Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Esdras 3:1-13

3  Idi dimteng ti maikapito+ a bulan adda idin ti annak ti Israel kadagiti siudadda. Ket nangrugi nga aguurnong dagiti umili a kasla maymaysa+ a tao idiay Jerusalem.+  Ket timmakder ni Jesua+ nga anak ni Jehozadac ken ti kakabsatna a papadi ken ni Zorobabel+ nga anak ni Sealtiel+ ken ti kakabsatna ket imbangonda ti altar ti Dios ti Israel, tapno agidatonda kadagiti mapuoran a sakripisio iti rabaw dayta, maitunos iti adda a naisurat+ iti linteg ni Moises a lalaki ti pudno a Dios.  Gapuna impasdekda a sititibker ti altar iti rabaw ti mismo a pagsaadanna,+ ta dimteng kadakuada ti aliaw gapu kadagiti ili ti dagdaga,+ ket rinugianda ti nagidaton kadagiti mapuoran a sakripisio ken Jehova iti rabaw dayta, dagiti mapuoran a sakripisio iti bigat ken iti rabii.+  Kalpasanna inangayda ti piesta dagiti abong-abong+ maitunos iti adda a naisurat,+ agraman dagiti mapuoran a sakripisio iti inaldaw iti bilang a maitunos iti pagannurotan ti maiparbeng idi iti tunggal aldaw.+  Ket kalpasanna adda ti kankanayon a daton a mapuoran+ ken daydiay maipaay kadagiti baro a bulan+ ken maipaay kadagiti amin a nasantipikar a panawen ti piesta+ ni Jehova ken maipaay iti tunggal maysa a situtulok a nangidaton iti boluntario+ a daton ken Jehova.  Manipuden iti umuna nga aldaw ti maikapito a bulan+ nangrugida a mangidaton kadagiti mapuoran a sakripisio ken Jehova, idi saan pay a naisaad ti pamuon ti mismo a templo ni Jehova.  Ket nangtedda iti kuarta+ kadagiti agtagtaga+ ken kadagiti nasigo a trabahador,+ ken makmakan+ ken inumen ken lana+ kadagiti Sidonio+ ken kadagiti taga Tiro,+ tapno mangyegda iti sedro a kaykayo manipud Libano+ agingga iti baybay idiay Joppe,+ sigun iti pammalubos nga impaay kadakuada ni Ciro+ nga ari ti Persia.  Ket iti maikadua a tawen ti iyaayda iti balay ti pudno a Dios idiay Jerusalem, iti maikadua a bulan,+ ni Zorobabel+ nga anak ni Sealtiel+ ken ni Jesua+ nga anak ni Jehozadac ken ti dadduma pay iti kakabsatda, ti papadi ken dagiti Levita, ken amin dagidiay rimmuar manipud pannakakautibo+ nga agturong idiay Jerusalem nangrugida; ket dagiti Levita+ manipud edad a duapulo a tawen nga agpangato inkabilda ita kadagiti saad tapno agakemda kas manangimaton iti trabaho iti balay ni Jehova.+  Iti kasta ni Jesua,+ ti annakna ken ti kakabsatna, ken ni Cadmiel ken ti annakna, ti annak ti Juda, nagtakderda kas maysa a bunggoy tapno agakemda kas manangimaton kadagiti managaramid iti trabaho iti balay ti pudno a Dios, kasta met ti annak ni Henadad,+ ti annakda ken ti kakabsatda, dagiti Levita. 10  Idi a dagiti managibangon insaadda ti pamuon+ ti templo ni Jehova, idin ti papadi a sikakawes iti opisial a pagan-anay,+ nga addaan kadagiti trumpeta,+ ken dagiti Levita nga annak ni Asaf,+ nga addaan kadagiti piangpiang,+ timmakderda tapno idaydayawda ni Jehova maitunos iti panangiwanwan+ ni David nga ari ti Israel. 11  Ket rinugianda ti sumungbat babaen iti panangidaydayaw+ ken panagyaman ken Jehova, “ta isu naimbag,+ ta ti naayat a kinamanangngaasina maipaay iti Israel ket agingga iti tiempo a di nakedngan.”+ No maipapan kadagiti amin nga umili, nagpukkawda buyogen ti natbag a dir-i+ iti panangidaydayaw ken Jehova gapu iti pannakaisaad ti pamuon ti balay ni Jehova. 12  Ket adu iti papadi+ ken kadagiti Levita ken kadagiti pannakaulo iti balbalay ti amma,+ dagiti lallakay a nakakita iti daydi immun-una a balay,+ nagsangsangitda+ buyogen ti natbag a timek iti pannakaisaad ti pamuon+ daytoy a balay iti imatangda, bayat a ti adu a sabsabali pay ipigpigsada idi ti timek iti panagdir-i gapu iti rag-o.+ 13  Gapuna saan a napaglasin dagiti umili ti uni ti dir-i ti panagrag-o+ manipud uni ti panagsangit dagiti umili, ta agpukpukkaw idi dagiti umili buyogen ti natbag a dir-i, ket ti met laeng uni nangngeg uray pay agingga iti adayo unay.

Footnotes