Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Ester 1:1-22

1  Ita naaramid idi kaaldawan ni Asuero,+ awan sabali, ti Asuero nga agturturay kas ari manipud India agingga iti Etiopia, iti sangagasut duapulo ket pito a masaksakupan a distrito,+  a kadagidi nga aldaw bayat a situtugaw ni Ari Asuero iti naarian a tronona,+ nga adda idiay Susan+ a kastilio,+  iti maikatlo a tawen ti panagturayna isu nangangay iti bangkete+ a maipaay iti amin a piprinsipena ken ad-adipenna, ti puersa militar ti Persia+ ken Media,+ dagiti natan-ok+ ken ti piprinsipe kadagiti masaksakupan a distrito iti sanguananna,+  idi impakitana ti kinabaknang+ ti nadayag a pagarianna ken ti dayaw+ ken ti libnos ti kinanaindaklanna iti adu nga aldaw, sangagasut ket walopulo nga aldaw.  Ket idi dimteng ti pannakaan-anay dagitoy nga aldaw, ti ari nangangay iti maysa a bangkete iti pito nga aldaw maipaay kadagiti amin a tattao a nasarakan idiay Susan a kastilio, maipaay iti dadakkel kasta met iti babassit, iti paraangan ti minuyongan ti palasio ti ari.  Adda idi lienso, napino a kapas ken asul+ a naikapet a siiirut kadagiti tali a napino nga abel, ken delana a natinaan iti lumabaga a purpura+ kadagiti singsing a pirak ken kadagiti adigi a marmol, dagiti sopa+ a balitok ken pirak iti rabaw ti dappat a porfido ken marmol ken perlas ken nangisit a marmol.  Ket adda idi panagyawat iti arak nga inumen kadagiti basehas a balitok;+ ket nagduduma dagiti basehas iti maysa ken maysa, ket ti naarian nga arak+ nakaad-adu unay, sigun iti kabalinan ti ari.  No maipapan iti tiempo ti iyiinum sigun iti linteg, awan ti asinoman a mamilpilit, ta kasta ti inyurnos ti ari maipaay iti tunggal naindaklan a tao iti sangakabbalayanna, nga aramiden sigun iti kayat ti tunggal maysa.  Kasta met, ni met laeng Vasti+ a reyna nangangay iti bangkete a maipaay kadagiti babbai iti naarian a balay a kukua ni Ari Asuero. 10  Iti maikapito nga aldaw, idi a ti puso ti ari agragragsak maigapu iti arak,+ kinunana kada Mehuman, Bizta, Harbona,+ Bigta ken Abagta, Zetar ken Carcas, ti pito nga opisial ti palasio nga agserserbi+ idi iti kinatao ni Ari Asuero, 11  nga iyegda ni Vasti a reyna nga addaan naarian a dalungdong iti sanguanan ti ari, tapno ti kinanaslagna ipakitana kadagiti umili ken kadagiti prinsipe; ta isu napintas idi ti langana.+ 12  Ngem ni Reyna Vasti nagtultuloy a nagkedked+ nga umay sigun iti sao ti ari a naidanon babaen kadagiti opisial ti palasio. Gapu itoy nagrurod ti ari iti kasta unay ket ti mismo a pungtotna simged iti unegna.+ 13  Ket kinuna ti ari kadagiti masirib+ a lallaki nga addaan pannakaammo kadagiti tiempo+ (ta iti kastoy a wagas a dimteng ti banag ti ari iti sanguanan dagidiay amin a nalaing iti linteg ken legal a kaskaso, 14  ket dagidiay kasingedan kenkuana isu da Carsena, Setar, Admata, Tarsis, Meres, Marsena, ken Memucan, pito+ a prinsipe ti Persia ken Media, a makaadani iti ari,+ ken isuda a situtugaw iti umuna a saad iti pagarian): 15  “Sigun iti linteg ania ti maaramid ken Reyna Vasti agsipud ta saanna a tinungpal ti sasao ni Ari Asuero babaen kadagiti opisial ti palasio?” 16  Iti daytoy kinuna ni Memucan+ iti sanguanan ti ari ken dagiti prinsipe: “Saan laeng a maibusor iti ari a ni Vasti a reyna nakaaramid iti dakes,+ no di ket maibusor kadagiti amin a prinsipe ken maibusor kadagiti amin nga ili nga adda kadagiti amin a masaksakupan a distrito ni Ari Asuero. 17  Ta ti aramid ti reyna rummuarto agingga iti amin nga assawa a babbai iti kasta umsiendanto+ dagiti makinkukua+ kadakuada iti bukodda a matmata, inton kunaenda, ‘Ni met laeng Ari Asuero kinunana a maiyeg ni Vasti a reyna iti sanguananna, ket isu saan nga immay.’ 18  Ket dagiti prinsesa ti Persia ken Media, a nakangngeg iti aramid ti reyna, agsaodanto iti daytoy nga aldaw kadagiti amin a prinsipe ti ari, ket addanto adu nga umsi ken rurod.+ 19  No naimbag iti ari,+ rummuar koma ti maysa a naarian a sao manipud kenkuana a mismo, ket maisurat koma kadagiti linteg+ ti Persia ken Media, tapno saan nga aglabas dayta,+ tapno ni Vasti saan a sumrek iti sanguanan ni Ari Asuero; ket ti naarian a dayawna ited koma ti ari iti maysa a kaduana, maysa a babai a nasaysayaat ngem isuna. 20  Ket ti bilin ti ari nga aramidennanto masapul a mangngegan iti intero a pagturayanna (ta nakalawlawa dayta), ket amin dagiti mismo nga assawa a babbai mangipaaydanto iti dayaw+ kadagiti makinkukua kadakuada,+ iti dakkel kasta met iti bassit.” 21  Ket ti banag makaay-ayo idi kadagiti mata ti ari+ ken kadagiti prinsipe, ket ti ari nagaramid maitunos iti sao ni Memucan. 22  Gapuna nangipatulod kadagiti naisurat a dokumento+ kadagiti amin a masaksakupan a distrito ti ari, iti tunggal masaksakupan a distrito+ iti bukodna nga estilo ti panagsurat ken iti tunggal ili iti bukodna a pagsasao, tapno ti tunggal asawa a lalaki agtultuloy nga agakem a kas prinsipe iti bukodna a balay+ ken agsao iti pagsasao ti bukodna nga ili.

Footnotes