Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 14:1-31

14  Ni Jehova nagsao ita ken Moises, a kunkunana:  “Sawem iti annak ti Israel, a rebbeng nga agsublida ket agpakarsoda iti sanguanan ti Pihahirot iti nagbaetan ti Migdol ken ti baybay a matannawagan ti Baal-zefon.+ Iti sangona agpakarsokayo iti igid ti baybay.  Kalpasanna sigurado a kunaento ni Faraon maipapan iti annak ti Israel, ‘Agallaallada iti daga gapu iti pannakariribuk. Inalikubkob ida ti let-ang.’+  Gapuna pudno a bay-akto ti puso ni Faraon a sumubeg,+ ket sigurado a kamatennanto ida ket gun-odekto ti pannakaipadayagko babaen ken Faraon ken amin dagiti puersa militarna;+ ket sigurado a maammuanto dagiti Egipcio a siak ni Jehova.”+ Ngarud inaramidda a kasta met laeng.  Idi agangay naipadamag iti ari ti Egipto a dagiti umili nagtalawdan. Dagus a ti puso ni Faraon kasta met dagiti adipenna nagbaliw mainaig kadagiti umili,+ iti kasta kinunada: “Ania daytoy inaramidtayo, a pinapanawtayo ti Israel manipud panagpaadipen+ kadatayo?”  Gapuna impaisaganana dagiti karuahena a pakigubat, ket inkuyogna dagiti tattaona.+  Ket nangala iti innem a gasut a napili a karuahe+ ken amin a sabsabali pay a karuahe ti Egipto ken mannakigubat a maipaay iti tunggal maysa kadagita.  Iti kasta binay-an ni Jehova ti puso ni Faraon nga ari ti Egipto a sumubeg,+ ket kinamatna ti annak ti Israel, bayat a ti annak ti Israel rumrummuarda idi buyogen ti sitatag-ay nga ima.+  Ket kinamat ida dagiti Egipcio, ket amin dagiti kabalio ti karuahe ni Faraon ken dagiti kabalierona+ ken dagiti puersa militarna kinamakamda ida bayat nga agpakpakarsoda iti igid ti baybay, iti sibay ti Pihahirot a matannawagan ti Baal-zefon.+ 10  Idi nakaasideg ni Faraon, rinugian ti annak ti Israel nga itangwa dagiti matada ket adtoy dagiti Egipcio kumamkamat kadakuada; ket nagbuteng unay ti annak ti Israel ket nangrugida nga umkis ken Jehova.+ 11  Ket kinunada ken Moises: “Gapu kadi ta awan a pulos luglugar a pagitabonan idiay Egipto isu nga impannakami ditoy tapno mataykami iti let-ang?+ Ania daytoy inaramidmo kadakami nga inruarnakami manipud Egipto? 12  Saan aya a daytoy ti sao a sinaomi kenka idiay Egipto, a kunkunami, ‘Bay-annakami, tapno makapagserbikami kadagiti Egipcio’? Ta naim-imbag nga agserbikami kadagiti Egipcio ngem ti mataykami iti let-ang.”+ 13  Idin kinuna ni Moises kadagiti umili: “Dikay agbuteng.+ Agtakderkayo a sititibker ket kitaenyo ti panangisalakan ni Jehova, nga aramidennanto maipaay kadakayo ita nga aldaw.+ Ta dagiti Egipcio a makitkitayo ita nga aldaw saanyonton a makita, saan, saanen a pulos.+ 14  Makirupakto a mismo ni Jehova maipaay kadakayo,+ ket dakayo agulimekkayto.” 15  Ni Jehova kinunana ita ken Moises: “Apay nga agtultuloyka nga umkis kaniak?+ Sawem iti annak ti Israel a pumanawda iti nagpakarsuanda. 16  No maipapan kenka, itag-aymo ta sarukodmo+ ket iyunnatmo ta imam iti rabaw ti baybay ket pagbisngayem,+ tapno makalasat ti annak ti Israel iti tengnga ti baybay iti namaga a daga.+ 17  No maipapan kaniak, adtoy baybay-ak ti puspuso dagiti Egipcio a sumubeg,+ tapno sumurotda kadakuada ken tapno gun-odek ti pannakaipadayagko babaen ken Faraon ken kadagiti amin a puersa militarna, kadagiti karuahena a pakigubat ken kadagiti kabalierona.