Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Deuteronomio 21:1-23

21  “No kas pagarigan adda masarakan a napapatay iti daga nga ited kenka ni Jehova a Diosmo tapno tagikuaem, napasag iti tay-ak, ket saan a naammuan no siasino ti nangkabil a namapatay kenkuana,+  masapul met a rummuar dagiti lallakaymo ken ti uk-ukommo+ ket rukodenda agingga kadagiti siudad nga adda iti intero nga aglikmut ti napapatay;  ket isunto ti siudad a kaasitgan iti napapatay. Ket dagiti lallakay iti dayta a siudad masapul a mangalada iti urbon a baka ti pangen a saan pay a naaramat iti trabaho, a saan a nagguyod iti sangol;  ket dagiti lallakay iti dayta a siudad masapul nga isalogda ti urbon a baka iti naapres a ginget a pagay-ayusan ti danum a sadiay nakayugalian nga awan panagsukay wenno panagimula iti bin-i, ket masapul a rung-uenda ti tengnged ti urbon a baka sadiay naapres a ginget.+  “Ket masapul nga umasideg ti papadi nga annak ni Levi, agsipud ta isuda ti pinili ni Jehova a Diosmo nga agserbi kenkuana+ ken mangbendision+ iti nagan ni Jehova ket iti ngiwatda maiwaksi ti tunggal supiat iti tunggal naranggas nga aramid.+  Kalpasanna amin dagiti lallakay iti dayta a siudad isuda a kaasitgan iti napapatay rebbeng a bugguanda ti im-imada+ iti rabaw ti urbon a baka, a ti tengngedna narung-o iti naapres a ginget;  ket masapul a sumungbatda ket kunaenda, ‘Saan nga imbukbok ti im-imami daytoy a dara, saan met a nakita ti matmatami a naibukbok dayta.+  Dika isingir iti ilim nga Israel, a sinubbotmo,+ O Jehova, ket ti pannakabasol iti dara nga awanan basol+ dika ikabil iti tengnga ti ilim nga Israel.’ Ket ti panagbasol iti dara saanto a maisingir kadakuada.  Ket sika—ikkatemto ti pannakabasol iti dara nga awanan basol manipud iti tengngam,+ agsipud ta aramidemto ti umiso kadagiti mata ni Jehova.+ 10  “No kas pagarigan mapanka makibakal kadagiti kabusormo ket ni Jehova a Diosmo inyawatna ida ita imam+ ket impanawmo ida a kautibo;+ 11  ket kadagiti kautibo nakakitaka iti babai a napintas ti langana, ket nagrayoka kenkuana+ ket innalam nga asawam, 12  masapul ngarud nga ipanmo iti tengnga ti balaymo. Masapul a kiskisanna ita ti ulona+ ket asikasuenna dagiti kukona, 13  ket ikkatenna kenkuana ti kagay ti pannakakautibona ket agnaed iti balaymo ket sangitanna ni amana ken ni inana iti intero a lunar a bulan;+ ket kalpasan dayta rebbeng a makidennaka kenkuana, ket masapul a tagikuaem a kas nobia a kaikaskasarmo, ket agbalinto nga asawam. 14  Ket mapasamakto a no saanka a naragsakan kenkuana, masapul ngarud a papanawem,+ a makaay-ayo iti bukodna a kararua; ngem dika pulos ilako maipaay iti kuarta. Dika ikuspil+ kalpasan ti panangmulitmo kenkuana. 15  “No kas pagarigan ti maysa a lalaki maaddaan iti dua nga assawa, maay-ayat daydiay maysa ket magurgura ti sabali, ket isuda, daydiay maay-ayat ken daydiay magurgura, nangipasngayda kenkuana iti annak, ket ti inauna nga anak a lalaki anak daydiay magurgura,+ 16  mapasamakto met nga iti aldaw nga itedna kas tawid iti annakna a lallaki no ania ti adda kenkuana, saanto a mapalubosan nga ibilangna nga inaunana ti anak daydiay maay-ayat a pagsagabaan ti anak daydiay magurgura, ti inauna.+ 17  Ta rebbeng a bigbigenna kas inauna ti anak daydiay magurgura babaen ti panangited kenkuana ti dua a kapaset iti isuamin a masarakan nga adda kenkuana,+ agsipud ta isu ti rugi ti pannakabalinna nga agpaadu.+ Kukuana ti kalintegan ti saad ti inauna.+ 18  “No kas pagarigan ti maysa a lalaki addaan iti anak a nasungit ken rebelioso,+ saan nga umim-imdeng iti timek ni amana wenno iti timek ni inana,+ ket isu linintegda ngem saanto nga umimdeng kadakuada,+ 19  masapul met a tenglen ni amana ken ni inana ket ipanda kadagiti lallakay ti siudadna ken iti ruangan ti dissona,+ 20  ket masapul a kunaenda kadagiti lallakay ti siudadna, ‘Daytoy nga anakmi nasungit ken rebelioso; saan nga umim-imdeng iti timekmi,+ nabuklis+ ken managbarbartek.’+ 21  Kalpasanna dagiti amin a lallakay ti siudadna isu uborendanto iti batbato, ket masapul a matay. Gapuna masapul nga ikkatem ti dakes iti tengngam, ket mangngegto ti intero nga Israel ket pudno nga agbutengda.+ 22  “Ket no kas pagarigan ti maysa a lalaki maaddaan iti basol a maikari iti sentensia nga ipapatay, ket napapatayen,+ ket imbitinmo iti kayo,+ 23  ti natay a bagina rebbeng a saan nga agtalinaed iti kayo iti intero a rabii;+ no di ket di bumurong nga itabonmo iti dayta nga aldaw, agsipud ta daydiay naibitin ket inlunod ti Dios;+ ket dika tulawan ti dagam, nga ited kenka ni Jehova a Diosmo kas tawid.+

Footnotes