Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 19:1-25

19  Iti maikatlo a bulan kalpasan a rimmuar ti annak ti Israel manipud daga ti Egipto,+ iti isu met laeng nga aldaw, dimtengda iti let-ang ti Sinai.+  Ket pimmanawda iti Refidim+ ket simrekda iti let-ang ti Sinai ket nagpakarsoda iti let-ang;+ ket ti Israel nagpakpakarso sadiay iti sanguanan ti bantay.+  Ket ni Moises simmang-at a napan iti pudno a Dios, ket rinugian nga awagan ni Jehova manipud bantay,+ a kunkunana: “Daytoy ti sawem iti balay ni Jacob ken ibagam iti annak ti Israel,  ‘Dakayo nakitayo no ania ti inaramidko kadagiti Egipcio,+ tapno maawitkayo kadagiti payak dagiti agila ket iyegkayo kaniak.+  Ket ita no siiinget nga agtulnogkayto+ iti timekko ket pudno a salimetmetanyonto ti tulagko,+ iti kasta sigurado nga agbalinkayto a naisangsangayan a sanikuak manipud iti amin a sabsabali nga ili,+ agsipud ta kukuak ti intero a daga.+  Ket dakayo agbalinkayto kaniak a maysa a pagarian ti papadi ken maysa a nasantuan a nasion.’+ Dagitoy ti sasao a sawem iti annak ti Israel.”  Gapuna immay ni Moises ket inayabanna dagiti lallakay+ ti ili ket indatagna iti sanguananda amin dagitoy a sasao nga imbilin kenkuana ni Jehova.+  Kalpasan dayta amin dagiti umili simmungbatda a sangsangkamaysa ket kinunada: “Isuamin a sinao ni Jehova situtulokkami a mangaramid.”+ Dagus nga insubli ni Moises ti sasao dagiti umili ken Jehova.+  Gapu itoy ni Jehova kinunana ken Moises: “Adtoy! Umayak kenka iti nasipnget nga ulep,+ tapno iti kasta mangngeg dagiti umili inton makisaoak kenka,+ ken tapno uray kenka maaddaanda iti pammati agingga iti tiempo a di nakedngan.”+ Kalpasanna impadamag ni Moises ti sasao dagiti umili ken Jehova. 10  Ket ni Jehova kinunana ken Moises: “Mapanka kadagiti umili, ket masapul a santipikarem ida ita nga aldaw ken inton bigat, ket masapul a labaanda dagiti kagayda.+ 11  Ket masapul a nakasaganada maipaay iti maikatlo nga aldaw, agsipud ta iti maikatlo nga aldaw bumabanto ni Jehova iti imatang dagiti amin nga umili iti rabaw ti Bantay Sinai.+ 12  Ket masapul a mangipasdekka kadagiti pagpatinggaan maipaay kadagiti umili iti aglikmut, a kunaem, ‘Aluadanyo ti bagbagiyo maibusor iti isasang-at iti bantay, ket dikay sagiden ti igidna. Asinoman a mangsagid iti bantay di bumurong a mapapatayto.+ 13  Awan ti ima a mangsagid kenkuana, agsipud ta di bumurong a mauborto wenno di bumurong a masalputto. Uray no animal wenno tao, saanto nga agbiag.’+ Iti pannakapaguni ti tangguyob a sara ti kalakian a karnero+ isuda mabalinda ti sumang-at iti bantay.” 14  Kalpasanna simmalog ni Moises iti bantay a mapan kadagiti umili, ket inyussuatna ti panangsantipikar kadagiti umili; ket naglabada kadagiti kagayda.+ 15  Iti kasta kinunana kadagiti umili: “Agsaganakayo+ bayat ti tallo nga aldaw. Dakayo a lallaki dikay dumenna iti babai.”+ 16  Ket iti maikatlo nga aldaw idi bimmigaten naaramid a nangrugi a naggurgurruod ken nagkimkimat,+ ken adda napuskol nga ulep+ iti rabaw ti bantay ken natbag unay nga uni ti tangguyob,+ iti kasta nangrugi nga agpigerger dagiti amin nga umili nga adda idi iti pakarso.+ 17  Ni Moises inruarna ita dagiti umili manipud pakarso tapno sumabetda iti pudno a Dios, ket nagtakderda iti arisadsad ti bantay.+ 18  Ket ti Bantay Sinai nagasuk iti intero a rabawna,+ gapu iti kinapudno a ni Jehova bimmaba iti rabawna iti apuy;+ ket ti asukna nagpangpangato kas iti asuk ti maysa a pugon,+ ket ti intero a bantay nagkintayeg iti kasta unay.+ 19  Idi a ti uni ti tangguyob nagtultuloy a pumigpigsa, nangrugi nga agsao ni Moises, ket ti pudno a Dios nangrugi a sumungbat kenkuana babaen iti timek.+ 20  Gapuna ni Jehova bimmaba iti rabaw ti Bantay Sinai iti tuktok ti bantay. Kalpasanna ni Jehova inayabanna ni Moises iti tuktok ti bantay, ket simmang-at ni Moises.+ 21  Ni Jehova kinunana ita ken Moises: “Sumalogka, pakdaaram dagiti umili, tapno saanda a padasen ti sumarakusok nga agturong ken Jehova tapno kumitada ket adu kadakuada ti mapasag.+ 22  Ket kasta met ti papadi a regular nga umas-asideg ken Jehova santipikarenda koma ti bagbagida,+ tapno saan a bumusor kadakuada ni Jehova.”+ 23  Gapu itoy ni Moises kinunana ken Jehova: “Dagiti umili saanda a mabalin ti sumang-at iti Bantay Sinai, agsipud ta sika pinakdaarannakamin, a kinunam, ‘Mangipasdekka kadagiti pagpatinggaan maipaay iti bantay ket pagbalinem a sagrado.’”+ 24  Nupay kasta, kinuna kenkuana ni Jehova: “Mapanka, sumalogka, ket masapul a sumang-atka, sika ken ni Aaron a maikuyog kenka; ngem dika bay-an ti papadi ken dagiti umili a sumarakusok a sumang-at ken Jehova, tapno saan a bumusor kadakuada.”+ 25  Iti kasta simmalog ni Moises a mapan kadagiti umili ket imbagana kadakuada.+

Footnotes