Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Daniel 8:1-27

8  Iti maikatlo a tawen ti panagari ni Belsazar+ nga ari, adda sirmata a nagparang kaniak, mismo a kaniak, ni Daniel, kalpasan daydiay nagparang kaniak idi rugi.+  Ket rinugiak ti kumita iti sirmata; ket naaramid, bayat a kumitkitaak, nga addaak idi iti Susan+ a kastilio, nga adda idiay Elam+ a masaksakupan a distrito; ket kimmitaak iti sirmata, ket siak addaak idi iti igid ti pagay-ayusan ti danum ti Ulai.+  Idi intangadko dagiti matak, iti kasta kimmitaak, ket, adtoy! maysa a kalakian a karnero+ nga agtaktakder iti sango ti pagay-ayusan ti danum, ket addaan dua a sara. Ket natayag ti dua a sara, ngem ti maysa nataytayag ngem iti sabali, ket ti nataytayag isu daydiay timpuar iti kamaudianan.+  Nakitak ti kalakian a karnero a mangar-aramid iti panagdiros nga agpalaud ken agpaamianan ken agpaabagatan, ket awan atap nga an-animal a nagtalinaed a sitatakder iti sanguananna, ket awan ti mangar-aramid iti aniaman a panangispal manipud imana.+ Ket inaramidna maitunos iti pagayatanna, ket nagpalangguad unay.  Ket siak, iti biangko, nagtultuloyak a nagut-utob, ket, adtoy! adda maysa a kalakian dagiti kalding+ nga um-umay manipud lelennekan ti init iti rabaw ti intero a daga, ket saan a sumagsagid iti daga. Ket no maipapan iti kalakian a kalding, adda nakalatlatak a sara iti baet dagiti matana.+  Ket nagtultuloy nga immay agingga iti kalakian a karnero nga addaan iti dua a sara, a nakitak a sitatakder iti sango ti pagay-ayusan ti danum; ket agtartaray a timmurong iti dayta buyogen ti nabileg a pungtotna.  Ket nakitak nga umas-asideg iti kalakian a karnero, ket nangrugi a mangipakita iti panagrurod iti dayta, ket kinabilna ti kalakian a karnero ken binungtolna ti dua a sarana, ket ti kalakian a karnero awanan iti bileg nga agtakder iti sanguananna. Gapuna intumbana dayta iti daga ket impayatpayatna, ket ti kalakian a karnero awanan idi iti manangispal manipud iti imana.+  Ket ti kalakian dagiti kalding, iti biangna, nagpalangguad unay;+ ngem apaman a nagbalin a nabileg, nabungtol ti dakkel a sara, ket adda uppat a timpuar a silalatak a kasukatna, a tumurong iti uppat nga angin ti langlangit.+  Ket manipud iti maysa kadakuada adda timpuar a sabali pay a sara, maysa a bassit,+ ket nagtultuloy a dimmakkel iti kasta unay a tumurong iti abagatan ken tumurong iti leleggakan ti init ken tumurong iti Arkos.+ 10  Ket dimmakdakkel agingga iti buyot ti langlangit,+ iti kasta tininnagna iti daga ti sumagmamano iti buyot ken ti sumagmamano kadagiti bituen,+ ket impayatpayatna ida.+ 11  Ket nagpalangguad agingga iti Prinsipe+ ti buyot, ket manipud kenkuana naikkat ti kankanayon a diaya,+ ket ti naipasdek a disso ti santuariona naituang.+ 12  Ket ti maysa a buyot nagin-inut a nayawat,+ agraman ti kankanayon a diaya,+ gapu iti salungasing;+ ket intultuloyna nga impuruak ti kinapudno+ iti daga,+ ket nagtignay ket nagballigi.