Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Deuteronomio 3:1-29

3  “Kalpasanna nagbaw-ingtayo ket simmang-attayo a dumalan iti Basan. Gapu itoy rimmuar ni Og+ nga ari ti Basan, isu ken amin a tattaona, a sumabet kadatayo iti bakal idiay Edrei.+  Gapuna kinuna kaniak ni Jehova, ‘Dika agbuteng kenkuana,+ ta sigurado nga isu ken ti amin a tattaona ken ti dagana iyawatkonto ita imam; ket masapul nga aramidem kenkuana kas iti inaramidmo ken Sihon+ nga ari dagiti Amoreo, nga agnanaed idi idiay Hesbon.’  Iti kasta inyawat met ni Jehova a Diostayo iti imatayo ni Og nga ari ti Basan ken ti amin a tattaona, ket kinabiltayo agingga nga awananen iti natda a nakalasat.+  Ket kinautibotayo dagiti amin a siudadna iti daydi met laeng a tiempo. Awan ti ili a saantayo a naala kadakuada, innem a pulo a siudad,+ intero a rehion ti Argob,+ ti pagarian ni Og idiay Basan.+  Amin dagitoy ket siudad a nasarikedkedan iti nangato a pader, ridridaw ken balunet, malaksid iti adu unay nga il-ili iti away.  Nupay kasta, impaaytayo ida iti pannakadadael,+ kas iti inaramidtayo ken Sihon nga ari ti Hesbon, iti panangipaaytayo ti tunggal siudad iti pannakadadael, lallaki, babbai ken babassit nga ubbing.+  Ket amin dagiti naamo nga animal ken ti ginam-ud dagiti siudad innalatayo a kas samsam maipaay iti bagbagitayo.+  “Ket iti daydi met laeng a tiempo innalatayo ti daga iti ima ti dua nga ari dagiti Amoreo+ nga adda iti rehion ti Jordan, manipud naapres a ginget ti Arnon+ agingga iti Bantay Hermon;+  (ti Hermon aw-awagan idi dagiti Sidonio iti Sirion,+ ket aw-awagan idi dagiti Amoreo iti Senir,)+ 10  amin a siudad ti tanap ken ti intero a Galaad ken ti intero a Basan agingga idiay Saleca+ ken Edrei,+ dagiti siudad ti pagarian ni Og idiay Basan. 11  Ta ni laeng Og nga ari ti Basan ti nabati iti natedda iti Refaim.+ Adtoy! Ti andasna ket andas a landok. Saan aya nga adda dayta iti Rabba+ ti annak ni Ammon? Siam a kasiko ti kaatiddogna, ket uppat a kasiko ti kaakabana, ti kasiko ti maysa a lalaki. 12  Ket tinagikuatayo daytoy a daga iti daydi met laeng a tiempo; manipud Aroer,+ nga adda iti sibay ti naapres a ginget ti Arnon, ken kagudua ti nakabambantay a rehion ti Galaad, ket dagiti siudadna intedko kadagiti Rubenita ken kadagiti Gadita.+ 13  Ket ti natedda iti Galaad+ ken ti intero a Basan+ ti pagarian ni Og intedko iti kagudua a tribu ni Manases. Ti intero a rehion ti Argob+ ti intero a Basan, saan aya a naawagan daga ti Refaim?+ 14  “Ni Jair+ nga anak ni Manases innalana ti intero a rehion ti Argob+ agingga iti beddeng dagiti Gesurita+ ken dagiti Maacatita,+ ket pinanagananna dagidiay a purok ti Basan iti bukodna a nagan, Havot-jair,+ agingga itoy nga aldaw. 15  Ket intedko ken Maquir+ ti Galaad.+ 16  Ket kadagiti Rubenita+ ken kadagiti Gadita intedko manipud Galaad+ agingga iti naapres a ginget ti Arnon, a ti tengnga ti naapres a ginget maysa a beddeng, ken agingga idiay Jaboc, ti naapres a ginget nga isu ti beddeng ti annak ni Ammon;+ 17  ken ti Araba ken ti Jordan ken ti ketegan, manipud Kinneret+ agingga iti baybay ti Araba, ti Asin a Baybay,+ iti arisadsad dagiti darisdis ti Pisga+ nga agpaleleggakan ti init. 18  “Gapuna binilinkayo iti daydi met laeng a tiempo, a kinunak, ‘Ni Jehova a Diosyo intedna kadakayo daytoy a daga tapno tagikuaenyo. Bumallasiwkayto, a nakabalan, iti sango ti kakabsatyo, ti annak ti Israel, dagiti amin a maingel a lallaki.+ 19  Dagiti laeng assawayo ken ubbingyo ken dinguenyo (pagaammok unay nga aduankayo iti dinguen) ti agtultuloyto nga agnaed kadagiti siudadyo nga intedko kadakayo,+ 20  agingga nga ipaayan ni Jehova iti inana ti kakabsatyo, kasta met kadakayo, ken natagikuada metten ti daga nga ited kadakuada ni Jehova a Diosyo iti ballasiw ti Jordan; a kalpasan dayta agsublikayto, tunggal maysa iti pannakasanikuana nga intedko kadakayo.’+ 21  “Ket binilinko ni Josue+ iti daydi met laeng a tiempo, a kinunak, ‘Makitkita dagiti matam ti isuamin nga inaramid ni Jehova a Diosyo kadagitoy dua nga ari. Kasta met laeng ti aramidento ni Jehova kadagiti amin a pagarian a bumallasiwam sadiay.+ 22  Dikay agbuteng kadakuada, ta ni Jehova a Diosyo isu Daydiay makirupak maipaay kadakayo.’+ 23  “Ket nangipakaasiak iti parabur manipud ken Jehova iti daydi met laeng a tiempo, a kinunak, 24  ‘O Soberano nga Apo Jehova, sika rinugiam nga ipakita iti adipenmo ti kinanaindaklanmo+ ken ti napigsa a takiagmo,+ ta asino a dios iti langlangit wenno iti daga ti makaaramid kadagiti aramid a kas iti ar-aramidmo ken kadagiti mannakabalin a gapuanan a kas iti gapuanam?+ 25  Palubosannak a bumallasiw, pangngaasim, ket kitaek ti nasayaat a daga+ nga adda iti ballasiw ti Jordan, daytoy nasayaat a nakabambantay a rehion+ ken ti Libano.’+ 26  Ket nagtultuloy a sirurungsot ni Jehova maibusor kaniak maigapu kadakayo+ ket saannak nga inimdengan; no di ket kinuna kaniak ni Jehova, ‘Umanayen dayta kenka! Saankan a pulos agsao pay kaniak maipapan itoy a banag. 27  Sumang-atka iti tapaw ti Pisga+ ket itannawagmo dagita matam iti laud ken amianan ken abagatan ken daya ket kitaem kadagita matam, ta saanmonto a ballasiwen daytoy a Jordan.+ 28  Ket parebbengam+ ni Josue ken paregtaem ken papigsaem, agsipud ta isu ti bumallasiw+ iti sanguanan daytoy nga ili ken isu ti mamagtawid kadakuada iti daga a makitamto.’+ 29  Bayat amin daytoy agnanaedtayo idi iti ginget iti sanguanan ti Bet-peor.+

Footnotes