Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Efeso 2:1-22

2  Kanayonanna pay, dakayo [ti pinagbiag ti Dios] nupay nataykayo kadagiti labsing ken basbasolyo,+  a nagnaanyo idi naminsan maitunos iti sistema+ ti bambanag daytoy a lubong, maitunos iti agturay+ iti autoridad ti angin, ti espiritu+ nga agtigtignay ita iti annak ti kinasukir.+  Wen, iti tengngada datayo amin idi naminsan nagbibiagtayo maitunos kadagiti derrep ti lasagtayo,+ nga ar-aramidentayo ti bambanag a nagayatan ti lasag+ ken ti pampanunot, ket nainkasigudan nga annaknatayo ti pungtot+ a kas kadagiti dadduma.  Ngem ti Dios, a nabaknang iti asi,+ gapu iti naindaklan nga ayat a pinangayatna kadatayo,+  pinagbiagnatayo a maikanunong ken Kristo, uray pay idi nataytayo kadagiti labsing+—babaen ti di kaikarian a kinamanangngaasi naisalakankayo+  ket imbangonnatayo+ a sangsangkamaysa ken pinagtugawnatayo a sangsangkamaysa kadagiti nailangitan a disso+ a maikaykaysa ken Kristo Jesus,  tapno kadagiti mapasungad+ a sistema ti bambanag maiparangarang koma ti manglab-aw a kinabaknang+ ti di kaikarian a kinamanangngaasina iti kinamanagparaburna kadatayo a maikaykaysa+ ken Kristo Jesus.  Babaen itoy a di kaikarian a kinamanangngaasi, kinapudnona, naisalakankayo babaen ti pammati;+ ket daytoy saan a maigapu kadakayo,+ dayta ket sagut ti Dios.+  Saan, dayta ket saan a maigapu iti ar-aramid,+ tapno awan ti tao a maaddaan iti pangibatayan iti panagpasindayag.+ 10  Ta bunganatayo ti aramidna+ ken naparsuatayo+ a maikaykaysa+ ken Kristo Jesus a maipaay iti naimbag nga ar-aramid,+ a nasaksakbay nga insagana+ ti Dios tapno magnatayo kadakuada. 11  Gapuna itultuloyyo a laglagipen a sigudkayo a tattao iti nasnasion no maipapan iti lasag;+ “di pannakakugit” ti inyawag kadakayo daydiay naawagan “pannakakugit” a naaramid iti lasag babaen kadagiti ima+ 12  nga iti dayta a mismo a tiempo awanankayo iti Kristo,+ naisina+ iti estado ti Israel ken ganggannaet kadagiti tulag ti kari,+ ket awan ti namnamayo+ ken iti lubong awanankayo iti Dios.+ 13  Ngem ita iti pannakikaykaysa ken Kristo Jesus dakayo nga adayo idi naminsan nayasidegkayo babaen ti dara+ ti Kristo. 14  Ta isu ti kappiatayo,+ daydiay namagkaykaysa+ iti dua a dasig+ ken nangdadael iti pader+ nga adda iti nagbaetan a namaglasin+ kadakuada. 15  Babaen ti lasagna+ pinagpatinggana ti guranggura,+ ti Linteg dagiti bilin a buklen dagiti pammilin,+ tapno maparsuana ti dua nga ili+ a maikaykaysa kenkuana iti maymaysa a baro a tao+ ken mamagkappia; 16  ken tapno naan-anay a maikappiana+ dagitoy dua nga ili iti maymaysa a bagi+ iti Dios babaen ti kayo a pagtutuokan,+ agsipud ta pinukawna ti guranggura+ babaen ti bagina. 17  Ket immay ken indeklarana ti naimbag a damag ti kappia+ kadakayo, dagiti adda iti adayo, ken kappia kadagidiay adda iti asideg,+ 18  agsipud ta baeten kenkuana datayo, a dua nga ili,+ addaantayo ti iyaadani+ iti Ama babaen ti maymaysa nga espiritu.+ 19  Kinapudnona, ngarud, saankayon a sangsangaili+ ken ganggannaet nga agnanaed,+ no di ket kailian+ dagiti sasanto+ ken kamkameng ti sangakabbalayan+ ti Dios, 20  ket naibangonkayo iti rabaw ti pamuon+ dagiti apostol+ ken dagiti mammadto,+ bayat a ni Kristo Jesus a mismo ti pamuon a bato a pasuli.+ 21  Iti pannakaikaykaysa kenkuana, ti intero a patakder, a natunos ti pannakasangalna,+ ket rumangrang-ay nga agbalin a nasantuan a templo maipaay ken Jehova.+ 22  Iti pannakaikaykaysa kenkuana,+ mabangbangonkayo met a sangsangkamaysa nga agbalin a disso a pagnaedan ti Dios babaen ti espiritu.+

Footnotes