Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Esdras 10:1-44

10  Ita apaman a nakapagkararag ni Esdras+ ken nakapagpudno+ bayat nga agsangsangit ken sikukul-ob+ iti sanguanan ti balay+ ti pudno a Dios, dagiti kameng ti Israel naguummongda a sangsangkamaysa kenkuana, maysa a dakkel unay a kongregasion, lallaki ken babbai ken ubbing, ta dagiti umili nagsangitda iti napalalo.  Idin ni Secanias nga anak ni Jehiel+ iti annak ni Elam+ simmungbat ket kinunana ken Esdras: “Dakami—nagtignaykami a di simamatalek maibusor iti Diostayo, iti kasta nangtedkami iti pagnaedan iti ganggannaet nga assawa a babbai manipud kadagiti ili ti daga.+ Kaskasdi nga ita adda namnama+ maipaay iti Israel maipapan iti daytoy.  Ket ita mamatalgedtayo iti tulag+ iti Diostayo a pagtalawentayo+ ti amin nga assawa a babbai ken dagidiay nayanak manipud kadakuada maitunos iti pammatigmaan ni Jehova ken dagidiay agpigpigerger+ iti bilin+ ti Diostayo, tapno maaramid koma dayta maitunos iti linteg.+  Tumakderka, ta ti banag maipabiang kenka, ket addakami kenka. Bumilegka ken agtignayka.”  Iti kasta timmakder ni Esdras ket pinagsapatana+ dagiti panguluen ti papadi, dagiti Levita ken ti intero nga Israel nga aramidenda ti maitunos iti daytoy a sao. Gapuna nagsapatada.  Timmakder ita ni Esdras manipud sanguanan ti balay ti pudno a Dios ket napan iti panganan a siled+ ni Jehohanan nga anak ni Eliasib. Nupay napan sadiay, saan a nangan iti tinapay+ ken saan nga imminum iti danum, ta pagledleddaanganna+ idi ti di kinamatalek dagiti naidestiero nga umili.  Idin nagpaiwaragawagda iti maysa nga awag iti intero a Juda ken Jerusalem maipaay kadagiti amin a sigud a destiero+ tapno aguummongda a sangsangkamaysa idiay Jerusalem;  ket ti asinoman a saan nga immay+ iti las-ud ti tallo nga aldaw sigun iti pammatigmaan dagiti prinsipe+ ken dagiti lallakay—amin dagiti sanikuana maipasidong iti pannakaiparit+ ket isu maisina+ iti kongregasion dagiti naidestiero nga umili.  Gapuna amin dagiti lallaki ti Juda ken Benjamin naguummongda a sangsangkamaysa idiay Jerusalem iti uneg ti tallo nga aldaw, a dayta ket, iti maikasiam+ a bulan iti maikaduapulo nga aldaw ti bulan, ket amin dagiti umili nagtalinaedda a situtugaw iti nalayang a lugar ti balay ti pudno a Dios, nga agtigtigergerda gapu iti dayta a banag ken maigapu kadagiti dumayasadas a tudo.+ 10  Idi agangay timmakder ni Esdras a padi ket kinunana kadakuada: “Dakayo nagtignaykayo a di simamatalek ta nangtedkayo iti pagnaedan iti ganggannaet nga assawa a babbai+ tapno nayonanyo ti panagbasol ti Israel.+ 11  Ket ita agpudnokayo+ ken Jehova a Dios dagidi ammayo ket aramidenyo ti pakaragsakanna+ ket isinayo ti bagbagiyo manipud kadagiti ili ti daga ken manipud iti ganggannaet nga assawa a babbai.”+ 12  Iti daytoy simmungbat ti intero a kongregasion ket kinunada buyogen ti natbag a timek: “Apagpag-isu maitunos iti saom maipabiang dayta kadakami nga aramiden.+ 13  Nupay kasta, dagiti umili aduda, ket panawen dagiti dumayasadas a tudo, ket saan a mabalin ti agtakder iti ruar; ket ti aramid saannanto nga alaen ti maymaysa nga aldaw wenno dua, ta nagrebeldekami iti kasta unay iti daytoy a banag. 