Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Deuteronomio 18:1-22

18  “Awan ti binglay wenno tawid a mairaman iti Israel ti agpaay iti papadi, dagiti Levita, ti intero a tribu ni Levi.+ Dagiti naipuor a daton ni Jehova, uray ti tawidna, rebbeng a kanenda.+  Gapuna awan ti tawid nga agpaay kenkuana iti tengnga ti kakabsatna. Ni Jehova ti tawidna,+ kas iti sinaona kenkuana.  “Ita daytoy ti agtultuloy kas maiparbeng a kalintegan ti papadi manipud kadagiti umili, manipud kadagidiay agisakripisio iti naparti, uray no toro wenno karnero: Ti maysa masapul nga itedna iti padi ti aklo-aklo ken dagiti panga ken ti tian.  Ti umuna iti bukbukelmo, iti baro nga arakmo ken iti lanam ken ti umuna iti napukis a delana ti arbanmo rebbeng nga itedmo kenkuana.+  Ta isu ti pinili ni Jehova a Diosmo manipud kadagiti amin a tribum tapno agtakder nga agserbi iti nagan ni Jehova, isu ken ti annakna, a kanayon.+  “Ket no kas pagarigan rummuar ti Levita manipud iti maysa kadagiti siudadmo iti intero nga Israel, a nagtaenganna iti apagbiit,+ ket isu umay gapu iti aniaman a panaggartem ti kararuana iti disso a piliento ni Jehova,+  masapul met nga agserbi iti nagan ni Jehova a Diosna a kas met laeng iti amin a kakabsatna, dagiti Levita, isuda a sitatakder sadiay iti sango ni Jehova.+  Rebbeng a mangan iti maipada a binglay,+ malaksid iti maalana manipud bambanag nga ilakona iti sansanikua dagiti inapona.  “Inton makastrekka iti daga nga ited kenka ni Jehova a Diosmo, dika sursuruen nga aramiden ti maitunos kadagiti nakarimrimon a banag dagidiay a nasion.+ 10  Awan koma ti masarakan kenka nga asinoman a mangpalasat iti anakna a lalaki wenno anakna a babai iti apuy,+ asinoman a mangaramat iti panagpadles,+ maysa a managsalamangka+ wenno asinoman nga agsapul kadagiti partaan+ wenno maysa a mangkukulam,+ 11  wenno maysa a mangkayaw iti sabsabali babaen ti pagilabeg+ wenno asinoman nga umuman iti mannakiuman iti espiritu+ wenno maysa a propesional a managipadles kadagiti pasamak+ wenno asinoman nga agimtuod iti natay.+ 12  Ta isuamin nga agar-aramid kadagitoy a banag ket nakarimrimon ken Jehova, ket maigapu kadagitoy a nakarimrimon a banag pagtalawen ida ni Jehova a Diosmo iti sanguanam.+ 13  Rebbeng a paneknekam ti bagim nga awan pagkuranganna ken Jehova a Diosmo.+ 14  “Ta dagitoy a nasion nga ikkatam iti sanikua umim-imdengda idi kadagidiay agsalsalamangka+ ken kadagidiay agpadles;+ ngem no maipapan kenka, saannaka nga inikkan ni Jehova a Diosmo iti aniaman a kas itoy.+ 15  Maysa a mammadto manipud iti tengngam, manipud iti kakabsatmo, a kas kaniak, ti ibangonto ni Jehova a Diosmo maipaay kenka—rebbeng nga umimdengkayo kenkuana+ 16  kas sungbat iti amin a kiniddawmo ken Jehova a Diosmo idiay Horeb iti aldaw ti kongregasion,+ a kinunam, ‘Dika ipangngeg manen kaniak ti timek ni Jehova a Diosko, ket daytoy dakkel nga apuy dika ipakitan kaniak, tapno saanak a matay.’+ 17  Iti kasta kinuna kaniak ni Jehova, ‘Naimbag ti naaramidanda iti panangisaoda iti kasta.+ 18  Ibangonakto ida iti mammadto manipud tengnga ti kakabsatda, a kas kenka;+ ket pudno nga ikabilkonto ti sasaok iti ngiwatna,+ ket sigurado a sawennanto kadakuada ti isuamin nga ibilinkonto kenkuana.+ 19  Ket mapasamakto a ti tao a saanto nga agimdeng iti sasaok a sawennanto iti naganko, siak mangalikagumakto met iti pannakikuenta kenkuana.+ 20  “‘Nupay kasta, ti mammadto nga agdursok a mangisao iti naganko iti sao a saanko nga imbilin kenkuana a sawenna+ wenno agsao iti nagan ti sabali a didios,+ dayta a mammadto masapul a matay.+ 21  Ket no kas pagarigan kunaem iti pusom: “Kasanonto a maammuanmi ti sao a saan a sinao ni Jehova?”+ 22  no ti mammadto agsao iti nagan ni Jehova ket ti sao saan a mapasamak wenno pumudno, dayta ti sao a saan a sinao ni Jehova. Sinao dayta ti mammadto buyogen ti kinadursok.+ Dika maaliaw kenkuana.’+

Footnotes