Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Daniel 4:1-37

4  “Ni Nabucodonosor nga ari, kadagiti amin nga ili, nasional a bungbunggoy ken pagsasao nga agnanaed iti intero a daga:+ Rumang-ay koma ti talnayo.+  Dagiti pagilasinan ken datdatlag nga inaramid kaniak ti Kangatuan a Dios, pagarupek a naimbag nga ideklara.+  Anian a naindaklan dagiti pagilasinanna, ken anian a mannakabalin dagiti datdatlagna!+ Ti pagarianna ket pagarian agingga iti tiempo a di nakedngan,+ ket ti panagturayna agpaay iti kinapkaputotan.+  “Siak, ni Nabucodonosor, sinanam-ayak+ idi iti balayko ken rumangrang-ayak iti palasiok.+  Adda tagtagainep a nakitak, ket nangrugi a mamagbuteng kaniak.+ Ket iti pagiddaak adda ladladawan iti isip ken sirsirmata ti ulok a nangrugi a mamagaliaw kaniak.+  Ket manipud kaniak naituyang ti maysa a bilin nga iyegda iti sanguanak dagiti amin a masirib a lallaki ti Babilonia, tapno ipakaammoda koma kaniak ti mismo a kayulogan ti tagtagainep.+  “Iti dayta a tiempo simrek ti managsalamangka a papadi, dagiti aran, dagiti Caldeo+ ken dagiti astrologo;+ ket sinaok iti sanguananda no ania idi ti tagtagainep, ngem ti kayuloganna saanda a naipakaammo kaniak.+  Ket iti kamaudiananna immay iti sanguanak ni Daniel, nga agnagan Baltazar+ maitunos iti nagan ti diosko+ ket adda kenkuana ti espiritu ti nasantuan a didios;+ ket iti sanguananna sinaok no ania idi ti tagtagainep:  “‘O Baltazar a panguluen ti managsalamangka a papadi,+ agsipud ta siak pagaammok unay a ti espiritu ti nasantuan a didios adda kenka+ ket awan a pulos ti palimed a mangriribuk kenka,+ ibagam kaniak dagiti sirmata ti tagtagainepko a nakitak ken ti kayuloganna.+ 10  “‘Ita makitkitak idi dagiti sirmata ti ulok iti pagiddaak,+ ket, adtoy! maysa a kayo+ iti tengnga ti daga, a napalalo ti kangatona.+ 11  Ti kayo dimmakkel ken pimmigsa, ket ti mismo a kangatona dimmanon iti kamaudiananna iti langlangit, ket makita agingga iti ungto ti intero a daga.+ 12  Nasayaat ti bulbulongna, ket naruay ti bungana, ket iti dayta adda taraon maipaay iti isuamin. Iti sirokna aglinong+ ti animal+ ti tay-ak, ket kadagiti kangrunaan a sangana agnaed dagiti tumatayab ti langlangit,+ ket manipud iti dayta agtaraon a mismo ti isuamin a lasag. 13  “‘Nagtultuloyak a kimmita kadagiti sirmata ti ulok iti pagiddaak, ket, adtoy! maysa nga agbambantay,+ mismo a maysa a santo,+ a bumabbaba manipud iti mismo a langlangit. 14  Agpukpukkaw a sipipigsa, ket daytoy ti kunkunana: “Pukanenyo ti kayo,+ ket putdenyo dagiti kangrunaan a sangana. Wagwagenyo ti bulbulongna, ket iwarisyo dagiti bungana. Agtalaw koma ti animal manipud iti sirokna, ken dagiti tumatayab manipud iti kangrunaan a sangsangana.+ 15  Nupay kasta, ibatiyo ti puonna iti daga, sibebedbed a mismo iti landok ken gambang, iti tengnga dagiti ruot ti tay-ak; ket mabasa koma dayta iti linnaaw ti langlangit, ket kadua ti animal adda koma ti bingayna iti ruruot ti daga.+ 16  Masukatan koma ti pusona manipud iti natauan a puso, ket maited koma iti dayta ti puso ti animal,+ ket aglabas koma iti dayta ti pito a panawen.+ 17  Sigun iti bilin dagiti agbambantay+ naadda ti banag, ket sigun iti sasao dagiti sasanto naadda ti kiddaw, iti panggep a dagiti sibibiag a tattao maammuanda koma a ti Kangatuan isu ti Agturay iti pagarian ti sangatauan+ ket iti daydiay kayatna, itedna dayta+ ket ipasdekna nga agturay iti dayta uray daydiay kanunumuan iti sangatauan.”+ 18  “‘Daytoy ti tagtagainep a siak, ni Ari Nabucodonosor, nakitak; ket sika, O Baltazar, sawem no ania ti kayuloganna, yantangay amin dagiti dadduma a masirib a tattao iti pagariak saanda a kabaelan nga ipakaammo kaniak ti mismo a kayuloganna.+ Ngem makabaelka, agsipud ta ti espiritu ti nasantuan a didios adda kenka.’+ 19  “Iti dayta a tiempo nagmalanga iti apagkanito ni Daniel a mismo, nga agnagan Baltazar,+ ket dagiti mismo a panunotna nangrugi a mamagaliaw kenkuana.+ “Simmungbat ti ari ket kinunana, ‘O Baltazar, dika ipalubos a ti mismo a tagtagainep ken ti kayulogan pagaliawendaka.’+ “Simmungbat ni Baltazar ket kinunana, ‘O apok, ti tagtagainep maipakat koma kadagidiay manggurgura kenka, ken ti kayuloganna kadagiti kabusormo.