Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 18:1-27

18  Ita ni Jetro a padi ti Midian, katugangan-a-lalaki ni Moises,+ nangngegna ti maipapan iti isuamin nga inaramid ti Dios maipaay ken Moises ken maipaay iti Israel nga ilina, no kasano nga inruar ni Jehova ti Israel manipud Egipto.+  Gapuna ni Jetro, katugangan-a-lalaki ni Moises, innalana ni Zipora, asawa ni Moises, kalpasan ti pannakapapanawna,  ken ti dua nga annakna,+ ti nagan ti maysa kadakuada Gersom,+ “agsipud ta,” kinunana, “maysa a ganggannaet nga agnanaed ti nagbalinak iti sabali a daga”;  ket ti nagan ti sabali Eliezer,+ “agsipud ta,” kas panangadaw kenkuana, “ti Dios ni amak isu ti katulongak ta inispalnak iti kampilan ni Faraon.”+  Gapuna ni Jetro, katugangan-a-lalaki ni Moises, ken ti annakna ken ti asawana immayda ken Moises iti let-ang a pagpakpakarsuanna idi, iti bantay ti pudno a Dios.+  Kalpasanna nangipatulod iti sao ken Moises: “Siak, ti katugangam-a-lalaki, ni Jetro,+ umayak kenka, ken kasta met ti asawam ken ti dua nga annakna a maikuyog kenkuana.”  Madagdagus a rimmuar ni Moises a sumabet iti katuganganna-a-lalaki, ket inruknoyna ti bagina ket inagkanna;+ ket rinugianda tunggal maysa nga inimtuod no kasano ti kasasaad ti sabali. Kalpasan dayta simrekda iti tolda.  Ket insalsalaysay ni Moises iti katuganganna-a-lalaki ti isuamin nga inaramid ni Jehova ken Faraon ken iti Egipto maigapu iti Israel,+ ken ti isuamin a pakarigatan a napagtengda iti dalan,+ ket kaskasdi inispal ida ni Jehova.+  Kalpasanna naragsakan ni Jetro gapu iti isuamin a naimbag nga inaramid ni Jehova maipaay iti Israel ta inispalna ida iti ima ti Egipto.+ 10  Iti kasta kinuna ni Jetro: “Bendito koma ni Jehova, a nangispal kadakayo iti ima ti Egipto ken iti ima ni Faraon, ken nangispal kadagiti umili iti sidong ti ima ti Egipto.+ 11  Ita ammokon a ni Jehova dakdakkel ngem kadagiti amin a sabali a didios+ maigapu itoy nga aramid a nagtignayanda a sidudursok maibusor kadakuada.” 12  Kalpasanna ni Jetro, katugangan-a-lalaki ni Moises, nangala iti daton a mapuoran ken kadagiti sakripisio maipaay iti Dios;+ ket immay ni Aaron ken amin dagiti lallakay ti Israel tapno makipanganda iti tinapay iti katugangan-a-lalaki ni Moises, iti sanguanan ti pudno a Dios.+ 13  Ket naaramid iti sumaganad nga aldaw a ni Moises nagtugaw kas iti sigud tapno agserbi kas ukom maipaay kadagiti umili,+ ket dagiti umili nagtaktakderda iti sanguanan ni Moises manipud iti bigat agingga iti rabii. 14  Ket ti katugangan-a-lalaki ni Moises nakitana ti isuamin nga ar-aramidenna maipaay kadagiti umili. Gapuna kinunana: “Ania a kita ti aramid daytoy nga ar-aramidem maipaay kadagiti umili? Apay a siksika laeng ti agtultuloy a situtugaw ket amin dagiti umili agtultuloyda a sitatakder iti sanguanam manipud iti bigat agingga iti rabii?” 15  Idin kinuna ni Moises iti katuganganna-a-lalaki: “Agsipud ta dagiti umili agtultuloyda nga umay kaniak tapno agimtuod iti Dios.+ 16  No mapasamak nga adda tumaud a kasoda,+ umayto dayta kaniak ket mangukomakto iti nagbaetan ti maysa a dasig ken ti sabali, ket ipakaammokto dagiti pangngeddeng ti pudno a Dios ken dagiti lintegna.”+ 17  Gapu itoy ti katugangan-a-lalaki ni Moises kinunana kenkuana: “Saan a nasayaat ti wagas nga ar-aramidem. 18  Sigurado a mapaksuyankanto, agpadpada sika ken daytoy nga ili a naikuyog kenka, agsipud ta daytoy nga aramid dakkel unay nga awit maipaay kenka.+ Saanmo a kabaelan nga aramiden a siksika.+ 19  Ita umimdengka iti timekko.+ Balakadanka, ket addanto kenka ti Dios.+ Sika agserbika kas pannakabagi maipaay kadagiti umili iti sanguanan ti pudno a Dios,+ ket sika iyegmonto dagiti kaso iti pudno a Dios.+ 20  Ket pakdaaramto ida no ania dagiti alagaden ken dagiti linteg,+ ket ipakaammomto kadakuada ti dalan a rebbeng a pagnaanda ken ti trabaho a rebbeng nga aramidenda.+ 21  Ngem sika rebbeng a pumilika manipud kadagiti amin nga umili iti makabael a lallaki,+ agbuteng iti Dios,+ mapagpiaran a lallaki,+ manggura iti nakillo a gunggona;+ ket isaadmonto dagitoy kadakuada kas pangpanguluen iti rinibu,+ pangpanguluen iti ginasut, pangpanguluen iti saglilimapulo ken pangpanguluen iti pinullo.+ 22  Ket ukomendanto dagiti umili iti tunggal umiso a gundaway; ket mapasamakto a tunggal dakkel a kaso iyegdanto kenka,+ ngem tunggal bassit a kaso isudanto ti mangtaming kas uk-ukom. Gapuna pagbalinem a nalaglag-an maipaay kenka, ket masapul a makipagawitda kenka.+ 23  No aramidem daytoy met laeng a banag, ken imbilin kenka ti Dios, iti kasta sigurado a kabaelamto nga itakderan ken, malaksid iti dayta, daytoy nga ili umaydanto amin a sitatalna iti bukodda a disso.”+ 24  Dagus nga impangag ni Moises ti timek ti katuganganna-a-lalaki ket inaramidna ti isuamin a sinaona.+ 25  Ket ni Moises nangpili iti makabael a lallaki iti intero nga Israel ket intedna kadakuada dagiti saad kas ul-ulo kadagiti umili,+ kas pangpanguluen ti rinibu, pangpanguluen ti ginasut, pangpanguluen ti saglilimapulo ken pangpanguluen ti pinullo. 26  Ket inukomda dagiti umili iti tunggal umiso a gundaway. Ti narikut a kaso iyegda ken Moises,+ ngem tunggal bassit a kaso isuda ti mangtaming kas uk-ukom. 27  Kalpasan dayta pinalubosan ni Moises ti katuganganna-a-lalaki,+ ket napan iti dagana.

Footnotes