Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 29:1-46

29  “Ket daytoy ti banag nga aramidem kadakuada a pangsantipikar kadakuada maipaay iti panagakem a kas papadi kaniak: Mangalaka iti maysa nga urbon a toro, ken dua a kalakian a karnero,+ dagidiay nasalun-at,+  ken di pinaalsa a tinapay ken di pinaalsa a nagtimbukel a tintinapay a nababasa iti lana ken di pinaalsa a galgalieta a napulagidan iti lana.+ Manipud iti nasayaat nga arina ti trigo aramidemto ida.  Ket masapul nga ikabilmo ida iti labba ket iparangmo ida a silalabba,+ ken kasta met ti toro ken ti dua a kalakian a karnero.  “Ket iparangmonto ni Aaron ken ti annakna iti pagserkan+ ti tolda ti gimong, ket masapul a bugguam ida iti danum.+  Kalpasanna masapul nga alaem dagiti kawes+ ket kawesam ni Aaron iti nagayad a pagan-anay ken iti awan manggasna a lambon ti efod ken iti efod ken iti pektoral, ket masapul nga igalutmo a siiirut kenkuana babaen ti barikes ti efod.+  Ket masapul nga isaadmo ti turbante iti rabaw ti ulona ket ikabilmo ti nasantuan a pagilasinan ti dedikasion iti rabaw ti turbante.+  Ket masapul nga alaem ti pangpulot a lana+ ket ibukbokmo iti ulona ket pulotam.+  “Kalpasanna iyasidegmonto ti annakna ket masapul a kawesam ida kadagiti nagayad a pagan-anay.+  Ket masapul a bariksam ida kadagiti sintas, ni Aaron kasta met ti annakna, ket masapul nga ibalkutmo kadakuada ti uklop; ket ti kinapadi masapul nga agbalin a kukuada kas paglintegan agingga iti tiempo a di nakedngan.+ Gapuna masapul a punnuem ti ima ni Aaron ken ti ima ti annakna iti pannakabalin.+ 10  “Masapul nga iparangmo ita ti toro iti sanguanan ti tolda ti gimong, ket ni Aaron ken ti annakna masapul nga ipatayda dagiti imada iti ulo ti toro.+ 11  Ket masapul a partiem ti toro iti sanguanan ni Jehova, iti pagserkan ti tolda ti gimong.+ 12  Ket masapul nga alaem ti dadduma iti dara ti toro+ ket ikabilmo babaen ti ramaymo kadagiti sara ti altar,+ ket ti isuamin a natedda iti dara ibuyatmonto iti puon ti altar.+ 13  Ket masapul nga alaem ti isuamin a taba+ a mangalupkop kadagiti bagis,+ ken ti kulanit iti rabaw ti dalem,+ ken ti dua a bekkel ken ti taba nga adda iti rabawda, ket masapul a pagasukem ida iti rabaw ti altar.+ 14  Ngem ti lasag ti toro ken ti kudilna ken ti iblengna puoramto iti apuy idiay ruar ti pakarso.+ Maysa dayta a daton gapu iti basol. 15  “Kalpasanna alaemto ti maysa a kalakian a karnero,+ ket ni Aaron ken ti annakna masapul nga ipatayda dagiti imada iti ulo ti kalakian a karnero.+ 16  Ket masapul a partiem ti kalakian a karnero ket alaem ti darana ket iwarsim dayta iti aglikmut ti rabaw ti altar.+ 17  Ket rangkayemto ti kalakian a karnero iti pispisina, ket masapul a bugguam dagiti bagisna+ ken dagiti kukodna ket ikabilmo ti pispisina iti maysa ken maysa agingga iti ulona. 18  Ket masapul a pagasukem ti intero a kalakian a karnero iti rabaw ti altar. Mapuoran a daton+ dayta ken Jehova, maysa a makabang-ar a sayamusom.+ Maysa dayta a naipuor a daton ken Jehova. 19  “Sumaganad masapul nga alaem ti sabali pay a kalakian a karnero, ket ni Aaron ken ti annakna masapul nga ipatayda dagiti imada iti ulo ti kalakian a karnero.+ 20  Ket masapul a partiem ti kalakian a karnero ket alaem ti dadduma iti darana ket ikabilmo dayta iti piditpidit ti makannawan a lapayag ni Aaron ken iti piditpidit ti makannawan a lapayag ti annakna ken iti tangan ti makannawan nga imada ken tangan ti makannawan a sakada,+ ket masapul nga iwarsim ti dara iti aglikmut ti rabaw ti altar. 21  Ket masapul nga alaem ti dadduma iti dara nga adda iti rabaw ti altar ken ti dadduma iti pangpulot a lana,+ ket masapul nga iparsiakmo ken Aaron ken iti kawkawesna ken iti annakna ken iti kawkawes ti annakna a kaduana, tapno isu ken ti kawkawesna ken ti annakna ken ti kawkawes ti annakna a kaduana pudno a mapagbalinda a nasantuan.+ 22  “Ket masapul nga alaem iti kalakian a karnero ti taba ken ti nataba nga ipus+ ken ti taba a mangalupkop kadagiti bagis, ken ti kulanit ti dalem, ken ti dua a bekkel ken ti taba nga adda iti rabawda, ken ti makannawan a luppo,+ ta maysa dayta a kalakian a karnero ti pannakaisaad;+ 23  kasta met ti maysa a nagbukel a tinapay ken ti maysa a nagtimbukel a tinapay ti nalanaan a tinapay ken ti maysa a galieta iti labba dagiti di pinaalsa a tinapay nga adda iti sanguanan ni Jehova.