+ 13  Ket nangngegko ti maysa a santo+ nga agsasao, ket ti sabali pay a santo kinunana iti daydiay mismo nga agsasao: “Kasanonto kabayag ti sirmata ti kankanayon a diaya+ ken ti salungasing a mamaglangalang,+ tapno agpadpada a ti nasantuan a disso ken ti buyot pagbalinen a bambanag a payatpayaten?”+ 14  Gapuna kinunana kaniak: “Agingga iti dua ribu tallo gasut a rabii ken bigat; ket ti nasantuan a disso sigurado a maiyegto iti umiso a kasasaadna.”+ 15  Idin naaramid a, bayat a siak, ni Daniel, kitkitaek ti sirmata ken sapsapulek ti pannakaawat,+ ay ket, adtoy! adda maysa a sitatakder iti sanguanak a ti langana kas iti nabaneg a lalaki.+ 16  Ket nangrugi a mangngegko ti timek ti maysa a naindagaan a tao iti tengnga ti Ulai,+ ket nagpukkaw ket kinunana: “Gabriel,+ ipaawatmo iti daydiay adda dita ti banag a nakita.”+ 17  Gapuna immay iti abay ti pagtaktakderak, ngem idi dimteng napagkullayawak iti kasta insubusobko ti rupak. Ket kinunana kaniak: “Tarusam,+ O anak ti tao,+ a ti sirmata agpaay iti tiempo ti panungpalan.”+ 18  Ket bayat a makisasao kaniak, nakaturogak iti nargaan a ti rupak adda iti daga.+ Gapuna sinagidnak ket pinatakdernak iti daydi nagtaktakderak.+ 19  Ket kinunana: “Adtoy ipakaammok kenka no anianto ti mapasamak iti kamaudianan a paset ti panangkondenar, agsipud ta agpaay dayta iti naituding a tiempo ti panungpalan.+ 20  “Ti kalakian a karnero a nakitam nga addaan iti dua a sara iladawanna ti ar-ari ti Media ken Persia.+ 21  Ket ti kalakian a kalding a burboran iladawanna ti ari ti Grecia;+ ket no maipapan iti dakkel a sara nga adda iti baet dagiti matana, iladawanna ti umuna nga ari.+ 22  Ket dayta yantangay nabungtol, iti kasta adda uppat a timmakder a kasukatna iti kamaudiananna,+ addanto tumakder nga uppat a pagarian manipud iti nasionna, ngem saan a babaen iti pannakabalinna. 23  “Ket iti kamaudianan a paset ti pagarianda, bayat a dagiti managsalungasing agtignayda nga agturong iti tungpalna, addanto tumakder nga ari a narungsot ti panaglanglangana ken makaawat kadagiti di nalawag a sasao.+ 24  Ket ti pannakabalinna agbalinto a nabileg, ngem saan a babaen iti bukodna a pannakabalin.+ Ket iti nakaskasdaaw a pamay-an mangdadaelto,+ ket sigurado nga agballiginto ken agaramid a sibaballigi. Ket pudno a dadaelennanto dagidiay mannakabalin, kasta met dagiti tattao a buklen dagidiay sasanto.+ 25  Ket maitunos iti pannakatarusna sigurado a pagballigiennanto met ti panangallilaw iti imana.+ Ket agpalangguadto iti pusona,+ ket bayat ti kinawayawaya iti panagdanag+ adunto ti dadaelenna. Ket tumakderto maibusor iti Prinsipe dagiti prinsipe,+ ngem isu maburakto+ nga awan ima. 26  “Ket ti banag a nakita maipapan iti rabii ken iti bigat, a naibagan, pudno dayta.+ Ket sika, iti biangmo, ilimedmo ti sirmata, agsipud ta agpaay pay laeng iti adu nga aldaw.”+ 27  Ket no maipapan kaniak, ni Daniel, napaksuyanak ket nagsakitak iti sumagmamano nga aldaw.+ Kalpasanna bimmangonak ket inaramidko ti trabaho ti ari;+ ngem nagtultuloyak nga aglanglanga a nabibineg maigapu iti banag a nakita, ket awan asinoman a makaawat iti dayta.+

Footnotes