Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 10:1-29

10  Kalpasanna ni Jehova kinunana ken Moises: “Mapanka ken Faraon, agsipud ta siak—binay-ak ti pusona ken ti puspuso dagiti adipenna nga agbalin nga awanan panagtignay,+ tapno maisaadko dagitoy a pagilasinak iti mismo nga imatangna,+  ken tapno maideklaram kadagiti lapayag ti anakmo ken iti anak ti anakmo no kasano a nakaing-inget ti pannakilangenko iti Egipto ken dagiti pagilasinak nga impasdekko iti tengngada;+ ket sigurado a maammuanyonto a siak ni Jehova.”+  Gapuna da Moises ken Aaron napanda ken Faraon ket kinunada kenkuana: “Daytoy ti kinuna ni Jehova a Dios dagiti Hebreo, ‘Kasanonto kabayag ti panagkitakitmo a mangipasakup iti bagim kaniak?+ Palubosam ti ilik tapno makapagserbida kaniak.  Ta no itultuloymo ti agkitakit a mamalubos iti ilik, adtoy iyegko dagiti dudon iti uneg dagiti beddengmo inton bigat.+  Ket pudno nga abbongandanto ti makitkita a rabaw ti daga ket saanto a mabalin a kitaen ti daga; ket sigurado nga ibusendanto ti natedda kadagiti nakalisi, ti imbati kadakayo ti uraro, ket pudno unay a kanendanto ti tunggal agtubtubo a kayoyo manipud iti tay-ak.+  Ket dagiti balaymo ken dagiti balay ti amin nga ad-adipenmo ken dagiti balay ti intero nga Egipto mapnonto agingga iti rukod a dagiti ammam ken ti amma dagiti ammam saanda pay a nakita dayta manipud aldaw ti kaaddada iti rabaw ti daga agingga itoy nga aldaw.’”+ Iti kasta nagbaw-ing ket rimmuar a pimmanaw ken Faraon.+  Kalpasan dayta kinuna kenkuana dagiti adipen ni Faraon: “Kasanonto kabayag ti panagbalin daytoy a lalaki a kas silo kadatayo?+ Palubosam dagiti lallaki tapno makapagserbida ken Jehova a Diosda. Dika kadi pay ammo a ti Egipto nadadaelen?”+  Gapuna da Moises ken Aaron naisublida ken Faraon, ket kinunana kadakuada: “Mapankayo, agserbikayo ken Jehova a Diosyo.+ Siasino a mismo dagidiay mapan?”  Idin kinuna ni Moises: “Mapankamto agraman dagiti agtutubo nga umilimi ken dagiti lallakay nga umilimi. Agraman ti annakmi a lallaki ken ti annakmi a babbai,+ agraman dagiti karneromi ken ti bakbakami mapankamto,+ ta addaankami iti piesta ken Jehova.”+ 10  Kinunana kadakuada kalpasanna: “Agbalin koma a kasta, a ni Jehova adda kadakayo inton palubosankayo ken dagiti ubbingyo!+ Kitaenyo, iti kasupadina, dakes a banag ti panggepyo.+ 11  Saan a kasta! Mapankayo, pangngaasiyo, dakayo a nabaneg a lallaki, ket agserbikayo ken Jehova, agsipud ta dayta ti tartarigagayanyo a ragpaten.” Iti kasta napagtalawda iti sanguanan ni Faraon.+ 12  Ni Jehova kinunana ita ken Moises: “Iyunnatmo+ ta imam iti rabaw ti daga ti Egipto maipaay kadagiti dudon, tapno tumpuarda koma iti rabaw ti daga ti Egipto ket ibusenda ti isuamin a mulmula ti daga, isuamin nga intedda ti uraro.”+ 13  Madagdagus nga inyunnat ni Moises ti sarukodna iti rabaw ti daga ti Egipto, ket pinagpuyupoy ni Jehova ti maysa a wayaway nga angin+ iti rabaw ti daga iti intero dayta nga aldaw ken iti intero a rabii. Dimteng ti bigat ket ti wayaway nga angin inyegna dagiti dudon. 