Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 16:1-36

16  Idi agangay pimmanawda iti Elim,+ ket ti intero a gimong ti annak ti Israel dimteng kamaudiananna iti let-ang ti Sin,+ nga adda iti nagbaetan ti Elim ken Sinai, iti maikasangapulo ket lima nga aldaw ti maikadua a bulan kalpasan ti iruruarda manipud daga ti Egipto.  Ket ti intero a gimong ti annak ti Israel nangrugi nga agtanabutob maibusor kada Moises ken Aaron idiay let-ang.+  Ket kinunkuna kadakuada ti annak ti Israel: “Nataykami koma laengen+ babaen ti ima ni Jehova idiay daga ti Egipto bayat a situtugawkami iti sibay dagiti banga ti karne,+ bayat a mangmangankami iti tinapay agingga a mapnekkami, agsipud ta impandakami ditoy a let-ang tapno papatayenyo daytoy intero a kongregasion babaen ti nakaro a bisin.”+  Idin ni Jehova kinunana ken Moises: “Adtoy pagtuduek iti tinapay maipaay kadakayo manipud langlangit;+ ket dagiti umili masapul a rummuar ken agpidutda tunggal maysa ti kaitutopanna iti inaldaw-aldaw,+ tapno masubokko ida no magnadanto met laeng iti lintegko wenno saan.+  Ket mapasamakto iti maikanem nga aldaw+ a masapul nga isaganada ti iserrekdanto, ket agbalinto a mamindua iti pidpidutenda iti inaldaw.”+  Gapuna kinuna da Moises ken Aaron iti amin nga annak ti Israel: “Iti rabii sigurado a maammuanyonto a ni Jehova ti nangiruar kadakayo manipud daga ti Egipto.+  Ket iti bigat pudno a makitayonto ti dayag ni Jehova,+ agsipud ta nangngegna dagiti panagtanabutobyo maibusor ken Jehova. Ket aniakami aya tapno agtanabutobkayo maibusor kadakami?”  Ket intuloy ni Moises: “Kastanto inton ni Jehova ikkannakayo iti rabii iti karne a makan ket iti bigat tinapay agingga a mapnekkayo, agsipud ta nangngeg ni Jehova dagiti tanabutobyo nga itantanabutobyo maibusor kenkuana. Ket aniakami aya? Saan a maibusor kadakami dagiti panagtanabutobyo, no di ket maibusor ken Jehova.”+  Ket ni Moises kinunana ken Aaron: “Sawem iti intero a gimong ti annak ti Israel, ‘Umasidegkayo iti sanguanan ni Jehova, agsipud ta nangngegna dagiti tanabutobyo.’”+ 10  Kalpasanna napasamak nga apaman a nakapagsao ni Aaron iti intero a gimong ti annak ti Israel, nagbaw-ingda ket simmangoda iti let-ang, ket, adtoy! ti dayag ni Jehova nagparang iti ulep.+ 11  Ket ni Jehova nagsao pay ken Moises, a kunkunana: 12  “Nangngegko dagiti panagtanabutob ti annak ti Israel.+ Agsaoka kadakuada, a kunaem, ‘Iti nagbaetan ti dua a rabii mangankayto iti karne ket iti bigat mapnekkayto iti tinapay;+ ket sigurado a maammuanyonto a siak ni Jehova a Diosyo.’”+ 13  Ngarud napasamak nga iti rabii nangrugi dagiti pugo+ a dumteng ken mangabbong iti pakarso, ket iti bigat adda timmaud a palunapin ti linnaaw iti aglikmut ti pakarso.+ 14  Idi agangay nagalibungubong ti palunapin ti linnaaw ket adtoy iti rabaw ti let-ang adda napino a sinanniebe a banag,+ napino a kas iti nagbalay a linnaaw+ iti rabaw ti daga. 15  Idi nakita dayta ti annak ti Israel, rinugianda a kunaen iti maysa ken maysa: “Ania daytoy?” Ta saanda nga ammo no ania daydi. Gapuna kinuna kadakuada ni Moises: “Dayta ti tinapay nga inted ni Jehova kadakayo a pagtaraon.+ 16  Daytoy ti sao nga imbilin ni Jehova, ‘Agpidutkayo iti dayta, tunggal maysa kas mairukod iti makanna. Mangalakayo iti maysa nga omer+ a sukat maipaay iti tunggal maysa sigun ti bilang dagiti kararua nga adda iti tunggal maysa kadakayo iti toldana.’” 