+ 18  Ket sigurado a maammuanto dagiti Egipcio a siak ni Jehova inton gun-odek ti dayag a maipaay kaniak babaen ken Faraon, kadagiti karuahena a pakigubat ken kadagiti kabalierona.”+ 19  Kalpasanna ti anghel+ ti pudno a Dios a mapmapan iti masanguanan ti pakarso ti Israel pimmanaw ket napan iti likudanda, ket ti munmon nga ulep pimmanaw iti sangoda ket nagsaad iti likudanda.+ 20  Gapuna napan dayta iti nagbaetan ti pakarso dagiti Egipcio ken ti pakarso ti Israel.+ Iti maysa a bangir ulep idi dayta a napakuyogan iti kinasipnget. Iti sabali a bangir nagtultuloy dayta a manglawag iti rabii.+ Ket daytoy a bunggoy saan a nakaasideg iti dayta a bunggoy iti intero nga agpatnag. 21  Inyunnat ita ni Moises ti imana iti rabaw ti baybay;+ ket rinugian ni Jehova a pasublien ti baybay babaen ti napigsa a wayaway nga angin iti intero nga agpatnag ken pagbalinen ti labneng ti baybay a namaga a daga,+ ket mabisbisngay idi ti dandanum.+ 22  Idi agangay limmasat ti annak ti Israel iti tengnga ti baybay iti namaga a daga,+ bayat a ti dandanum pader idi kadakuada iti makannawanda ken iti makannigidda.+ 23  Ket kimmamat dagiti Egipcio, ket amin dagiti kabalio ni Faraon, dagiti karuahena a pakigubat ken dagiti kabalierona rinugianda ti simmurot kadakuada,+ iti tengnga ti baybay. 24  Ket naaramid bayat ti panagbantay iti bigat a rinugian ni Jehova a kitaen ti pakarso dagiti Egipcio manipud uneg ti munmon nga apuy ken ulep,+ ket riniribukna+ ti pakarso dagiti Egipcio. 25  Ket inik-ikkatna ti pilpilid dagiti karuaheda iti kasta marigatanda idi a mangpataray;+ ket rinugian a kunaen dagiti Egipcio: “Idiantayon nga asitgan ti Israel, agsipud ta ni Jehova sigurado a makirupak maipaay kadakuada maibusor kadagiti Egipcio.”+ 26  Kamaudiananna ni Jehova kinunana ken Moises: “Iyunnatmo ta imam iti ngatuen ti baybay,+ tapno agsubli ti dandanum iti ngatuen dagiti Egipcio, kadagiti karuaheda a pakigubat ken kadagiti kabalieroda.” 27  Inyunnat a madagdagus ni Moises ti imana iti ngatuen ti baybay, ket nangrugi nga agsubli ti baybay iti gagangay a kasasaadna idi umad-adanin ti bigat. Bayat dayta itartarayan idi dagiti Egipcio ti idadateng dayta, ngem ni Jehova inwagnesna dagiti Egipcio iti tengnga ti baybay.+ 28  Ket nagtultuloy a nagsubli ti dandanum.+ Kamaudiananna inabbonganda dagiti karuahe a pakigubat ken dagiti kabaliero a kukua dagiti amin a puersa militar ni Faraon ken isuda a simmurot kadakuada iti baybay.+ Awan uray maysa kadakuada ti natedda.+ 29  No maipapan iti annak ti Israel, nagnada iti namaga a daga iti tengnga ti lansad ti baybay,+ ket ti dandanum nagpaay kadakuada a pader iti makannawanda ken iti makannigidda.+ 30  Iti kasta iti dayta nga aldaw insalakan ni Jehova ti Israel iti ima dagiti Egipcio,+ ket ti Israel nakitana dagiti Egipcio a natayda iti aplaya.+ 31  Nakita met ti Israel ti naindaklan nga ima a pinagtignay ni Jehova maibusor kadagiti Egipcio; ket nangrugi dagiti umili nga agbuteng ken Jehova ken maaddaan iti pammati ken Jehova ken ni Moises nga adipenna.+

Footnotes