+ 20  “‘Ti kayo a nakitam, a dimmakkel ken pimmigsa ket ti kangatona dimmanon iti kamaudiananna iti langlangit ken makita ti intero a daga,+ 21  ket nasayaat ti bulbulongna, ket naruay ti bungana, ket iti dayta adda taraon a maipaay iti isuamin; iti sirokna agnaed dagiti animal ti tay-ak, ket kadagiti kangrunaan a sangana agtaeng dagiti tumatayab ti langlangit,+ 22  sika dayta, O ari,+ agsipud ta dimmakkelka ken pimmigsaka, ket ti kinadaegmo dimmakkel ken dimmanon iti langlangit,+ ket ti panagturaymo dimmanon iti ungto ti daga.+ 23  “‘Ket gapu ta ti ari nakakita iti agbambantay, mismo a maysa a santo,+ a bumabbaba manipud iti langlangit, a kunkunana met: “Pukanenyo ti kayo, ket dadaelenyo dayta. Nupay kasta, ibatiyo ti mismo a puonna iti daga, ngem sibebedbed iti landok ken gambang, iti tengnga dagiti ruot ti tay-ak, ket babaen iti linnaaw ti langlangit mabasa koma, ket ti bingayna maikuyog koma kadagiti animal iti tay-ak agingga a ti met laeng pito a panawen aglabas iti dayta,”+ 24  daytoy ti kayulogan, O ari, ket ti bilin+ ti Kangatuan+ isu ti masapul a mapagteng iti apok nga ari.+ 25  Ket sika pagtalawendakanto kadagiti tattao, ket kadagiti animal iti tay-ak ti pakipagnaedamto,+ ket ti ruruot isunto ti itedda kenka a mismo tapno kanem kas kadagiti toro;+ ket sika mababasakanto iti linnaaw ti langlangit, ket pito a panawen+ ti aglabasto kenka, agingga a maammuam a ti Kangatuan isu ti Agturay iti pagarian ti sangatauan,+ ket itedna dayta iti daydiay kayatna.+ 26  “‘Ket agsipud ta kinunada nga ibatida ti puon ti kayo,+ ti pagariam maisiguradonto kenka kalpasan a maammuam a ti langlangit agturturayda.+ 27  Gapuna, O ari, naimbag koma kenka ti pammatigmaanko,+ ket ikkatem dagiti bukodmo a basol babaen ti kinalinteg,+ ken ti babakmo babaen ti panangipakitam iti asi kadagidiay napanglaw.+ Bareng addanto panangyatiddog iti kinarang-aymo.’”+ 28  Isuamin daytoy napagteng ken Nabucodonosor nga ari.+ 29  Iti ngudo ti sangapulo ket dua a lunar a bulan isu magmagna idi iti rabaw ti naarian a palasio ti Babilonia. 30  Simmungbat ti ari ket kinunana:+ “Saan kadi a daytoy ti Babilonia a Dakkel, nga imbangonko a mismo maipaay iti naarian a balay babaen ti pigsa ti pannakabalinko+ ken maipaay iti dayaw ti kinatan-okko?”+ 31  Bayat a ti sao adda pay laeng iti ngiwat ti ari, adda timek a naggapu iti langlangit: “Maikuna kenka, O Nabucodonosor nga ari, ‘Ti met laeng pagarian naipanaw kenka,+ 32  ket pagtalawendaka iti sangatauan, ket dagiti animal iti tay-ak ti pakipagnaedamto.+ Ti ruruot iteddanto kenka a mismo tapno kanem kas kadagiti toro, ket pito a panawen a mismo ti aglabasto kenka, agingga a maammuam a ti Kangatuan isu ti Agturay iti pagarian ti sangatauan, ket itedna dayta iti daydiay kayatna.’”+ 33  Iti dayta a kanito+ natungpal ti mismo a sao ken Nabucodonosor, ket napagtalaw iti sangatauan, ket nangrugi a mangan iti ruruot kas kadagiti toro, ket ti bukodna a bagi nabasa iti linnaaw ti langlangit, agingga nga immatiddog ti mismo a buokna kas kadagiti dutdot ti agila, ken dagiti kukona kas kadagiti kuko dagiti tumatayab.+ 34  “Ket iti ngudo dagiti aldaw+ siak, ni Nabucodonosor, intangadko dagiti matak sadi langit,+ ket ti bukodko a pannakaawat nangrugi nga agsubli kaniak; ket binenditok ti Kangatuan a mismo,+ ket indaydayawko ken intan-okko Daydiay sibibiag agingga iti tiempo a di nakedngan,+ agsipud ta ti panagturayna maysa a panagturay agingga iti tiempo a di nakedngan ket ti pagarianna agpaay iti kinapkaputotan.+ 35  Ket amin dagiti agnanaed iti daga maibilbilangda a kas awan kapapay-anna,+ ket isu agar-aramid maitunos iti bukodna a pagayatan iti tengnga ti buyot ti langlangit ken dagiti agnanaed iti daga.+ Ket awan makamedmed iti imana+ wenno makapagkuna kenkuana, ‘Ania ti inar-aramidmo?’+ 36  “Iti isu met laeng a tiempo nangrugi nga agsubli kaniak ti mismo a pannakaawatko, ket ti met laeng kinatan-okko ken ti kinaraniagko nangrugi nga agsubli kaniak maipaay iti dayaw ti pagariak;+ ket uray dagiti nangato a naarian nga opisialko ken dagiti natan-okko rinugiandak a biroken a sigagagar, ket naipasdekak manen iti bukodko a pagarian, ket nainayon kaniak ti nalablabes a kinanaindaklan.+ 37  “Itan siak, ni Nabucodonosor, idaydayawko ken itantandudok ken itantan-okko ti Ari ti langlangit,+ agsipud ta amin dagiti aramidna kinapudno ket ti daldalanna kinahustisia,+ ken agsipud ta kabaelanna nga ipababa dagidiay magmagna a sipapannakkel.”+

Footnotes