17  Ket rinugian ti annak ti Israel nga aramiden ti kasta; ket nagpidpidutda, ti dadduma agur-urnong iti adu ket ti dadduma agur-urnong iti bassit. 18  No rukodenda babaen ti omer, ti nakaurnong iti adu saan a nagsurok ket ti nakaurnong iti bassit saan a nagkurang.+ Nagpidutda tunggal maysa kas mairukod iti makanna. 19  Kalpasanna kinuna kadakuada ni Moises: “Awan koma ti asinoman a mangitedda iti aniaman iti dayta agingga iti bigat.”+ 20  Ngem saanda nga immimdeng ken Moises. No adda tattao a mangitedda iti dayta agingga iti bigat, mangpataud kadagiti igges ken bumangsit;+ iti kasta nagrurod kadakuada ni Moises.+ 21  Ket agpidutda a binigat,+ tunggal maysa kas mairukod iti makanna. Idi pimmudoten ti init, narunaw dayta. 22  Ket naaramid iti maikanem nga aldaw a nagpidutda iti mamindua ti kaaduna a tinapay,+ dua nga omer a sukat maipaay iti maysa a tao. Gapuna immay dagiti amin a panguluen ti gimong ket impadamagda ken Moises. 23  Iti kasta kinunana kadakuada: “Dayta ti kinuna ni Jehova. Inton bigat addanto panangngilin iti sabbath ti maysa a nasantuan a sabbath ken Jehova.+ No ania ti mabalinyo a lutuen, lutuenyo, ket no ania ti mabalinyo nga ilambong, ilambongyo,+ ket isuamin a surok nga adda idulinyo a maipaay kadakayo kas maysa a banag a maidulin agingga iti bigat.” 24  Ngarud indulinda agingga iti bigat, kas iti imbilin ni Moises; ket saan a bimmangsit wenno uray timmaud dagiti igges iti dayta.+ 25  Idin kinuna ni Moises: “Kanenyo dayta ita nga aldaw, agsipud ta ita nga aldaw ket maysa a sabbath+ ken Jehova. Ita nga aldaw saanyo a masarakan dayta iti tay-ak. 26  Innem nga aldaw nga agpidutkayto iti dayta, ngem iti maikapito nga aldaw maysa a sabbath.+ Awanto ti mabukel iti dayta.” 27  Nupay kasta, naaramid iti maikapito nga aldaw a sumagmamano kadagiti umili napanda agpidut iti dayta, ngem awan nasarakanda. 28  Iti kasta ni Jehova kinunana ken Moises: “Kasanonto kabayag ti panagkitakityo a mangsalimetmet iti bilbilinko ken linlintegko?+ 29  Tandaananyo ti kinapudno a ni Jehova intedna kadakayo ti sabbath.+ Dayta ti makagapu nga itedna kadakayo iti maikanem nga aldaw ti tinapay maipaay iti dua nga aldaw. Agtalinaedkayo a situtugaw tunggal maysa iti bukodna a disso.+ Awan koma ti asinoman a rummuar manipud lugarna iti maikapito nga aldaw.” 30  Ket dagiti umili nginilinda ti sabbath iti maikapito nga aldaw.+ 31  Ket rinugian ti balay ti Israel a naganen iti “manna.” Ket puraw dayta a kasla bukel ti kulantro, ket ti ramanna kasla iti raman dagiti dippit a tinapay nga addaan diro.+ 32  Kalpasanna kinuna ni Moises: “Daytoy ti sao nga imbilin ni Jehova, ‘Punnuenyo iti dayta ti maysa nga omer a sukat kas maysa a banag a maidulin iti intero a kapkaputotanyo,+ tapno makitada ti tinapay nga impakanko kadakayo iti let-ang idi iruruarkayo manipud daga ti Egipto.’”+ 33  Gapuna ni Moises kinunana ken Aaron: “Mangalaka iti karamba ket ikabilmo iti dayta ti sangaomer a manna ket idulinmo iti sanguanan ni Jehova kas maysa a banag a maidulin iti intero a kapkaputotanyo.”+ 34  Kas iti imbilin ni Jehova ken Moises, indulin ni Aaron iti sanguanan ti Pammaneknek+ kas maysa a banag a maidulin. 35  Ket ti annak ti Israel kinnanda ti manna iti uppat a pulo a tawen,+ agingga ti idadatengda iti daga a mapagnaedan.+ Ti manna isu ti kinnanda agingga a dimtengda iti lindoras ti daga ti Canaan.+ 36  Ita ti maysa nga omer ket apagkapullo ti maysa nga efa a sukat.

Footnotes