Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Deuteronomio 31:1-30

31  Kalpasanna napan ni Moises ket sinaona dagitoy a sasao iti intero nga Israel  ket kinunana kadakuada: “Sangagasut ket duapulo ti tawenko ita nga aldaw.+ Saanakon a mapalubosan a rummuar ken sumrek,+ kas iti kinuna kaniak ni Jehova, ‘Saanmonto a ballasiwen daytoy a Jordan.’+  Ni Jehova a Diosmo ti bumallasiw iti sangom.+ Isu talipuposennanto dagitoy a nasion manipud iti sanguanam, ket pagtalawemto ida.+ Ni Josue ti bumallasiw iti sangom,+ kas iti sinao ni Jehova.  Ket sigurado nga aramidento kadakuada ni Jehova kas iti inaramidna ken Sihon+ ken Og,+ ti ar-ari dagiti Amoreo, ken iti dagada, idi tinalipuposna ida.+  Ket binaybay-an ida kadakayo ni Jehova,+ ket masapul nga aramidenyo kadakuada ti maitunos iti isuamin a bilin nga imbilinko kadakayo.+  Bumilegkayo ken pumigsakayo.+ Dika agbuteng wenno mapakigtotan iti sangoda,+ ta ni Jehova a Diosmo ti makipagmarmartsa kenka. Saannakanto a baybay-an wenno panawan a naan-anay.”+  Ket ni Moises inayabanna ni Josue ket kinunana kenkuana iti imatang ti intero nga Israel: “Bumilegka ken pumigsaka,+ agsipud ta sika—ipanmonto daytoy nga ili iti daga nga insapata ni Jehova kadagidi ammada nga ited kadakuada, ket sika itedmonto kadakuada a kas tawid.+  Ket ni Jehova ti agmartsa iti sangom. Isu agtultuloyto a kaduam.+ Saannakanto a baybay-an wenno panawan a naan-anay. Dika agbuteng wenno agkullayaw.”+  Kalpasanna insurat ni Moises daytoy a linteg+ ket intedna iti papadi nga annak ni Levi,+ dagiti agaw-awit iti lakasa ti tulag ni Jehova,+ ken iti amin a lallakay ti Israel. 10  Ket binilin ida ni Moises, a kunkunana: “Iti ngudo ti tunggal pito a tawen, iti naituding a tiempo ti tawen ti panangluk-at,+ iti piesta dagiti abong-abong,+ 11  inton ti intero nga Israel umay kumita iti rupa ni Jehova+ a Diosmo iti disso a piliennanto,+ basaemto daytoy a linteg iti sango ti intero nga Israel iti pagdengngegda.+ 12  Ummongem dagiti umili,+ ti lallaki ken ti babbai ken dagidiay ubbing ken ti ganggannaet nga adda iti uneg dagiti ruanganmo, tapno makapagimdengda ken tapno makasursuroda,+ yantangay masapul nga agbutengda ken Jehova a Diosyo+ ken annadanda nga itungpal ti amin a sasao daytoy a linteg. 13  Ket ti annakda a saan a nakaammo rebbeng nga umimdengda,+ ket masapul a masursuroda ti agbuteng ken Jehova a Diosyo iti amin nga al-aldaw a panagbiagyo iti daga a bumallasiwanyo iti Jordan tapno tagikuaenyo.”+ 14  Kalpasan dayta ni Jehova kinunana ken Moises: “Adtoy! Immasidegen ti aldaw ti ipapataymo.+ Ayabam ni Josue, ket agsaadkayo iti tolda ti gimong, tapno isu maparebbengak.”+ Gapuna napan da Moises ken Josue ket nagsaadda iti tolda ti gimong.+ 15  Idin nagparang ni Jehova idiay tolda iti munmon nga ulep, ket ti munmon nga ulep nangrugi nga agtakder iti sibay ti pagserkan ti tolda.+ 16  Ni Jehova kinunana ita ken Moises: “Adtoy! Makikaiddaka kadagidi ammam;+ ket sigurado a tumakderto daytoy nga ili+ ket maaddaan iti imoral a pannakidenna iti ganggannaet a didios ti daga a papananda,+ iti mismo a tengngada, ket sigurado a baybay-andakto+ ken rakrakenda ti tulagko a pinatalgedak kadakuada.