Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 21:1-36

21  “Ket dagitoy ti hudisial a pangngeddeng nga idatagmo iti sanguananda:+  “No kas pagarigan gumatangka iti adipen a Hebreo,+ isu adipento iti innem a tawen, ngem iti maikapito pumanawto a kas maysa a nawayawayaan nga awanan bayad.+  No is-isuna a sumrek, is-isunanto a pumanaw. No agtagikua iti maysa nga asawa a babai, ngarud ti asawana pumanawto a kaduana.  No ikkan ni apona iti asawa ket ipasngayanna iti annak a lallaki wenno annak a babbai, ti asawa a babai ken ti annakna agbalindanto a kukua ni apona+ ket pumanawto nga is-isuna.+  Ngem no ipilit a kunaen ti adipen, ‘Pudno nga ay-ayatek ni apok, ni asawak ken ti annakko; diak kayat ti pumanaw a kas maysa a nawayawayaan,’+  ngarud masapul nga iyadani ni apona iti pudno a Dios ket masapul nga ipidegna iti ridaw wenno iti bautek; ket masapul a tebbengan ni apona ti lapayagna babaen ti maysa a kulukol, ket adipennanto agingga iti tiempo a di nakedngan.+  “Ket no kas pagarigan ti maysa a tao ilakona ti anakna a babai kas maysa nga adipen,+ saanto a pumanaw a kas iti ipapanaw dagiti adipen a lallaki.  No isu saan a makaay-ayo kadagiti mata ni apona iti kasta saanna nga ituding a kas kamalala+ no di ket pasubbotna, awanto ti karbenganna a mangilako kenkuana iti ganggannaet a tattao gapu iti sigugulib a pannakilangenna kenkuana.  Ket no iti anakna a lalaki ti pangitudinganna kenkuana, aramidenna kenkuana ti maitunos iti maiparbeng a kalintegan ti annak a babbai.+ 10  No iyalaanna ti bagina iti sabali pay nga asawa, ti pagtaraonna, ti pagan-anayna+ ken ti karbengan ti pannakiasawana+ saan a makissayan. 11  No saannanto nga ipaay kenkuana dagitoy tallo a banag, ngarud pumanawto nga awan aniaman, awanan kuarta. 12  “Daydiay mangkabil iti maysa a tao iti kasta pudno a matay di bumurong a mapapatay.+ 13  Ngem no ti maysa saan nga agpadaan ket bay-an ti pudno a Dios a mapasamak dayta iti imana,+ ngarud ipasdekankanto iti lugar a mabalinna a pagkamangan.+ 14  Ket no kas pagarigan agpudot ti maysa a tao maibusor iti padana a tao agingga a papatayennan buyogen ti kinasikap,+ alaem uray pay adda iti altarko tapno matay.+ 15  Ket daydiay kumabil iti amana ken iti inana mapapatay a di bumurong.+ 16  “Ket daydiay mangkumaw iti maysa a tao+ ken pudno a mangilako kenkuana+ wenno iti imana ti nakasarakan kenkuana mapapatay a di bumurong.+ 17  “Ket daydiay idawdawatna ti pakadaksan ti amana ken ti inana mapapatay a di bumurong.+ 18  “Ket no kas pagarigan agririri dagiti tattao ket ti maysa kabilenna ti padana a tao babaen ti bato wenno gabion ket saan a matay no di ket agtalinaedto iti pagiddaanna; 19  no bumangon ket agpagnapagna iti ruar babaen ti pannakasaranayna, ngarud daydiay nangkabil kenkuana mawayawayaanto iti pannakadusa; subadannanto laeng ti tiempo a napukaw iti trabaho dayta a tao agingga a mapaimbagna a naan-anay. 20  “Ket no kas pagarigan ti maysa a tao kabilenna+ ti adipenna a lalaki wenno ti adipenna a babai babaen ti baston ket dayta a tao pudno a matay iti sidong ti imana, dayta a tao maibalesan a di bumurong.+ 21  Nupay kasta, no isu agbayag iti maysa nga aldaw wenno dua nga aldaw, saan a maibalesan, agsipud ta isu kuartana. 22  “Ket no kas pagarigan agdadangadang dagiti tattao ket pudno a masaktanda ti masikog a babai ket rummuar ti annakna+ ngem awan mapasamak a makapapatay nga aksidente, di bumurong a mamulta sigun iti ipatay kenkuana ti makinkukua iti babai; ket masapul nga itedna dayta baeten kadagiti hues.+ 23  Ngem no mapasamak ti makapapatay nga aksidente, ngarud masapul nga itdem ti kararua iti kararua,+ 24  mata iti mata, ngipen iti ngipen, ima iti ima, saka iti saka,+ 25  sinit iti sinit, sugat iti sugat, danog iti danog.+ 26  “Ket no kas pagarigan kabilen ti maysa a tao ti mata ti adipenna a lalaki wenno ti mata ti adipenna a babai ket pudno a madadaelna dayta, papanawenna a kas maysa a nawayawayaan kas pangsubad iti matana.+ 27  Ket no ngipen ti adipenna a lalaki wenno ngipen ti adipenna a babai ti mapusina, papanawenna a kas maysa a nawayawayaan kas pangsubad iti ngipenna. 28  “Ket no kas pagarigan ti maysa a toro sangduenna ti maysa a lalaki wenno maysa a babai ket dayta a tao pudno a matay, ti toro maubor+ a di bumurong, ngem ti lasagna saan a makan; ket ti makinkukua iti toro siwayawaya iti pannakadusa. 29  Ngem no ti maysa a toro sigud nga ugalina ti sumangdo ket naipaay ti pakdaar iti makinkukua iti dayta ngem saanna nga aywanan, ket pinatayna ti maysa a lalaki wenno maysa a babai, maubor ti toro ket mapapatay met ti makinkukua. 30  No maipatay kenkuana ti maysa a subbot, ngarud masapul nga itedna ti gatad a pannubbot iti kararuana sigun iti isuamin a maipatay kenkuana.+ 31  Uray no sinangdona ti maysa nga anak a lalaki wenno sinangdona ti maysa nga anak a babai, maaramid kenkuana sigun iti daytoy a hudisial a pangngeddeng.+ 32  No maysa nga adipen a lalaki wenno maysa nga adipen a babai ti sinangdo ti toro, itednanto ti gatad a tallopulo a siklo+ iti apo dayta a tao, ket mauborto ti toro. 33  “Ket no kas pagarigan ti maysa a tao manglukat iti abut, wenno kas pagarigan ti maysa a tao mangkali iti abut ket saanna a kaluban, ket ti maysa a toro wenno maysa nga asno matnag iti dayta,+ 34  agsubadto ti makinkukua iti abut.+ Ti gatad isublina iti makinkukua iti dayta, ket ti natay nga animal agbalinto a kukuana. 35  Ket no kas pagarigan ti toro ti maysa a tao saktanna ti toro ti sabali ket matay, ngarud masapul nga ilakoda ti sibibiag a toro ket bingayenda ti gatad a naibayad iti dayta; ken kasta met a daydiay natay rebbeng a bingayenda.+ 36  Wenno no pagaammo a ti maysa a toro sigud nga ugalina ti sumangdo ngem saan nga aywanan ti makinkukua iti dayta,+ di bumurong nga agsubad+ babaen ti toro iti toro, ket agbalinto a kukuana daydiay natay.

Footnotes