Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 26:1-37

26  “Ket ti tabernakulo aramidem nga addaan sangapulo a lupot ti tolda,+ manipud napino a lienso a tinabid ken asul a sinulid ken delana a natinaan iti lumabaga a purpura ken cocus nga eskarlata a material.+ Aramidemto ida nga addaan kerkerubin,+ ti aramid ti maysa a bumuborda.  Ti kaatiddog ti tunggal lupot ti tolda duapulo ket walo a kasiko ket ti kaakaba ti tunggal lupot ti tolda uppat a kasiko. Adda maymaysa a rukod maipaay iti amin a luplupot ti tolda.+  Lima a lupot ti tolda ti mangbukel iti maysa a panagsasaip a ti maysa naisilpo iti sabali, ken lima a lupot ti tolda iti maysa a panagsasaip a ti maysa naisilpo iti sabali.+  Ket masapul a mangaramidka kadagiti laog nga asul a sinulid iti pingir ti maysa a lupot ti tolda iti pungto ti nagsaipan; ket aramidem ti isu met laeng iti pingir ti makinruar a lupot ti tolda iti sabali pay a nagsabtan.+  Mangaramidkanto iti limapulo a laog iti maysa a lupot ti tolda, ket limapulo a laog ti aramidemto iti ungto ti lupot ti tolda nga adda iti sabali pay a nagsabtan, a dagiti laog agbabatogda ti maysa iti sabali.+  Ket masapul a mangaramidka iti limapulo a kawit a balitok ket pagsilpuem dagiti lupot ti tolda ti maysa iti sabali babaen kadagiti kawit, ket agbalinto a maysa a tabernakulo.+  “Ket masapul a mangaramidka kadagiti lupot a dutdot ti kalding+ a maipaay iti tolda iti rabaw ti tabernakulo. Mangaramidkanto iti sangapulo ket maysa a lupot ti tolda.  Ti kaatiddog ti tunggal lupot ti tolda tallopulo a kasiko,+ ket ti kaakaba ti tunggal lupot ti tolda uppat a kasiko. Adda maymaysa a rukod maipaay iti sangapulo ket maysa a lupot ti tolda.  Ket masapul a pagsisilpuem ti lima a lupot ti tolda a sangsangkanayon ken ti innem a lupot ti tolda a sangsangkanayon,+ ket masapul a kulpiem a paminduaen ti maikanem a lupot ti tolda iti sango ti tolda. 10  Ket masapul a mangaramidka iti limapulo a laog iti pingir ti maysa a lupot ti tolda, daydiay makinruar amin iti nagsaipan, ken limapulo a laog iti pingir ti lupot ti tolda iti sabali pay a nagsabtan. 11  Ket masapul a mangaramidka iti limapulo a kawit a gambang+ ket ikabilmo ti kawkawit kadagiti laog ket pagsisilpuem a sangsangkamaysa ti tolda, ket agbalinto a maymaysa.+ 12  Ket ti matedda kadagiti lupot ti tolda agbalin a pauyaoy. Ti matedda a kagudua ti lupot ti tolda aguyaoy iti likud ti tabernakulo. 13  Ket ti kasiko iti daytoy a sikigan ken ti kasiko iti dayta a sikigan ti matedda iti kaatiddog dagiti lupot ti tolda agserbinto a pauyaoy kadagiti sikigan ti tabernakulo, tapno maabbongan iti daytoy a sikigan ken iti bangir. 14  “Ket masapul a mangaramidka iti maysa nga abbong a lallalat ti kalakian a karnero a natinaan iti nalabaga maipaay iti tolda ken maysa nga abbong a lallalat ti foka agingga iti ngato. 15  “Ket masapul nga aramidem dagiti baskag ti diding+ a kayo ti akasia maipaay iti tabernakulo, a nakatakder iti ungto. 16  Sangapulo a kasiko ti kaatiddog ti maysa a baskag ti diding, ken maysa a kasiko ket kagudua ti kaakaba ti tunggal baskag ti diding. 17  Tunggal baskag ti diding addaan iti dua a palaupo a naisilpo ti maysa iti sabali. Kasta ti panangaramidmonto kadagiti amin a baskag ti diding ti tabernakulo. 18  Ket masapul nga aramidem dagiti baskag ti diding maipaay iti tabernakulo, duapulo a baskag ti diding maipaay iti sikigan a sumango iti Negeb, agpaabagatan. 