Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Deuteronomio 1:1-46

1  Dagitoy ti sasao a sinao ni Moises iti intero nga Israel iti rehion ti Jordan+ idiay let-ang, iti desierto a tantanap iti sanguanan ti Suf, iti nagbaetan ti Paran+ ken Tofel ken Laban ken Hazerot+ ken Dizahab,  a sangapulo ket maysa nga aldaw manipud Horeb a dumalan iti Bantay Seir agingga iti Cades-barnea.+  Ket naaramid nga iti maikapat a pulo+ a tawen, iti maikasangapulo ket maysa a bulan, iti umuna ti bulan, nagsao ni Moises iti annak ti Israel maitunos iti isuamin nga imbilin kenkuana ni Jehova maipaay kadakuada,  kalpasan ti panangparmekna ken Sihon+ nga ari dagiti Amoreo, nga agnanaed idi iti Hesbon, ken ni Og+ nga ari ti Basan, nga agnanaed idi iti Astarot,+ idiay Edrei.+  Idiay rehion ti Jordan iti daga ti Moab ginayagay ni Moises nga ilawlawag daytoy a linteg,+ a kunkunana:  “Ni Jehova a Diostayo nagsao kadatayo idiay Horeb,+ a kunkunana, ‘Nagnaedkayo iti umdas a kabayag itoy a nakabambantay a rehion.+  Agbaw-ing ken agrubbuatkayo ket mapankayo iti nakabambantay a rehion dagiti Amoreo+ ken kadagiti amin a kabangibangda iti Araba,+ iti nakabambantay a rehion+ ken iti Sefela ken iti Negeb+ ken iti igid ti baybay,+ ti daga dagiti Canaanita,+ ken Libano,+ agingga iti dakkel a karayan, ti karayan Eufrates.+  Kitaenyo, ikabilko ti daga iti sanguananyo. Sumrekkayo ket tagikuaenyo ti daga a maipapan iti dayta insapata ni Jehova kadagiti ammayo, kada Abraham, Isaac+ ken Jacob,+ nga itedna kadakuada ken iti bin-ida a sumaruno kadakuada.’+  “Ket kinunak daytoy kadakayo iti daydi met laeng a tiempo, ‘Saankayo a kabaelan nga awiten a sisiak.+ 10  Pinaadunakayo ni Jehova a Diosyo, ket adtoy ita nga aldaw kaslakayo kadagiti bituen iti langlangit ti kinaaduna.+ 11  Paaduennakayo+ koma ni Jehova a Dios dagidi ammayo iti maminribu ti kaaduyo, ket bendisionannakayo+ koma kas inkarina kadakayo.+ 12  Kasano ti panangawitko a sisiak iti dadagsenyo ken iti awityo ken iti panagriririyo?+ 13  Mangalakayo kadagiti nasaririt ken masirib+ ken aduan kapadasan+ a lallaki kadagiti tribuyo, tapno maisaadko ida kas pannakaulo kadakayo.’+ 14  Iti kasta sinungbatandak ket kinunayo, ‘Nasayaat ti banag a sinaom nga aramidenmi.’ 15  Gapuna innalak dagiti pannakaulo kadagiti tribuyo, lallaki a nasaririt ken aduan kapadasan, ket insaadko ida kas pannakaulo kadakayo, pangpanguluen ti rinibu ken pangpanguluen ti ginasut ken pangpanguluen ti saglilimapulo ken pangpanguluen ti pinullo ken op-opisial dagiti tribuyo.+ 16  “Ket binilinko dagiti ukomyo iti daydi met laeng a tiempo, a kinunak, ‘No mangdengngegkayo iti nagbaetan ti kakabsatyo, masapul a mangukomkayo buyogen ti kinalinteg+ iti nagbaetan ti maysa a tao ken ti kabsatna wenno ti ganggannaet nga agnanaed kenkuana.+ 17  Dikay mangidumduma iti panangukom.+ Rebbeng a denggenyo daydiay bassit a kas met laeng iti daydiay dakkel.+ Dikay maaliaw gapu iti tao,+ ta ti panangukom kukua ti Dios;+ ket ti kaso a narikut unay kadakayo, rebbeng nga idatagyo kaniak, ket denggekto.’+ 18  Ket iti daydi met laeng a tiempo imbilinko kadakayo ti amin a bambanag a rebbeng nga aramidenyo. 19  “Kalpasanna nagluastayo manipud Horeb ket naglasattayo iti intero dayta dakkel ken nakaam-amak a let-ang,+ a nakitayo, a dumalan iti nakabambantay a rehion dagiti Amoreo,+ kas iti imbilin kadatayo ni Jehova a Diostayo; ket kamaudiananna dimtengtayo iti Cades-barnea.+ 20  Kinunak ita kadakayo, ‘Dimtengkayo iti nakabambantay a rehion dagiti Amoreo, nga ited kadatayo ni Jehova a Diostayo.+ 21  Kitaem, ni Jehova a Diosmo binaybay-anna kenka ti daga.+ Sumang-atka, agtagikuaka, kas iti sinao kenka ni Jehova a Dios dagidi ammam.+ Dika agbuteng, wenno agkullayaw.’+ 22  “Nupay kasta, immasidegkayo amin kaniak ket kinunayo, ‘Mangibaontayo iti lallaki nga umun-una kadatayo tapno sukimatenda ti daga maipaay kadatayo ket iyegandatayo iti damag maipapan iti dalan a sumang-atantayo ken kadagiti siudad nga umayantayto.’