Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 12:1-51

12  Kinuna ita ni Jehova kada Moises ken Aaron idiay daga ti Egipto:  “Daytoy a bulan ti pangrugianto dagiti bulan maipaay kadakayo. Daytanto ti umuna kadagiti bulan ti tawen maipaay kadakayo.+  Agsaokayo iti intero a gimong ti Israel, a kunkunayo, ‘Iti maikasangapulo nga aldaw daytoy a bulan iyalaandanto ti bagbagida tunggal maysa iti karnero+ maipaay iti balay dagiti inapo, maysa a karnero iti kada balay.  Ngem no bassit unay ti sangakabbalayan maipaay iti karnero, ngarud isu ken ti asideg a kaarrubana alaendanto dayta iti balayna sigun iti bilang dagiti kararua; patangenyo ti tunggal maysa a mairukod iti makanna no maipapan iti karnero.  Rebbeng a nasalun-at ti karnero,+ kalakian, agtawen iti maysa, maipaay kadakayo.+ Mabalinyo ti pumili manipud kadagiti urbon a kalakian a karnero wenno manipud kadagiti kalding.  Ket masapul nga agtalinaed dayta iti panangsaluadyo agingga iti maikasangapulo ket uppat nga aldaw daytoy a bulan,+ ket partiento ti intero a kongregasion ti gimong ti Israel iti nagbaetan ti dua a rabii.+  Ket masapul nga alaenda ti dadduma iti dara ket iwarsida iti dua a bautek ken iti makinngato a paset ti ruangan nga adda kadagiti balay a panganandanto iti dayta.+  “‘Ket masapul a kanenda ti lasag iti daytoy a rabii.+ Rebbeng a kanenda a naituno iti apuy ken agraman dagiti di pinaalsa a tinapay+ a maibuyog iti napait a natnateng.+  Dikay kanen ti aniaman iti dayta a naata wenno nailambong, nailuto iti danum, no di ket naituno iti apuy, ti ulona agraman dagiti kukodna ken dagiti makin-uneg a pasetna. 10  Ket dikay mangitedda ti aniaman iti dayta agingga iti bigat, ngem ti matedda iti dayta agingga iti bigat rebbeng a puoranyo iti apuy.+ 11  Ket kastoy ti rebbeng a pannanganyo iti dayta, dagiti padingpadingyo nabariksan,+ dagiti palloka+ adda kadagiti sakayo ket ti sarukodyo adda iti imayo; ket masapul a kanenyo a sigaganat. Paskua dayta ni Jehova.+ 12  Ket lumasatakto iti daga ti Egipto iti daytoy a rabii+ ket kabilek ti tunggal inauna iti daga ti Egipto, manipud iti tao agingga iti animal;+ ket iti amin a didios ti Egipto ipakatkonto dagiti pannakaukom.+ Siak ni Jehova.+ 13  Ket ti dara agserbinto kas pagilasinan kadakayo iti balbalay nga ayanyo; ket makitakto ti dara ket labsankayo,+ ket ti saplit saanto nga umay kadakayo kas pannakadadael inton kabilek ti daga ti Egipto. 14  “‘Ket daytoy nga aldaw masapul nga agserbi a kas panglaglagip maipaay kadakayo, ket masapul a rambakanyo dayta kas piesta ken Jehova iti intero a kapkaputotanyo. Kas paglintegan agingga iti tiempo a di nakedngan rebbeng a rambakanyo. 15  Pito nga aldaw a mangankayo kadagiti di pinaalsa a tinapay. Wen, iti umuna nga aldaw ikkatenyo ti naalsem a bellaay kadagiti balayyo, agsipud ta asinoman a mangan iti nalebaduraan, manipud iti umuna nga aldaw agingga iti maikapito,+ dayta a kararua masapul a magessat iti Israel.+ 16  Ket iti umuna nga aldaw adda maaramid a nasantuan a kombension maipaay kadakayo, ket iti maikapito nga aldaw maysa a nasantuan a kombension.+ Awan ti trabaho a maaramid kadagita.+ Ti laeng kasapulan a kanen ti tunggal kararua, dayta laeng ti mabalin nga aramiden maipaay kadakayo.