19  “Ket mangaramidkanto iti uppat a pulo a sulluop a batay+ a pirak iti baba ti duapulo a baskag ti diding; dua a sulluop a batay iti baba ti maysa a baskag ti diding agraman ti dua a palaupona, ket dua a sulluop a batay iti baba ti sabali pay a baskag ti diding agraman ti dua a palaupona. 20  Ket maipaay iti sabali pay a sikigan ti tabernakulo, ti makin-amianan a sikigan, duapulo a baskag ti diding,+ 21  ken ti uppat a pulo a sulluop a batayda a pirak, dua a sulluop a batay iti baba ti maysa a baskag ti diding ken dua a sulluop a batay iti baba ti sabali pay a baskag ti diding.+ 22  Ket maipaay kadagiti makinlikud a benneg ti tabernakulo nga agpalaud mangaramidkanto iti innem a baskag ti diding.+ 23  Ket mangaramidkanto iti dua a baskag ti diding kas dugdugo ti tabernakulo+ iti dua a makinlikud a bennegna. 24  Ket rebbeng nga agrutapda iti baba, ket rebbeng nga agrutapda a sangsangkamaysa agingga iti ngato ti tunggal maysa iti umuna a singsing. Kasta ti rebbeng a pamay-an kadakuada a dua. Agserbidanto a kas dua a dugo. 25  Ket masapul nga adda walo a baskag ti diding ken sulluop a batbatayda a pirak, sangapulo ket innem a batay, dua a sulluop a batay iti baba ti maysa a baskag ti diding ken dua a sulluop a batay iti baba ti sabali pay a baskag ti diding. 26  “Ket masapul a mangaramidka kadagiti balunet a kayo ti akasia,+ lima maipaay kadagiti baskag ti diding ti maysa a sikigan ti tabernakulo, 27  ket lima a balunet maipaay kadagiti baskag ti diding ti sabali pay a sikigan ti tabernakulo ken lima a balunet maipaay kadagiti baskag ti diding ti sikigan ti tabernakulo maipaay iti dua a makinlikud a benneg nga agpalaud.+ 28  Ket ti nagtengnga a balunet iti tengnga dagiti baskag ti diding lumsot nga agtartarus manipud iti ungto agingga iti ungto. 29  “Ket kalupkopamto dagiti baskag ti diding iti balitok,+ ket aramidemto dagiti singsingda a balitok kas pangpatibker kadagiti balunet; ket masapul a kalupkopam dagiti balunet iti balitok. 30  Ket masapul nga ipasdekmo ti tabernakulo maitunos iti plano dayta a naiparangen kenka idiay bantay.+ 31  “Ket masapul a mangaramidka iti kortina+ nga asul a sinulid ken delana a natinaan iti lumabaga a purpura ken cocus nga eskarlata a material ken napino a lienso a tinabid. Aramidennanto nga addaan kadagiti kerubin,+ ti aramid ti maysa a bumuborda. 32  Ket masapul nga ikabilmo iti uppat nga adigi nga akasia a nakalupkopan iti balitok. Dagiti pasokda naaramid iti balitok. Addada iti rabaw ti uppat a sulluop a batay a pirak. 33  Ket masapul nga ikabilmo ti kortina iti baba dagiti kawit ket iyegmo ti lakasa ti pammaneknek+ sadiay iti uneg ti kortina; ket ti kortina masapul a mangaramid iti paglasinan maipaay kadakayo iti nagbaetan ti Nasantuan+ ken ti Kasasantuan.+ 34  Ket masapul nga ikabilmo ti kalub iti rabaw ti lakasa ti pammaneknek idiay Kasasantuan. 35  “Ket masapul nga isaadmo ti lamisaan iti ruar ti kortina, ken ti pagsaadan ti silaw+ a kabatog ti lamisaan iti sikigan ti tabernakulo a sumango iti abagatan; ket ti lamisaan ikabilmonto iti sikigan iti amianan. 36  Ket maipaay iti pagserkan ti tolda masapul a mangaramidka iti maysa a tabing+ nga asul a sinulid ken delana a natinaan iti lumabaga a purpura ken cocus nga eskarlata a material ken napino a lienso a tinabid, ti aramid ti mangngabel. 37  Ket masapul nga iyaramidam ti tabing iti lima nga adigi nga akasia ket kalupkopam ida iti balitok. Dagiti pasokda naaramid iti balitok. Ket masapul nga isukogam ida iti lima a sulluop a batay a gambang.

Footnotes