+ 23  Ala ket, ti banag naimbag idi kadagiti matak, iti kasta nangalaak kadakayo iti sangapulo ket dua a lallaki, maysa iti tunggal tribu.+ 24  Kalpasanna nagbaw-ingda ket simmang-atda iti nakabambantay a rehion+ ket nakagtengda agingga iti naapres a ginget ti Escol+ ket sinimisimda dayta. 25  Ket nangalada iti sumagmamano kadagiti bunga ti daga+ iti imada ket insalogda kadatayo, ket inyegandatayo iti damag ket kinunada, ‘Nasayaat ti daga nga ited kadatayo ni Jehova a Diostayo.’+ 26  Ngem saanyo a kinayat ti sumang-at,+ ket nangrugikayo nga agtignay a sirerebelioso iti bilin ni Jehova a Diosyo.+ 27  Ket nagdaydayengdengkayo kadagiti toldayo ket kinunkunayo, ‘Gapu ta kinaguranatayo ni Jehova+ isu nga inruarnatayo manipud daga ti Egipto+ tapno iyawatnatayo iti ima dagiti Amoreo, tapno talipuposendatayo.+ 28  Sadino ti sumang-atantayo? Dagiti kakabsattayo pinaglunagda ti pusotayo,+ a kinunada: “Nakitami sadiay dagiti umili a daddadakkel ken nataytayag ngem kadatayo,+ dagiti siudad a dadakkel ken nasarikedkedan agingga iti langit+ ken kasta met ti annak ti Anakim.”’+ 29  “Gapuna kinunak kadakayo, ‘Dikay mapakigtotan wenno agbuteng gapu kadakuada.+ 30  Ni Jehova a Diosyo ti mapan iti sanguananyo. Makirupakto maipaay kadakayo+ maitunos iti amin nga inaramidna kadakayo idiay Egipto iti mismo nga imatangyo,+ 31  ken idiay let-ang,+ a nakakitaam no kasano ti panangawit kenka ni Jehova a Diosmo+ kas iti panangawit ti maysa a tao iti anakna, iti intero a dalan a nagnaanyo agingga iti iyaayyo itoy a disso.’+ 32  Ngem agpapan pay itoy a sao saankayo a naaddaan iti pammati ken Jehova a Diosyo,+ 33  a mapmapan idi iti sanguananyo iti dalan tapno isimisimannakayo iti disso a pagpakarsuanyo,+ babaen ti apuy iti rabii tapno makitayo no ania a dalan ti rebbeng a pagnaanyo ken babaen ti ulep iti aldaw.+ 34  “Bayat dayta nangngeg ni Jehova ti timek ti sasaoyo. Gapuna nagrurod ket nagsapata,+ a kunkunana, 35  ‘Awan maysa kadagitoy a lallaki iti daytoy a dakes a kaputotan ti makakitanto iti nasayaat a daga nga insapatak nga ited kadagiti ammayo,+ 36  malaksid ken Caleb nga anak ni Jefune.+ Makitananto dayta, ket itedkonto kenkuana ken iti annakna ti daga a nagbaddekanna, gapu iti kinapudno a sinurotna a naan-anay ni Jehova.+ 37  (Uray kaniak nagpungtot unay ni Jehova maigapu kadakayo, a kunkunana, ‘Saankanto met a sumrek sadiay.+ 38  Ni Josue nga anak ni Nun, a sitatakder iti sanguanam, isu ti sumrekto sadiay.’+ Isu pinapigsana,+ agsipud ta pagtawidennanto iti dayta ti Israel.) 39  No maipapan kadagiti ubbingyo a nagkunaanyo: “Agbalindanto a samsam!”+ ken iti annakyo nga ita nga aldaw saanda nga ammo ti naimbag wenno dakes, dagitoy sumrekdanto sadiay, ket itedkonto kadakuada, ket tagikuaendanto. 40  No maipapan kadakayo, baliwanyo ti turongyo ket agluaskayo a mapan iti let-ang a dumalan iti Nalabaga a Baybay.’+ 41  “Gapu itoy simmungbatkayo ket kinunayo kaniak, ‘Nagbasolkami a maikaniwas ken Jehova.+ Dakami—sumang-atkamto ket makirupakkami maitunos iti isuamin nga imbilin kadakami ni Jehova a Diosmi!’ Gapuna imbarikesyo, tunggal maysa, dagiti igamna iti gubat ket imbilangyo a nalaka ti sumang-at iti bantay.+ 42  Ngem kinuna kaniak ni Jehova, ‘Sawem kadakuada: “Dikay sumang-at ken makirupak, agsipud ta awanak iti tengngayo;+ tapno saankayo a maabak iti sanguanan dagiti kabusoryo.”’+ 43  Gapuna nagsaoak kadakayo, ket saankayo nga immimdeng no di ket nangrugikayo nga agtignay a sirerebelioso+ iti bilin ni Jehova ken agpudot unay, ket pinadasyo ti sumang-at iti bantay.+ 44  Idin dagiti Amoreo nga agnanaed iti dayta a bantay rimmuarda a sumabet kadakayo ket kinamatdakayo,+ kas iti aramiden dagiti uyokan, ket winarawaradakayo idiay Seir agingga idiay Horma.+ 45  Kalpasan dayta nagsublikayo ket nangrugikayo nga agsangit iti sanguanan ni Jehova, ngem saan a dimngeg ni Jehova iti timekyo,+ saannakayo met nga inimdengan.+ 46  Gapuna nagnanaedkayo idiay Cades iti adu nga aldaw, kas iti kaadu ti aldaw a panagnaedyo sadiay.+

Footnotes