+ 17  “‘Ket masapul a salimetmetanyo ti piesta dagiti di pinaalsa a tinapay,+ agsipud ta iti daytoy met laeng nga aldaw masapul nga iruarko dagiti buyotyo manipud daga ti Egipto. Ket masapul a salimetmetanyo daytoy nga aldaw iti intero a kapkaputotanyo kas paglintegan agingga iti tiempo a di nakedngan. 18  Iti umuna a bulan, iti maikasangapulo ket uppat nga aldaw ti bulan, iti rabii mangankayo kadagiti di pinaalsa a tinapay agingga iti maikaduapulo ket maysa nga aldaw ti bulan iti rabii.+ 19  Pito nga aldaw nga awan naalsem a bellaay a masarakan kadagiti balayyo, agsipud ta asinoman a mangraman iti nalebaduraan, uray no isu ganggannaet nga agnanaed wenno katutubo iti daga,+ dayta a kararua masapul a magessat iti gimong ti Israel.+ 20  Awan kanenyo a nalebaduraan. Iti amin a pagnanaedanyo mangankayo kadagiti di pinaalsa a tinapay.’” 21  Dagus nga inayaban ni Moises ti amin a lallakay ti Israel+ ket kinunana kadakuada: “Rummuarkayo ket mangalakayo maipaay kadakayo iti babassit nga animal sigun iti pampamiliayo, ket partienyo ti maparti iti paskua.+ 22  Ket masapul a mangalakayo iti maysa a punggos a hisopo+ ket isawsawyo iti dara nga adda iti palanggana ket iwarsiyo iti makinngato a paset ti ruangan ken iti dua a bautek ti dadduma iti dara nga adda iti palanggana; ket awan kadakayo ti rummuar iti pagserkan ti balayna agingga iti bigat. 23  Kalpasanna inton lumasat ni Jehova tapno saplitenna dagiti Egipcio ket makitana ti dara iti makinngato a paset ti ruangan ken iti dua a bautek, sigurado a labsanto ni Jehova ti pagserkan, ket saannanto a palubosan a sumrek ti pannakadadael kadagiti balayyo tapno saplitennakayo.+ 24  “Ket masapul a salimetmetanyo daytoy a banag a kas alagaden+ maipaay kadakayo ken iti annakyo agingga iti tiempo a di nakedngan.+ 25  Ket mapasamakto nga inton dumtengkayo iti daga nga itedto kadakayo ni Jehova, kas iti sinaona, iti kasta masapul a salimetmetanyo daytoy a panagserbi.+ 26  Ket mapasamakto nga inton kunaen kadakayo ti annakyo, ‘Ania ti kaipapanan kadakayo daytoy a panagserbi?’+ 27  iti kasta masapul a kunaenyo, ‘Dayta ti sakripisio ti paskua ken Jehova,+ a nanglabas kadagiti balay ti annak ti Israel idiay Egipto idi sinaplitna dagiti Egipcio, ngem inispalna dagiti balaymi.’” Idin nagrukob dagiti umili ket inruknoyda ti bagbagida.+ 28  Kalpasanna napan ti annak ti Israel ket inaramidda kas iti imbilin ni Jehova kada Moises ken Aaron.+ Inaramidda ti kasta met laeng. 29  Ket naaramid nga iti tengnga ti rabii kinabil ni Jehova ti tunggal inauna iti daga ti Egipto,+ manipud inauna ni Faraon nga agtugtugaw iti tronona agingga iti inauna ti kautibo nga adda idi iti pagbaludan nga abut, ken ti tunggal inauna ti animal.+ 30  Idin ni Faraon bimmangon iti rabii, isu ken amin dagiti adipenna ken amin dagiti sabsabali pay nga Egipcio; ket nangrugi a timmaud sadiay ti dakkel nga ikkis kadagiti Egipcio,+ agsipud ta awan idi ti balay nga awanan iti maysa a natay. 31  Dagus nga inayabanna+ da Moises ken Aaron iti rabii ket kinunana: “Tumakderkayo, rummuarkayo manipud tengnga dagiti tattaok, agpadpada a dakayo ken ti sabsabali pay nga annak ti Israel, ket mapankayo, agserbikayo ken Jehova, kas iti insaoyo.+ 32  Alaenyo agpadpada dagiti arbanyo ken dagiti pangenyo, kas iti insaoyo,+ ket mapankayo. Kasta met, malaksid iti dayta masapul a bendisionandak.” 