Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Deuteronomio 29:1-29

29  Dagitoy ti sasao ti tulag nga imbilin ni Jehova ken Moises a patalgedanna iti annak ti Israel iti daga ti Moab malaksid iti tulag a pinatalgedanna kadakuada idiay Horeb.+  Ket inayaban ni Moises ti intero nga Israel ket kinunana kadakuada: “Dakayo ti nakakita iti amin nga inaramid ni Jehova iti imatangyo idiay daga ti Egipto ken Faraon ken iti amin nga ad-adipenna ken iti intero a dagana,+  dagiti naindaklan a panangpaneknek a nakita dagiti matam,+ dagidiay dadakkel a pagilasinan+ ken milagro.+  Ket kaskasdi a saannakayo nga inikkan ni Jehova iti puso a makaammo ken matmata a makakita ken laplapayag a makangngeg agingga itoy nga aldaw.+  ‘Bayat nga imbagbagnoskayo iti uppat a pulo a tawen idiay let-ang,+ saan a narunot kadakayo dagiti kawesyo, ket saan a narunot iti sakam ti pallokam.+  Saankayo a nangan iti tinapay,+ ket saankayo nga imminum iti arak ken makabartek nga inumen, tapno maammuanyo a siak ni Jehova a Diosyo.’  Kamaudiananna dimtengkayo itoy a disso, ket ni Sihon nga ari ti Hesbon+ ken ni Og+ nga ari ti Basan rimmuar a sumabet kadatayo iti bakal, ngem pinarukmatayo ida.+  Kalpasan dayta innalatayo ti dagada ket intedtayo kas tawid kadagiti Rubenita ken kadagiti Gadita ken iti kagudua ti tribu dagiti Manasesita.+  Gapuna masapul a salimetmetanyo ti sasao daytoy a tulag ket aramidenyo ida, tapno mapagbanagyo a nasayaat ti isuamin nga aramidenyo.+ 10  “Dakayo amin naisaadkayo ita nga aldaw iti sango ni Jehova a Diosyo, dagiti pannakaulo dagiti tribuyo, ti lallakayyo ken dagiti opisialyo, tunggal lalaki iti Israel,+ 11  dagiti ubbingyo, ti assawayo a babbai,+ ken ti ganggannaet nga agnanaed+ kenka nga adda iti tengnga ti pakarsom, manipud iti agur-urnong iti kayom agingga iti agsaksakdo iti danummo,+ 12  tapno makastrekka iti tulag+ ni Jehova a Diosmo ken iti sapatana, a patpatalgedan kenka ni Jehova a Diosmo ita nga aldaw;+ 13  iti panggep a panangipasdek kenka ita nga aldaw a kas ilina+ ken tapno isu agbalin a Diosmo,+ kas iti inkarina kenka ken kas iti insapatana kadagidi ammam a da Abraham,+ Isaac+ ken Jacob.+ 14  “Ita saan laeng a kadakayo ti pangpatalgedak itoy a tulag ken itoy a sapata,+ 15  no di ket iti daydiay adda ditoy a makipagtaktakder kadatayo ita nga aldaw iti sango ni Jehova a Diostayo ken kadagidiay awan kadatayo ditoy ita nga aldaw;+ 16  (ta dakayo pagaammoyo unay no kasano a nagnaedtayo iti daga ti Egipto ken no kasano a naglasattayo iti tengnga dagiti nasion a naglasatanyo.+ 17  Ket makitkitayo idi ti makarimon a bambanagda ken dagiti makadurmen nga idoloda,+ a kayo ken bato, pirak ken balitok, nga adda kadakuada;) 18  tapno awan koma iti tengngayo ti maysa a lalaki wenno maysa a babai wenno maysa a pamilia wenno maysa a tribu a ti pusona tumallikud ita nga aldaw ken Jehova a Diostayo tapno mapan ket pagserbianna ti didios dagidiay a nasion;+ tapno awan koma iti tengngayo ti maysa a ramut a mangpataud iti bunga ti makasabidong a mula ken ajenjo.+ 19  “Ket mapasamakto a no adda nakangngeg iti sasao daytoy a sapata,+ ket binendisionanna ti bagina iti pusona, a kinunana, ‘Maaddaanakto iti talna,+ nupay magnaakto iti kinasungit ti pusok,’+ a panggepna a punasen daydiay nasayaat-pannakapadanumna a mairaman iti daydiay mawaw, 20  saanto a kayat a pakawanen ni Jehova,+ no di ket ti unget+ ni Jehova ken ti kinanasgedna+ umasukto ngarud maibusor iti dayta a tao,+ ket ti isuamin a sapata a naisurat itoy a libro+ sigurado nga agdissonto kenkuana, ket pudno a punasento ni Jehova ti naganna iti baba ti langlangit. 21  Gapuna isu kasapulanto nga ilasin ni Jehova+ maipaay iti didigra manipud kadagiti amin a tribu ti Israel maitunos iti isuamin a sapata ti tulag a naisurat itoy a libro ti linteg. 22  “Ket ti masanguanan a kaputotan, ti annakyo a tumakderto iti kalpasanyo, siguradonto a kunaenda, kasta met ti ganggannaet nga umayto manipud adayo a daga, uray inton nakitada dagiti saplit dayta a daga ken dagiti sakitna a pinangpasakit ni Jehova iti dayta,+ 23  asupre ken asin+ ken pannakapuor,+ tapno ti intero a dagana saanto a mamulaan, wenno uray mangpatubo, wenno uray pagtubuan ti aniaman a mulmula, kas iti pannakaduprak ti Sodoma ken Gomorra,+ Adma+ ken Zeboiim,+ isuda a dinuprak ni Jehova iti ungetna ken iti pungtotna;+ 24  wen, amin dagiti nasion siguradonto a kunaenda, ‘Apay nga inaramid ni Jehova ti kastoy iti daytoy a daga?+ Apay a nabara daytoy dakkel nga unget?’ 25  Kalpasanna kasapulanto a kunaenda, ‘Agsipud ta binaybay-anda ti tulag+ ni Jehova a Dios dagidi ammada, a pinatalgedanna kadakuada idi inruarna ida manipud daga ti Egipto.+ 26  Ket napanda ken nagserbida iti sabali a didios ket nagruknoyda kadakuada, didios a saanda a naam-ammo ken saanna nga imbingaybingay kadakuada.+ 27  Idin gimmil-ayab ti unget ni Jehova iti dayta a daga babaen ti panangyegna iti dayta ti isuamin a lunod a naisurat itoy a libro.+ 28  Gapuna iti unget+ ken pungtot ken dakkel a rurod pinarut ida ni Jehova iti dagada ket impalladawna ida iti sabali a daga a kas itoy nga aldaw.’+ 29  “Ti bambanag a naitalimeng+ kukua ni Jehova a Diostayo, ngem ti bambanag a naipalgak+ kukuatayo ken ti annaktayo agingga iti tiempo a di nakedngan, tapno maitungpaltayo ti amin a sasao daytoy a linteg.+

Footnotes