Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 25:1-40

25  Ket ni Jehova nagsao ken Moises,+ a kunkunana:  “Sawem iti annak ti Israel, a mangalada koma iti kontribusion maipaay kaniak: Manipud iti tunggal tao a gutugoten ti pusona alaenyo ti kontribusion a kukuak.+  Ket daytoy ti kontribusion nga alaenyo kadakuada: balitok+ ken pirak+ ken gambang,+  ken asul a sinulid, ken delana a natinaan iti lumabaga a purpura, ken cocus nga eskarlata a material, ken napino a lienso, ken dutdot ti kalding,+  ken lallalat ti kalakian a karnero a natinaan iti nalabaga, ken lallalat ti foka, ken kayo ti akasia;+  lana a maipaay iti silaw,+ lana ti balsamo+ a maipaay iti pangpulot a lana+ ken maipaay iti napabanglo nga insienso;+  ken onix a batbato ken pagtampok a batbato maipaay iti efod+ ken maipaay iti pektoral.+  Ket masapul nga iyaramidandak iti santuario, yantangay masapul nga agtabernakuloak iti tengngada.+  Maitunos iti isuamin nga ipakpakitak kenka kas pagtuladan ti tabernakulo ken pagtuladan dagiti amin nga alikamenna, kasta ti panangaramidyo iti dayta.+ 10  “Ket masapul a mangaramidda iti maysa a Lakasa a kayo ti akasia,+ dua ket kagudua a kasiko ti kaatiddogna ken maysa a kasiko ket kagudua ti kaakabana ken maysa a kasiko ket kagudua ti kangatona. 11  Ket masapul a kalupkopam iti puro a balitok.+ Iti uneg ken iti ruar kalupkopam dayta, ket masapul a mangaramidka iti maysa a bilid a balitok iti aglikmut ti rabawna.+ 12  Ket masapul nga isukogam iti uppat a singsing a balitok ket ikabilmo ida iti ngatuen ti uppat a sakana, a dua a singsing iti maysa a sikiganna ken dua a singsing iti sabali a sikiganna.+ 13  Ket masapul a mangaramidka kadagiti assiw a kayo ti akasia ket kalupkopam ida iti balitok.+ 14  Ket masapul nga iyusokmo dagiti assiw kadagiti singsing kadagiti sikigan ti Lakasa tapno awiten ti Lakasa babaen kadakuada. 15  Kadagiti singsing ti Lakasa agtalinaed dagiti assiw. Saanda a maikkat iti dayta.+ 16  Ket ti pammaneknek nga itedkonto kenka masapul nga ikabilmo iti Lakasa.+ 17  “Ket masapul a mangaramidka iti maysa a kalub a puro a balitok, dua ket kagudua a kasiko ti kaatiddogna ken maysa a kasiko ket kagudua ti kaakabana.+ 18  Ket masapul a mangaramidka iti dua a kerubin a balitok. Iti aramid a pinitpit aramidem ida iti dua a pungto ti kalub.+ 19  Ket mangaramidka iti maysa a kerubin iti daytoy a pungto ken maysa a kerubin iti dayta a pungto.+ Iti kalub aramidem dagiti kerubin iti dua a pungtona. 20  Ket dagiti kerubin masapul a siuukrad ti dua a payakda nga agpangato, a salsalingdanda ti rabaw ti kalub babaen kadagiti payakda, nga agsinnango dagiti rupada.+ Ti ruprupa dagiti kerubin rebbeng a situturong iti kalub. 21  Ket masapul nga ikabilmo ti kalub+ iti rabaw ti Lakasa, ket iti Lakasa ikabilmonto ti pammaneknek nga itedkonto kenka. 22  Ket agparangakto kenka sadiay ken makisaoak kenka manipud ngatuen ti kalub,+ manipud iti nagbaetan ti dua a kerubin nga adda iti rabaw ti lakasa ti pammaneknek, ti met laeng isuamin nga ibilinkonto kenka maipaay iti annak ti Israel.