33  Ket rinugian dagiti Egipcio a dagadagen dagiti umili tapno sidadaras a papanawenda+ ida iti daga, “agsipud ta,” kinunada, “arigna nataykamin amin!”+ 34  Iti kasta inawit dagiti umili ti bellaay nga arinada sakbay idi a malebaduraan, a dagiti paggamayanda a nabungon kadagiti kagayda adda iti abagada. 35  Ket ti annak ti Israel inaramidda sigun iti sao ni Moises a nagkiddawda kadagiti Egipcio iti ar-aruaten a pirak ken ar-aruaten a balitok ken kagkagay.+ 36  Ket ni Jehova impaayanna ti ili iti pabor kadagiti mata dagiti Egipcio,+ iti kasta inted dagitoy kadakuada no ania ti nakiddaw;+ ket binakasanda dagiti Egipcio.+ 37  Ket pimmanaw ti annak ti Israel manipud Rameses+ nga agturong iti Succot,+ iti bilang nga innem a gasut a ribu a nababaneg a lallaki a magmagna, malaksid dagidiay ubbing.+ 38  Ket nakipagsang-at met kadakuada ti maysa a nakadakdakkel a naglalaok a bunggoy,+ kasta met dagiti arban ken dagiti pangen, maysa a nakaad-adu unay a pangen dagiti animal. 39  Ket rinugianda a lutuen ti bellaay nga arina nga inruarda manipud Egipto a pagbalinen a nagbubukel a tinapay, di pinaalsa a tintinapay, agsipud ta saan a nalebaduraan, ta naparuardan manipud Egipto ket saandan a nakapagbayag ken kasta met saanda a naisaganaan ti bagbagida iti aniaman a pagtaraon.+ 40  Ket ti panagnaed ti annak ti Israel, a nagnaed+ idiay Egipto,+ uppat a gasut ket tallopulo a tawen.+ 41  Ket naaramid iti ngudo ti uppat a gasut ket tallopulo a tawen, naaramid a mismo itoy met laeng nga aldaw nga amin dagiti buyot ni Jehova rimmuarda manipud daga ti Egipto.+ 42  Rabii dayta ti panagngilin mainaig ken Jehova iti panangiruarna kadakuada manipud daga ti Egipto. Mainaig ken Jehova maysa daytoy a rabii a ngilinen iti biang ti amin nga annak ti Israel iti intero a kapkaputotanda.+ 43  Ket kinuna ni Jehova kada Moises ken Aaron: “Daytoy ti paglintegan ti paskua:+ Awan ti ganggannaet a mabalin a mangan iti dayta.+ 44  Ngem no adda asinoman nga adipen a lalaki a nagatang iti kuarta, masapul a kugitem.+ Kalpasan dayta a mabalinnan ti makiraman iti pannangan iti dayta. 45  Ti maysa a makipaggigian ken ti maysa a patangtangdanan a trabahador saanda a mabalin ti mangan iti dayta. 46  Makan dayta iti maymaysa a balay. Dika iruar ti aniaman iti lasag manipud iti balay nga ipan iti aniaman a lugar iti ruar. Ket dikay mangtukkol iti tulang iti dayta.+ 47  Rambakan dayta ti intero a gimong ti Israel.+ 48  Ket no kas pagarigan ti maysa a ganggannaet nga agnanaed makipagtaeng kas ganggannaet kenka ket pudno a rambakannanto ti paskua ken Jehova, adda koma panangkugit iti tunggal lalaki a kukuana.+ Kalpasan dayta a mabalinnan ti umasideg tapno rambakanna dayta; ket agbalinto a kasla katutubo iti daga. Ngem awan ti di nakugit a lalaki a mabalin a mangan iti dayta. 49  Maymaysa a linteg ti adda maipaay iti katutubo ken maipaay iti ganggannaet nga agnanaed nga agtataeng kas ganggannaet iti nagtetengngaanyo.”+ 50  Gapuna amin ti annak ti Israel inaramidda kas iti imbilin ni Jehova kada Moises ken Aaron. Inaramidda ti kasta met laeng.+ 51  Ket naaramid itoy met laeng nga aldaw a ni Jehova inruarna ti annak ti Israel agraman dagiti buyotda+ manipud daga ti Egipto.

Footnotes