Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 13:1-22

13  Ket ni Jehova nagsao pay ken Moises, a kunkunana:  “Santipikarem kaniak ti tunggal lalaki nga inauna a mangilukat iti tunggal aanakan iti annak ti Israel, kadagiti tattao ken an-animal. Kukuak dayta.”+  Ket kinuna ni Moises kadagiti umili: “Adda koma pananglaglagip itoy nga aldaw nga isu ti iruruaryo manipud Egipto,+ manipud balay dagiti adipen, agsipud ta babaen ti pigsa ti ima inruarnakayo ni Jehova manipud ditoy.+ Gapuna awan ti nalebaduraan a mabalin a kanen.+  Ita nga aldaw rummuarkayo iti bulan ti Abib.+  Ket mapasamakto a no naipannakanton ni Jehova iti daga dagiti Canaanita ken dagiti Heteo ken dagiti Amoreo ken dagiti Heveo ken dagiti Jebuseo,+ nga insapatana kadagidi ammam nga ited kenka,+ maysa a daga a pagay-ayusan ti gatas ken diro,+ iti kasta masapul nga aramidem daytoy a panagserbi itoy a bulan.  Pito nga aldaw a manganka kadagiti di pinaalsa a tinapay,+ ket iti maikapito nga aldaw isu ti piesta ken Jehova.+  Di pinaalsa a tintinapay ti kanen iti pito nga aldaw;+ ket awan ti nalebaduraan a makita kenka,+ ken awan ti naalsem a bellaay a makita kenka iti uneg dagiti amin a beddengmo.+  Ket masapul a saritaem iti anakmo iti dayta nga aldaw, a kunaem, ‘Gapu iti daydiay inaramid kaniak ni Jehova idi rimmuarak manipud Egipto.’+  Ket agserbinto kenka kas pagilasinan ita imam ken kas pakalaglagipan iti baet dagita matam,+ tapno ti linteg ni Jehova addanto ita ngiwatmo;+ agsipud ta babaen ti napigsa nga ima inruarnaka ni Jehova manipud Egipto.+ 10  Ket masapul a salimetmetam daytoy a paglintegan iti naituding a tiempona iti tinawentawen.+ 11  “Ket mapasamakto nga inton ipannaka ni Jehova iti daga dagiti Canaanita,+ kas iti insapatana kenka ken kadagidi ammam,+ ken inton itedna kenka dayta, 12  iti kasta masapul nga ipaaymo ken Jehova ti tunggal maysa a mangilukat iti aanakan,+ ken ti tunggal inauna, ti urbon ti maysa nga animal,+ nga agbalinto a kukuam. Kukua ni Jehova dagiti lallaki.+ 13  Ket ti tunggal inauna nga asno subbotem iti maysa a karnero, ket no saanmonto a subboten, ngarud masapul a rung-uem ti tengngedna.+ Ket ti tunggal inauna ti tao iti annakmo a lallaki subbotem.+ 14  “Ket mapasamakto a no kas pagarigan ti anakmo agimtuod kenka iti kalpasanna,+ a kunkunana, ‘Ania ti kaipapanan daytoy?’ iti kasta masapul a kunaem kenkuana, ‘Babaen ti pigsa ti ima inruarnakami ni Jehova manipud Egipto,+ manipud balay dagiti adipen.+ 15  Ket naaramid a ni Faraon nangipakita ti kinasubeg a mangpapanaw kadakami,+ ket pinapatay ni Jehova ti tunggal inauna iti daga ti Egipto,+ manipud iti inauna ti tao agingga iti inauna ti animal.+ Dayta ti makagapu nga isaksakripisiok ken Jehova dagiti amin a lallaki a mangilukat iti aanakan,+ ket ti tunggal inauna iti annakko a lallaki subbotek.’+ 16  Ket agserbinto dayta kas pagilasinan ita imam ken kas bedbed iti muging iti baet dagita matam,+ agsipud ta babaen ti pigsa ti ima inruarnatayo ni Jehova manipud Egipto.”+ 17  Ket naaramid iti tiempo a panangpapanaw ni Faraon kadagiti umili a ti Dios saanna nga inturong ida a dumalan iti daga dagiti Filisteo gapu laeng ta asideg dayta, ta kinuna ti Dios: “Mabalin nga agbabawi dagiti umili no makakitada iti gubat ket siguradonto nga agsublida iti Egipto.”+ 18  Ngarud ti Dios pinaglikawna dagiti umili a dumalan iti let-ang ti Nalabaga a Baybay.+ Ngem iti urnos ti pannakibakal a ti annak ti Israel simmang-atda manipud daga ti Egipto.+ 19  Ket inkuyog ni Moises dagiti tulang ni Jose, agsipud ta pinagsapatana a sidadaeg ti annak ti Israel, a kunkunana: “Di bumurong nga iturongto ti Dios ti asikasona kadakayo,+ ket masapul nga ikuyogyo nga isang-at dagiti tulangko manipud ditoy.”+ 20  Ket pimmanawda iti Succot ket nagpakarsoda idiay Etham iti igid ti let-ang.+ 21  Ket mapmapan idi ni Jehova iti masanguananda iti aldaw iti maysa a munmon nga ulep tapno iturongna ida iti dalan,+ ket iti rabii iti maysa a munmon nga apuy tapno mangted kadakuada iti lawag tapno makapagnada iti aldaw ken iti rabii.+ 22  Ti munmon nga ulep saan a pumanaw iti sanguanan dagiti umili iti aldaw wenno uray ti munmon nga apuy iti rabii.+

Footnotes