+ 23  “Ket masapul a mangaramidka iti maysa a lamisaan+ a kayo ti akasia, dua a kasiko ti kaatiddogna ken maysa a kasiko ti kaakabana ken maysa a kasiko ket kagudua ti kangatona. 24  Ket masapul a kalupkopam iti puro a balitok, ket masapul nga iyaramidam iti maysa a bilid a balitok iti aglikmut.+ 25  Ket masapul nga iyaramidam iti maysa nga iking a sangadakulapan iti aglikmut, ket masapul nga aramidem ti bilid a balitok maipaay iti ikingna iti aglikmut.+ 26  Ket masapul nga iyaramidam iti uppat a singsing a balitok ket ikabilmo dagiti singsing iti uppat a suli a maipaay iti uppat a saka.+ 27  Dagiti singsing rebbeng nga asidegda iti iking a kas pangpatibker kadagiti assiw a pangawit iti lamisaan.+ 28  Ket masapul nga aramidem dagiti assiw a kayo ti akasia ken kalupkopam ida iti balitok, ket masapul nga awitenda ti lamisaan babaen kadagita.+ 29  “Ket masapul nga aramidem dagiti pingganna ken dagiti kopana ken dagiti harrana ken dagiti malukongna a pangibukbokdanto kadagiti sakripisio nga inumen. Aramidem ida manipud puro a balitok.+ 30  Ket masapul nga ikabilmo a patinayon ti tinapay ti pamarang iti rabaw ti lamisaan iti sanguanak.+ 31  “Ket masapul a mangaramidka iti maysa a pagsaadan ti silaw a puro a balitok. Iti aramid a pinitpit maaramid ti pagsaadan ti silaw.+ Ti puonna, dagiti sangana, dagiti kopana, dagiti timbukelna ken dagiti sabongna agtaud iti dayta. 32  Ket innem a sanga ti rummuar manipud kadagiti sikiganna, tallo a sanga ti pagsaadan ti silaw manipud iti maysa a sikiganna ken tallo a sanga ti pagsaadan ti silaw manipud iti sabali a sikiganna.+ 33  Tallo a kopa a nasukog a kasla sabsabong ti almendro ti adda iti maysa a punipon ti sangsanga, nga addaan kadagiti timbukel ken sabsabong nga agbibinnal-et, ken tallo a kopa a nasukog a kasla sabsabong ti almendro iti sabali a punipon ti sangsanga, nga addaan kadagiti timbukel ken sabsabong nga agbibinnal-et.+ Kastoy ti pamay-an iti innem a sanga a rumrummuar manipud pagsaadan ti silaw. 34  Ket iti pagsaadan ti silaw uppat a kopa a nasukog a kasla sabsabong ti almendro, a dagiti timbukelna ken sabsabongna agbibinnal-etda.+ 35  Ket ti timbukel iti baba ti dua a sanga agtaud iti dayta ken ti timbukel iti baba ti dua a sabali pay a sanga agtaud iti dayta ken ti timbukel iti baba ti dua pay a sanga agtaud iti dayta, maipaay iti innem a sanga a rumrummuar manipud pagsaadan ti silaw.+ 36  Dagiti timbukelda ken dagiti sangada agtaud iti dayta. Isuamin dayta ket maysa a pedaso nga aramid a pinitpit, a puro a balitok.+ 37  Ket masapul nga iyaramidam iti pito a pagsilawan; ket dagiti pagsilawan masapul a magangatan, ket masapul nga agsilnagda iti disso iti sangona.+ 38  Ket dagiti pangarsangna ken dagiti pagikkanna iti apuy naaramidda iti puro a balitok.+ 39  Iti maysa a talento a puro a balitok aramidenna dayta agraman amin dagitoy nga aruatenna. 40  Ket siguraduem nga aramiden ida maitunos iti pagtuladan kadakuada a naiparang kenka idiay bantay.+

Footnotes