14  Ket nangrugi a tumpuar dagiti dudon iti rabaw ti intero a daga ti Egipto ken agtaeng iti intero a teritoria ti Egipto.+ Makaparigatda unay idi.+ Iti kasakbayanda awan pay idi a pulos kastoy a nagparang a duddudon kas kadakuada, ket awanton a pulos ti kastoy nga agparang nga aniaman iti kalpasanda. 15  Ket inabbonganda ti makita a rabaw ti intero a daga,+ ket ti daga simmipnget;+ ket inibusda ti isuamin a mulmula ti daga ken isuamin a bunga dagiti kayo a natedda ti uraro;+ ket awan idi ti natedda a berde kadagiti kayo wenno iti mulmula iti talon iti intero a daga ti Egipto.+ 16  Gapuna sidadaras nga inayaban ni Faraon da Moises ken Aaron ket kinunana: “Nagbasolak maikaniwas ken Jehova a Diosyo ken maikaniwas kadakayo.+ 17  Ket ita pakawanenyo,+ pangngaasiyo, ti basolko iti daytoy maminsan laeng ket agpakaasikayo+ ken Jehova a Diosyo tapno iyadayona koma laeng kaniak daytoy makapapatay a saplit.” 18  Gapuna isu rimmuar a pimmanaw ken Faraon ket nagpakaasi ken Jehova.+ 19  Idin namagbaw-ing ni Jehova iti napigsa unay a pangagdan nga angin, ket impanawna dagiti dudon ket impalaisna ida iti Nalabaga a Baybay. Awan ti natedda a maysa a dudon iti intero a teritoria ti Egipto. 20  Nupay kasta, binay-an ni Jehova a sumubeg ti puso ni Faraon,+ ket saanna a pinalubosan ti annak ti Israel. 21  Ni Jehova kinunana kalpasanna ken Moises: “Iyunnatmo ta imam a maiturong iti langlangit,+ tapno dumteng koma ti kinasipnget iti rabaw ti daga ti Egipto ket ti kinasipnget maarikap koma.” 22  Dagus nga inyunnat ni Moises ti imana a maiturong iti langlangit, ket ti nalidem a kinasipnget nangrugi a dumteng iti intero a daga ti Egipto iti tallo nga aldaw.+ 23  Saanda a nakapagkikinnita, ket awan kadakuada ti timmakder iti mismo a lugarna iti tallo nga aldaw; ngem maipaay iti amin nga annak ti Israel adda idi lawag kadagiti pagnaedanda.+ 24  Kalpasan dayta ni Faraon inayabanna ni Moises ket kinunana: “Mapankayo, agserbikayo ken Jehova.+ Isuna laeng ta mabatinto dagiti karneroyo ken ti bakbakayo. Dagiti ubbingyo mabalinda met ti mapan a maikuyog kadakayo.”+ 25  Ngem kinuna ni Moises: “Sika mangtedkanto met iti im-imami kadagiti sakripisio ken datdaton a mapuoran, yantangay masapul nga idatagmi ida ken Jehova a Diosmi.+ 26  Ket dagiti dinguenmi kumuyogto met kadakami.+ Awanto ti maysa a kuko a mapalubosan nga agtalinaed, agsipud ta dagita ti pangalaanminto iti pagdayawmi ken Jehova a Diosmi,+ ket dakami saanmi nga ammo no ania ti ipaayminto a pagdayaw ken Jehova agingga a makagtengkami sadiay.”+ 27  Gapu itoy binay-an ni Jehova a sumubeg ti puso ni Faraon, ket saan nga immannugot a mamalubos kadakuada.+ 28  Gapuna kinuna kenkuana ni Faraon: “Panawannak!+ Aluadam ta bagim! Dika padpadasen a kitaen manen ti rupak, agsipud ta iti aldaw a panangkitam iti rupak mataykanto.”+ 29  Iti daytoy kinuna ni Moises: “Kasta ti sinaom. Diakto padasenen a kitaen ta rupam uray kaanoman.”+

Footnotes