+ 24  Ket masapul nga ikabilmo ida amin kadagiti dakulap ni Aaron ken kadagiti dakulap ti annakna,+ ket masapul nga ililim ida nga agsublisubli kas daton a mailili iti sanguanan ni Jehova.+ 25  Ket masapul nga alaem ida kadagiti imada ket pagasukem ida iti rabaw ti altar iti rabaw ti daton a mapuoran kas makabang-ar a sayamusom iti sanguanan ni Jehova.+ Maysa dayta a naipuor a daton ken Jehova.+ 26  “Ket masapul nga alaem ti barukong ti kalakian a karnero ti pannakaisaad,+ a maipaay ken Aaron, ket ililim nga agsublisubli kas daton a mailili iti sanguanan ni Jehova, ket agbalinto dayta a bingaymo. 27  Ket masapul a santipikarem ti barukong+ ti daton a mailili ken ti luppo ti sagrado a bingay a nailili ken naikontribusion manipud iti kalakian a karnero ti pannakaisaad,+ manipud iti agpaay ken Aaron ken manipud iti agpaay iti annakna. 28  Ket agbalinto a kukua ni Aaron ken kukua ti annakna babaen ti alagaden agingga iti tiempo a di nakedngan a tungpalen ti annak ti Israel, agsipud ta maysa dayta a sagrado a bingay;+ ket agbalinto a maysa a sagrado a bingay nga idatag ti annak ti Israel. Manipud kadagiti sakripisioda a pakikaykaysa+ isu ti sagrado a bingayda maipaay ken Jehova. 29  “Ket ti nasantuan a kawkawes+ a kukua ni Aaron agserbidanto iti annakna+ a sumaruno kenkuana tapno pulotan+ ida kadakuada ken tapno punnuen ti imada iti pannakabalin kadakuada.+ 30  Pito nga aldaw+ nga ikawesto ida ti padi a sumuno kenkuana manipud iti annakna ken sumrek iti tolda ti gimong tapno agserbi iti nasantuan a disso. 31  “Ket alaemto ti kalakian a karnero ti pannakaisaad, ket masapul nga ilambongmo ti lasagna iti maysa a nasantuan a disso.+ 32  Ket masapul a kanen ni Aaron ken ti annakna+ ti lasag ti kalakian a karnero ken ti tinapay nga adda iti labba idiay pagserkan ti tolda ti gimong. 33  Ket masapul a kanenda ti bambanag a babaen kadagita naaramiden ti panangabbong tapno punnuen ti imada iti pannakabalin, tapno santipikaren ida.+ Ngem saan a kanen ida ti maysa a ganggannaet, agsipud ta nasantuanda a banag.+ 34  Ket no adda matedda nga aniaman iti lasag ti sakripisio iti pannakaisaad ken iti tinapay agingga iti bigat, ngarud masapul a puoram iti apuy no ania ti natedda.+ Masapul a saan a makan, agsipud ta nasantuan a banag dayta. 35  “Ket masapul nga aramidem ti kastoy ken Aaron ken iti annakna maitunos iti isuamin nga imbilinko kenka.+ Pitonto nga aldaw a punnuem ti imada iti pannakabalin.+ 36  Ket inaldaw nga idatonmonto ti toro ti daton gapu iti basol a maipaay iti panangabbong,+ ket masapul a gugoram ti altar manipud iti basol babaen ti panangaramidmo iti panangabbong iti dayta, ket masapul a sapsapuam+ tapno santipikarem. 37  Pitonto nga aldaw a mangaramidka iti panangabbong iti altar, ket masapul a santipikarem+ tapno pudno nga agbalin a maysa a kasasantuan nga altar.+ Asinoman a mangsagid iti altar ket nasantuan.+ 38  “Ket daytoy ti idatonmonto iti rabaw ti altar: urbon a kalakian a karkarnero a ti tunggal maysa ket makatawenna, patinayon a dua kada aldaw.+ 39  Ket idatonmonto ti maysa nga urbon a kalakian a karnero iti bigat,+ ket idatonmonto ti sabali pay nga urbon a kalakian a karnero iti nagbaetan ti dua a rabii.+ 40  Ket ti apagkapullo ti maysa nga efa a sukat ti nasayaat nga arina+ a nababasa iti kakapat ti maysa a hin ti nadingpil a lana, ken ti maysa a daton nga inumen+ a kakapat ti maysa a hin nga arak, maibuyogto iti umuna nga urbon a kalakian a karnero. 41  Ket idatonmonto ti maikadua nga urbon a kalakian a karnero iti nagbaetan ti dua a rabii. Agraman daton a bukbukel+ a kas ti daton iti bigat ken agraman maysa a daton nga inumen a kas iti daydiay, idatagmonto kas makabang-ar a sayamusom, maysa a naipuor a daton ken Jehova. 42  Maysa dayta a kankanayon+ a daton a mapuoran iti intero a kapkaputotanyo idiay pagserkan ti tolda ti gimong iti sanguanan ni Jehova, a pagparangakto kadakayo tapno agsaoak kadakayo sadiay.+ 43  “Ket agparangakto sadiay iti annak ti Israel, ket sigurado a masantipikarto dayta babaen ti dayagko.+ 44  Ket santipikarekto ti tolda ti gimong ken ti altar; ket santipikarekto+ ni Aaron ken ti annakna tapno agakemda a kas papadi kaniak. 45  Ket agtabernakuloakto iti tengnga ti annak ti Israel, ket agbalinakto a Diosda.+ 46  Ket sigurado a maammuandanto a siak ni Jehova a Diosda, a nangiruar kadakuada manipud daga ti Egipto tapno makapagtabernakuloak iti tengngada.+ Siak ni Jehova a Diosda.+

Footnotes