Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Deuteronomio 19:1-21

19  “Inton gessaten ni Jehova a Diosmo dagiti nasion+ a ti dagada ited kenka ni Jehova a Diosmo, ket inikkatam ida iti sanikua ken nagnaedka kadagiti siudadda ken kadagiti balayda,+  mangilasinkanto maipaay kenka iti tallo a siudad iti tengnga ti dagam nga ited kenka ni Jehova a Diosmo tapno tagikuaem.+  Isaganamto maipaay kenka ti dalan, ket masapul a bingayem iti tallo a kapaset ti teritoria ti dagam nga inted kenka ni Jehova a Diosmo kas sanikua, ket maipaayto dayta iti asinoman a nakapapatay tapno agkamang sadiay.+  “Ita daytoy ti kaso ti nakapapatay a mabalin nga agkamang sadiay ket kasapulan nga agbiag: No makabilna ti padana a tao a saanna a pagaammo dayta ken saan a sigud a gumurgura kenkuana;+  wenno no kumuyog iti padana a tao a mapan iti kakaykaywan tapno agurnong iti kayo, ket ti imana nakatag-ay a silalayat iti wasay tapno pukanenna ti kayo, ket ti landok nauksot iti putan a kayo,+ ket napuntaanna ti padana a tao ket natay, isu rebbeng nga agkamang iti maysa kadagitoy a siudad ket agbiagto.+  Ta no saan, mabalin a ti manangibales+ iti dara, gapu ta napudot ti pusona, kamatenna ti nakapapatay ket pudno a makamakamna, yantangay nawatiwat ti dalan; ket pudno a makabilna a mapapatay ti kararuana, idinto ta awan sentensia nga ipapatay+ maipaay kenkuana, agsipud ta saan a sigud a gumurgura kenkuana.  Dayta ti makagapu a bilbilinenka, a kunak, ‘Mangilasinkanto maipaay kenka iti tallo a siudad.’+  “Ket no palawaen ni Jehova a Diosmo ti teritoriam maitunos iti insapatana kadagidi ammam,+ ket naitednan kenka ti isuamin a daga nga inkarina nga ited kadagidi ammam,+  agsipud ta salimetmetamto ti isuamin daytoy a bilin nga ibilbilinko kenka ita nga aldaw babaen ti panangaramidmo iti dayta, tapno ayatem ni Jehova a Diosmo ken tapno magnaka a kanayon iti daldalanna,+ masapul ngarud a manginayonka iti tallo a sabsabali a siudad kadagitoy a tallo maipaay kenka,+ 10  tapno awan ti maibuyat a dara nga awanan basol+ iti tengnga ti dagam nga ited kenka ni Jehova a Diosmo kas tawid, ket awan ti maiparabaw kenka a panagbasol iti dara.+ 11  “Ngem no kas pagarigan mapasamak nga adda tao a manggurgura+ iti padana a tao, ket pinadaananna ket timmakder a bumusor kenkuana ket kinabilna a papatayen ti kararuana ket natay,+ ket ti tao nagkamang iti maysa kadagitoy a siudad, 12  masapul ngarud nga agbaon dagiti lallakay ti siudadna ket alaenda manipud sadiay, ket masapul nga iyawatda iti ima ti manangibales iti dara, ket masapul a matay.+ 13  Ti matam rebbeng a saan a maasian kenkuana,+ ket masapul nga ikkatem ti pannakabasol iti dara nga awanan basol manipud Israel,+ tapno makagun-odka iti naimbag. 14  “Dika iyalis dagiti muhon ti padam a tao,+ no dagiti inapo naipasdekdanton dagiti beddeng iti tawidmo a tawidemto iti daga nga ited kenka ni Jehova a Diosmo tapno tagikuaem. 15  “Awan ti maymaysa a saksi a tumakder maibusor iti maysa a tao mainaig iti aniaman a biddut wenno aniaman a basol,+ no maipapan iti aniaman a basol a maaramidanna. Iti ngiwat ti dua a saksi wenno iti ngiwat ti tallo a saksi mapasingkedan ti banag.+ 16  No kas pagarigan ti maysa a saksi a mangganggandat iti kinaranggas tumakder maibusor iti maysa a tao tapno mangyeg iti pammabasol nga iyaalsa maibusor kenkuana,+ 17  ti dua a tao nga addaan supiat masapul met nga agtakderda iti sango ni Jehova, iti sango ti papadi ken ti uk-ukom nga agan-annongto kadagidiay nga aldaw.+ 18  Ket ti uk-ukom masapul nga agsukimat a naan-anay,+ ket no ti saksi maysa nga ulbod a saksi ken nangyeg iti ulbod a pammabasol maibusor iti kabsatna, 19  masapul met nga aramidenyo kenkuana kas iti ginandatna nga aramiden iti kabsatna,+ ket masapul nga ikkatem ti dakes iti tengngam.+ 20  Gapuna mangngegto dagidiay mabati ket agbutengda, ket saandanto a pulos aramidenen ti aniaman a dakes a kas itoy iti tengngam.+ 21  Ket ti matam rebbeng a saan a maasian:+ kararua ti agpaayto iti kararua, mata iti mata, ngipen iti ngipen, ima iti ima, saka iti saka.+

Footnotes