+ 17  Iti kasta pudno a gumil-ayabto ti ungetko maibusor kadakuada iti dayta nga aldaw,+ ket sigurado a baybay-ak ida+ ken ilemmengko ti rupak manipud kadakuada,+ ket agbalindanto a maysa a banag a maibus; ket dumtengto kadakuada ti adu a didigra ken rigrigat,+ ket siguradonto a kunaenda iti dayta nga aldaw, ‘Saan aya a gapu ta awan iti tengngatayo ti Diostayo isu a dimteng kadatayo dagitoy a didigra?’+ 18  No maipapan kaniak, naan-anay nga ilemmengkonto ti rupak iti dayta nga aldaw gapu iti isuamin a kinadakes nga inaramidda, agsipud ta bimmaw-ingda iti sabali a didios.+ 19  “Ket ita isuratyo maipaay kadakayo daytoy a kanta+ ket isurom iti annak ti Israel.+ Ikabilmo kadagiti ngiwatda tapno agserbi daytoy a kanta a kas saksik maibusor iti annak ti Israel.+ 20  Ta ipankonto ida iti daga nga insapatak kadagidi ammada,+ a pagay-ayusan ti gatas ken diro,+ ket sigurado a mangandanto+ ket mapnekda ken lumukmegda+ ket bumaw-ingda iti sabali a didios,+ ket pudno nga agserbidanto kadakuada ket saandak a raemen ket rakrakenda ti tulagko.+ 21  Ket mapasamakto a no dumteng kadakuada ti adu a didigra ken rigat,+ daytoy a kanta sumungbatto met iti sangoda a kas maysa a saksi, agsipud ta rebbeng a saan a malipatan manipud ngiwat ti putotda, ta pagaammok unay ti pagannayasanda+ a patpatanorenda ita nga aldaw sakbay nga ipanko ida iti daga a maipapan iti dayta nagsapataak.” 22  Gapuna insurat ni Moises daytoy a kanta iti dayta nga aldaw, tapno maisurona iti annak ti Israel.+ 23  Ket pinarebbenganna ni Josue nga anak ni Nun+ ket kinunana: “Bumilegka ken pumigsaka,+ agsipud ta sika—ipanmonto ti annak ti Israel iti daga a maipapan iti dayta nagsapataak kadakuada,+ ket siak agtultuloyakto a kaduam.” 24  Ket naaramid nga apaman a nalpas nga insurat ni Moises ti sasao daytoy a linteg iti maysa a libro agingga iti pannakairingpasda,+ 25  rinugian ni Moises a bilinen dagiti Levita, dagiti agaw-awit iti lakasa ti tulag ni Jehova,+ a kunkunana: 26  “Iti panangalayo iti daytoy a libro ti linteg,+ masapul nga ikabilyo iti sikigan ti lakasa+ ti tulag ni Jehova a Diosyo, ket agserbinto a kas saksi sadiay maibusor kenka.+ 27  Ta siak—pagaammok unay ti kinarebeliosom+ ken ti kinatangken ti lengngesmo.+ No bayat a sibibiagak pay laeng a kaduayo ita nga aldaw, nagbalinkayon a rebelioso iti panagtigtignay ken Jehova,+ ngarud anian nga ad-adda pay a kasta kalpasan ti ipapatayko! 28  Ummongem kaniak ti amin a lallakay dagiti tribuyo ken dagiti opisialyo,+ ket sawek iti pagdengngegda dagitoy a sasao, ket aramatek ti langlangit ken ti daga kas saksi maibusor kadakuada.+ 29  Ta pagaammok unay a kalpasan ti ipapatayko di bumurong nga agtignaykayto iti makadadael,+ ket sigurado a sumiasikayto iti dalan a maipapan iti dayta binilinkayo; ket siguradonto a mapagteng kadakayo ti didigra+ iti panagpatingga ti al-aldaw, agsipud ta aramidenyonto ti dakes kadagiti mata ni Jehova tapno pagrurodenyo babaen ti ar-aramid dagiti imayo.”+ 30  Ket sinao ni Moises iti pagdengngeg ti intero a kongregasion ti Israel ti sasao daytoy a kanta agingga iti pannakairingpasda:+

Footnotes