Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Deuteronomio 5:1-33

5  Ket inayaban ni Moises ti intero nga Israel+ ket kinunana kadakuada: “Denggem, O Israel, dagiti alagaden ken dagiti hudisial a pangngeddeng+ a sasawek kadagiti lapayagyo ita nga aldaw, ket masapul a sursuruenyo ida ken annadanyo nga aramiden ida.+  Ni Jehova a Diostayo namatalged iti tulag kadatayo idiay Horeb.+  Saan a kadagidi ammatayo a pinatalgedan ni Jehova daytoy a tulag, no di ket kadatayo, amin dagidiay sibibiag kadatayo ditoy ita nga aldaw.  Rupanrupa a nakisao kadakayo ni Jehova iti bantay manipud tengnga ti apuy.+  Sitatakderak idi iti nagbaetan ni Jehova ken dakayo iti daydi met laeng a tiempo+ tapno ibagak kadakayo ti sao ni Jehova, (ta nagbutengkayo gapu iti apuy ket saankayo a simmang-at iti bantay,)+ a kunkunana,  “‘Siak ni Jehova a Diosmo,+ a nangiruar kenka manipud daga ti Egipto, manipud balay dagiti adipen.+  Dika pulos maaddaan iti aniaman a sabali a didios maibusor iti rupak.+  “‘Dika mangaramid maipaay kenka iti kinitikitan a ladawan,+ aniaman a porma+ a kaasping ti aniaman a banag nga adda iti langlangit sadi ngato wenno adda iti daga ditoy baba wenno adda iti dandanum iti uneg ti daga.  Dika agruknoy kadakuada wenno maiturong nga agserbi kadakuada,+ agsipud ta siak ni Jehova a Diosmo maysaak a Dios a mangalkalikagum iti naipamaysa a debosion,+ a gapu iti biddut ti amma mangyeg iti pannusa iti annak ken iti maikatlo a kaputotan ken iti maikapat a kaputotan, no maipapan kadagidiay manggura kaniak;+ 10  ngem mangwatwatwat iti naayat a kinamanangngaasi maipaay iti maikasangaribu a kaputotan no kadagidiay agayat kaniak ken mangsalimetmet kadagiti bilinko.+ 11  “‘Dika aramaten ti nagan ni Jehova a Diosmo iti awan patpategna a pamay-an,+ ta ni Jehova saannanto a bay-an a di nadusa ti asinoman a mangaramat iti naganna iti awan patpategna a pamay-an.+ 12  “‘Iti panangsalimetmet iti aldaw ti sabbath tapno ibilang a sagrado, kas iti imbilin kenka ni Jehova a Diosmo,+ 13  agserbika ket masapul nga aramidem ti isuamin a trabahom iti innem nga aldaw.+ 14  Ngem ti maikapito nga aldaw ket maysa a sabbath ken Jehova a Diosmo.+ Dika aramiden ti aniaman a trabaho,+ sika wenno uray ti anakmo a lalaki wenno uray ti anakmo a babai wenno uray ti adipenmo a lalaki wenno uray ti adipenmo a babai wenno uray ti torom wenno uray ti asnom wenno uray ti aniaman a naamo nga animalmo wenno uray ti ganggannaet nga agnanaed kenka nga adda iti uneg dagiti ruanganmo,+ tapno ti adipenmo a lalaki ken ti adipenmo a babai makapaginanada a kas met laeng kenka.+ 15  Ket masapul a laglagipem a nagbalinka nga adipen iti daga ti Egipto+ ket inruarnaka ni Jehova a Diosmo manipud sadiay babaen ti napigsa nga ima ken siuunnat a takiag.+ Dayta ti makagapu nga imbilin kenka ni Jehova a Diosmo a ngilinem ti aldaw ti sabbath.