Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Deuteronomio 10:1-22

10  “Iti daydi met laeng a tiempo kinuna kaniak ni Jehova, ‘Mangkitikitka maipaay kenka iti dua a tapi a bato a kaasping dagidiay immuna,+ ket sumang-atka kaniak iti bantay, ket masapul a mangaramidka iti lakasa a kayo+ maipaay kenka.  Ket iti rabaw dagiti tapi isuratkonto ti sasao a nagparang kadagidi immuna a tapi, a binurakmo, ket masapul nga ikabilmo ida iti lakasa.’  Gapuna nangaramidak iti lakasa a kayo ti akasia ken nangkitikitak iti dua a tapi a bato a kaasping dagidiay immuna+ ket simmang-atak iti bantay, ket ti dua a tapi adda idi iti imak.  Kalpasanna insuratna iti rabaw dagiti tapi ti isu met laeng a surat a kas iti daydi immuna,+ ti Sangapulo a Sasao,+ a sinao kadakayo ni Jehova iti bantay manipud tengnga ti apuy+ idi aldaw ti kongregasion;+ a kalpasan dayta inted ida kaniak ni Jehova.  Kalpasanna nagbaw-ingak ket simmalogak iti bantay+ ket inkabilko dagiti tapi iti lakasa nga inaramidko, tapno agtalinaedda sadiay, kas iti imbilin kaniak ni Jehova.+  “Ket nagluas ti annak ti Israel manipud Beerot Bene-jaacan+ nga agturong iti Mosera. Sadiay a natay ni Aaron, ket naitabon sadiay;+ ket ni Eleazar nga anakna nangrugi nga agakem a kas padi imbes nga isu.+  Manipud sadiay nagluasda nga agturong iti Gudgoda, ken manipud Gudgoda agturong iti Jotbata,+ maysa a daga dagiti naapres a ginget a pagay-ayusan ti danum.  “Iti daydi met laeng a tiempo inlasin ni Jehova ti tribu ni Levi+ a mangawit iti lakasa ti tulag ni Jehova,+ tapno agtakderda iti sango ni Jehova maipaay iti panagserbi kenkuana+ ken tapno mangbendisionda iti naganna agingga itoy nga aldaw.+  Dayta ti makagapu nga awanan ni Levi iti binglay ken tawid+ a mairaman iti kakabsatna. Ni Jehova ti tawidna, kas iti kinuna kenkuana ni Jehova a Diosmo.+ 10  Ket siak—nagyanak idiay bantay a kas met laeng kadagidi immuna nga aldaw, uppat a pulo nga aldaw ken uppat a pulo a rabii,+ ket immimdeng met kaniak ni Jehova iti dayta a gundaway.+ Saannaka idi a kayat a dadaelen ni Jehova.+ 11  Kalpasanna kinuna kaniak ni Jehova, ‘Tumakderka, mapanka iti sanguanan dagiti umili a maipaay iti panagluas, tapno makastrekda ket tagikuaenda ti daga nga insapatak kadagidi ammada nga ited kadakuada.’+ 12  “Ket ita, O Israel, ania ti kidkiddawen kenka ni Jehova a Diosmo+ no di ti panagbuteng+ ken Jehova a Diosmo, tapno magnaka iti amin a daldalanna+ ken tapno ayatem+ ken tapno agserbika ken Jehova a Diosmo buyogen ti isuamin a pusom ken isuamin a kararuam;+ 13  tapno salimetmetam dagiti bilin ni Jehova ken dagiti paglinteganna+ nga ibilbilinko kenka ita nga aldaw, maipaay a pagimbagam?+ 14  Kitaem, kukua ni Jehova a Diosmo ti langlangit,+ ti mismo a langlangit ti langlangit, ti daga+ ken isuamin nga adda iti dayta. 15  Kadagidi ammam laeng ti nakisinggalutan ni Jehova tapno ayatenna ida, iti kasta pinilina ti kaputotanda a sumaruno kadakuada,+ dakayo a mismo, manipud kadagiti amin nga ili, kas itoy nga aldaw. 16  Ket masapul a kugitenyo ti makinsango a kudil dagiti pusoyo+ ket saanyon a patangkenen dagiti lengngesyo.+ 17  Ta ni Jehova a Diosyo isu ti Dios dagiti didios+ ken Apo ti ap-appo,+ ti Dios a naindaklan, nabileg ken nakaam-amak,+ nga awan tratuenna buyogen ti panangidumduma+ ket saan met nga umawat iti pasuksok,+ 18  a mangipakat iti panangukom maipaay iti awan amana nga ubing ken iti balo a babai+ ket ayatenna ti ganggannaet nga agnanaed+ iti kasta ipaayanna iti tinapay ken kagay. 19  Dakayo met masapul nga ayatenyo ti ganggannaet nga agnanaed,+ ta nagbalinkayo a ganggannaet nga agnanaed iti daga ti Egipto.+ 20  “Rebbeng nga agbutengka ken Jehova a Diosmo.+ Rebbeng nga agserbika kenkuana,+ ket rebbeng a kumpetka kenkuana,+ ket babaen ti naganna mangaramidka iti sinapataan a sasao.+ 21  Isu Daydiay idaydayawmo,+ ket isu ti Diosmo, a nangaramid kenka kadagitoy naindaklan ken nakaam-amak a banag a nakita dagita matam.+ 22  Simmalog dagidi ammam a napan iti Egipto a pitopuloda a kararua,+ ket ita ni Jehova a Diosmo inaramidnaka a kas kadagiti bituen ti langlangit ti kinaaduna.+

Footnotes