14  Gapuna, pangngaasim, dagiti prinsipetayo+ agtignayda koma kas pannakabagi maipaay iti intero a kongregasion; ken, no maipapan iti isuamin nga adda kadagiti siudadtayo a nangted iti pagnaedan iti ganggannaet nga assawa a babbai, umayda koma kadagiti tiempo a naituding ken maikuyog kadakuada dagiti lallakay iti tumunggal siudad ken dagiti ukomna, agingga a mapagbaw-ingtayo ti sumsumged nga unget ti Diostayo manipud kadatayo, maigapu itoy a banag.” 15  (Nupay kasta, da met laeng Jonatan nga anak ni Asael ken Jazias nga anak ni Ticva timmakderda a maibusor+ iti daytoy, ket da Mesullam ken Sabetai+ a Levita isuda dagidiay nangtulong kadakuada.) 16  Ket dagiti sigud a destiero+ inaramidda ti kasta a wagas; ket ni Esdras a padi ken dagiti lallaki a pannakaulo dagiti amma maipaay iti balay dagiti ammada,+ isuda amin a mismo sigun ti nagnaganda, insinada ita ti bagbagida ket rinugianda ti nagtugaw iti umuna nga aldaw ti maikasangapulo a bulan+ tapno palutpotenda ti banag;+ 17  ket in-inut a nalpasda kadagiti amin a lallaki a nangted iti pagnaedan iti ganggannaet+ nga assawa a babbai iti umuna nga aldaw ti umuna a bulan. 18  Ket ti sumagmamano iti annak ti papadi+ nasarakan a nangted iti pagnaedan iti ganggannaet nga assawa a babbai; iti annak ni Jesua+ nga anak ni Jehozadac+ ken iti kakabsatna, da Maasias ken Eliezer ken Jarib ken Gedalias. 19  Ngem inkarida babaen iti pannakialamano a pagtalawenda ti assawada, ket, yantangay nakabasolda,+ rebbeng nga adda ti maysa a kalakian a karnero+ iti arban maipaay iti panagbasolda. 20  Ket iti annak ni Immer+ adda idi da Hanani ken Zebadias; 21  ket iti annak ni Harim,+ da Maasias ken Elias ken Semaias ken Jehiel ken Ozias; 22  ket iti annak ni Pasur,+ da Elioenai, Maasias, Ismael, Netanel, Jozabad ken Eleasa. 23  Ket kadagiti Levita, da Jozabad ken Simei ken Quelaias (a dayta ket, ni Quelita), Petaias, Juda ken Eliezer; 24  ket kadagiti kumakanta, ni Eliasib; ket kadagiti agay-aywan iti ruangan, da Sallum ken Telem ken Uri. 25  Ket iti Israel, iti annak ni Paros+ adda idi da Ramias ken Izzias ken Malkias ken Mijamin ken Eleazar ken Malkias ken Benaias; 26  ket iti annak ni Elam,+ da Matanias, Zacarias ken Jehiel+ ken Abdi ken Jeremot ken Elias; 27  ket iti annak ni Zattu,+ da Elioenai, Eliasib, Matanias ken Jeremot ken Zabad ken Aziza; 28  ket iti annak ni Bebai,+ da Jehohanan, Hananias, Zabbai, Atlai; 29  ket iti annak ni Bani, da Mesullam, Malluc, Adaia, Jasub ken Seal ken Jeremot; 30  ket iti annak ni Pahat-moab,+ da Adna ken Kelal, Benaias, Maasias, Matanias, Bezalel ken Binui ken Manases; 31  ket iti annak ni Harim,+ da Eliezer, Issias, Malkias,+ Semaias, Shimeon, 32  Benjamin, Malluc ken Semarias; 33  iti annak ni Hasum,+ da Matenai, Matatta, Zabad, Elifelet, Jeremai, Manases ken Simei; 34  iti annak ni Bani, da Maadai, Amram ken Uel, 35  Benaias, Bedias, Keluhi, 36  Vanias, Meremot, Eliasib, 37  Matanias, Matenai ken Jaasu; 38  ket iti annak ni Binui, da Simei 39  ken Selemias ken Natan ken Adaia, 40  Macnadebai, Sasai, Sarai, 41  Azarel ken Selemias, Semarias, 42  Sallum, Amarias, Jose; 43  iti annak ni Nebo, da Jeiel, Matitias, Zabad, Zebina, Jaddai ken Joel ken Benaias. 44  Dagitoy amin immawatda iti ganggannaet nga assawa a babbai,+ ket pinagtalawda dagiti assawa agraman annak.

Footnotes