima gasut a yunit iti siklo ti nasantuan a disso,+ ken lana ti olibo maysa a hin.+ 25  Ket masapul a mangaramidka manipud iti dayta iti nasantuan a pangpulot a lana, maysa a sapsapo, maysa a napaglaok nga aramid ti maysa a managaramid iti sapsapo.+ Nasantuan a pangpulot a lana dayta.+ 26  “Ket masapul a sapsapuam iti dayta ti tolda ti gimong+ ken ti lakasa ti pammaneknek, 27  ken ti lamisaan ken amin dagiti aruatenna ken ti pagsaadan ti silaw ken dagiti aruatenna ken ti altar ti insienso, 28  ken ti altar ti daton a mapuoran ken amin dagiti aruatenna ken ti palanggana ken ti pagsaadanna. 29  Ket masapul a santipikarem ida tapno pudno nga agbalinda a kasasantuan.+ Asinoman a mangsagid kadakuada ket nasantuan.+ 30  Ket pulotamto ni Aaron+ ken ti annakna,+ ket masapul a santipikarem ida maipaay iti panagakem a kas papadi kaniak.+ 31  “Ket agsaokanto iti annak ti Israel, a kunaem, ‘Daytoy ket agtultuloy kas nasantuan a pangpulot a lana kaniak bayat ti kapkaputotanyo.+ 32  Saanto a mayapros iti lasag ti tao, ket babaen iti pannakapaglalaokna dikay mangaramid iti aniaman a kas iti dayta. Nasantuan a banag dayta. Agtultuloy a nasantuan a banag kadakayo. 33  Asinoman a mangaramid iti sapsapo a kas iti dayta ken mangikabil iti dayta iti ganggannaet masapul a magessat kadagiti kailianna.’”+ 34  Ket intultuloy ni Jehova a kunaen ken Moises: “Mangalaka kadagiti bangbanglo:+ dagiti tedted ti estakte ken onicha ken napabanglo a galbanum ken puro nga olibano.+ Rebbeng nga agpapada ti kaadu ti tunggal maysa. 35  Ket masapul nga aramidem nga insienso,+ napaglalaok nga especia, ti aramid ti managaramid iti sapsapo, naasinan,+ puro, nasantuan a banag. 36  Ket masapul a mangbegbegka iti sumagmamano iti dayta a pagbalinen a napino a pulbos ket ikabilmo ti sumagmamano iti dayta iti sanguanan ti Pammaneknek iti tolda ti gimong,+ a pagparangakto kenka.+ Rebbeng a kasasantuan dayta kadakayo. 37  Ket ti insienso nga aramidemto babaen iti daytoy a pannakapaglalaok, dikay mangaramid maipaay iti bagbagiyo.+ Maipaay kenka agtultuloy dayta a nasantuan a banag ken Jehova.+ 38  Siasinoman a mangaramid iti aniaman a kas iti dayta tapno tagiragsakenna ti angotna masapul a magessat+ kadagiti kailianna.”

Footnotes