+ 16  “‘Dayawem ni amam ken ni inam,+ kas iti imbilin kenka ni Jehova a Diosmo; tapno agbayag dagiti aldawmo ken naimbag ti lak-ammo+ iti daga nga ited kenka ni Jehova a Diosmo. 17  “‘Dika mamapatay.+ 18  “‘Dika met makikamalala.+ 19  “‘Dika met agtakaw.+ 20  “‘Dika met mangpaneknek iti kinaulbod maibusor iti padam a tao.+ 21  “‘Dika met tarigagayan ti asawa a babai ti padam a tao.+ Dika met siaagum a garteman ti balay ti padam a tao, ti talonna wenno ti adipenna a lalaki wenno ti adipenna a babai, ti torona wenno ti asnona wenno ti aniaman a banag a kukua ti padam a tao.’+ 22  “Dagitoy a Sasao sinao ni Jehova iti intero a kongregasionyo iti bantay manipud tengnga ti apuy,+ ti ulep ken ti napuskol a daguyemyem, buyogen ti natbag a timek, ket awan innayonna; a kalpasan dayta insuratna ida iti rabaw ti dua a tapi a bato ket intedna ida kaniak.+ 23  “Ket naaramid nga apaman a nangngegyo ti timek manipud tengnga ti sipnget, bayat a ti bantay sumsumged iti apuy,+ immasidegkayo kaniak, amin a pannakaulo dagiti tribuyo ken dagiti lallakayyo. 24  Kalpasanna kinunayo, ‘Adtoy impakita kadakami ni Jehova a Diostayo ti dayagna ken ti kinanaindaklanna, ket nangngegmi ti timekna manipud tengnga ti apuy.+ Itoy nga aldaw nakitami a ti Dios mabalinna ti makisao iti tao ket pudno a makapagtalinaed a sibibiag.+ 25  Ket ita apay koma a mataykami, ta daytoy dakkel nga apuy mabalin nga ibusennakami?+ No mangngegmi pay manen ti timek ni Jehova a Diostayo, sigurado met a mataykami.+ 26  Ta siasino iti isuamin a lasag ti nakangngeg iti timek ti sibibiag a Dios+ nga agsasao manipud tengnga ti apuy a kas kadakami idi ket kaskasdi nga agtultuloy a sibibiag? 27  Sika umasidegka ket denggem ti isuamin a sawento ni Jehova a Diostayo; ket sika ti mangisaonto kadakami iti isuamin a sawen kenka ni Jehova a Diostayo,+ ket pudno unay nga imdengan ken aramidenminto.’ 28  “Gapuna nangngeg ni Jehova ti timek ti sasaoyo idi nagsaokayo kaniak, ket kinuna kaniak ni Jehova, ‘Nangngegko ti timek ti sasao daytoy nga ili, a sinaoda kenka. Naimbag ti inaramidda iti isuamin a sinaoda.+ 29  No koma laeng patanorenda nga agbuteng kaniak daytoy a pusoda+ ken mangsalimetmet a kanayon iti amin a bilbilinko,+ tapno naimbag ti lak-amda ken ti annakda agingga iti tiempo a di nakedngan!+ 30  Mapanmo sawen kadakuada: “Agawidkayo kadagiti toldayo.” 31  Ket makipagtalinaedka kaniak ditoy, ket bay-am a sawek kenka ti isuamin a bilin ken dagiti alagaden ken dagiti hudisial a pangngeddeng a rebbeng nga isurom kadakuada+ ken masapul nga aramidenda iti daga nga itedko kadakuada a tagikuaenda.’ 32  Ket masapul nga annadanyo nga aramiden ti kas iti imbilin kadakayo ni Jehova a Diosyo.+ Dikay agbaw-ing iti makannawan wenno iti makannigid.+ 33  Iti isuamin a dalan nga imbilin kadakayo ni Jehova a Diosyo, rebbeng a magnakayo,+ tapno agbiagkayo ken naimbag ti lak-amyo+ ken pudno a mapaatiddogyo ti al-aldawyo iti daga a tagikuaenyonto.

Footnotes