Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Daniel 3:1-30

3  Ni Nabucodonosor nga ari nangaramid iti ladawan+ a balitok, a ti kangatona innem a pulo a kasiko ket ti kaakabana innem a kasiko. Impasdekna iti tanap ti Dura iti masaksakupan a distrito ti Babilonia.+  Ket ni met laeng Nabucodonosor kas ari nagbaon tapno ummongen dagiti satrapa, dagiti prepekto+ ken dagiti gobernador, dagiti manangbalakad, dagiti tesorero, dagiti ukom, dagiti mahistrado ti polisia+ ken dagiti amin nga administrador dagiti masaksakupan a distrito tapno umayda iti inagurasion+ ti ladawan nga impasdek ni Nabucodonosor nga ari.  Iti dayta a tiempo naguurnong dagiti satrapa,+ dagiti prepekto ken dagiti gobernador, dagiti manangbalakad, dagiti tesorero, dagiti ukom, dagiti mahistrado ti polisia ken dagiti amin nga administrador dagiti masaksakupan a distrito maipaay iti inagurasion ti ladawan nga impasdek ni Nabucodonosor nga ari, ket nagtaktakderda iti sanguanan ti ladawan nga impasdek ni ari Nabucodonosor.  Ket ti agiwarwaragawag+ ipukpukkawna idi a sipipigsa: “Maikunkuna kadakayo, O il-ili, nasional a bungbunggoy ken pagsasao,+  nga iti tiempo a mangngegyo ti uni ti tangguyob, ti pito, ti sitara, ti tallo ti sulina nga arpa, ti pagtokar nga adda kuerdasna, ti gaita ken dagiti amin a kita ti pagtokar iti musika,+ agruknoy ken agdayawkayo iti ladawan a balitok nga impasdek ni Nabucodonosor nga ari.  Ket siasinoman a saan nga agruknoy ken agdayaw+ maipalladawto iti gumilgil-ayab a naapuy nga urno+ iti isu met laeng a kanito.”+  Gapu itoy, iti isu met laeng a tiempo bayat a mangmangngeg amin dagiti ili ti uni ti tangguyob, ti pito, ti sitara, ti tallo ti sulina nga arpa, ti pagtokar nga adda kuerdasna ken dagiti amin a kita ti pagtokar iti musika, amin dagiti ili,+ nasional a bungbunggoy ken pagsasao nagruknoy ken nagdayawda iti ladawan a balitok nga impasdek ni Nabucodonosor nga ari.  Gapu itoy, iti daydi met laeng a tiempo immasideg ti sumagmamano a Caldeo ket inakusarda dagiti Judio.+  Simmungbatda, ket kinunada ken Nabucodonosor nga ari: “O ari, agbiagka uray agingga kadagiti tiempo a di nakedngan.+ 10  Sika, O ari, impasdekmo ti bilin a tunggal tao a makangngeg iti uni ti tangguyob, ti pito, ti sitara, ti tallo ti sulina nga arpa, ti pagtokar nga adda kuerdasna, ken ti gaita ken dagiti amin a kita ti pagtokar iti musika,+ rebbeng nga agruknoy ken agdayaw iti ladawan a balitok; 11  ket siasinoman a di agruknoy ken agdayaw maipalladawto iti gumilgil-ayab a naapuy nga urno.+ 12  Adda sumagmamano a Judio a dinutokam iti panangaywan iti masaksakupan a distrito ti Babilonia,+ da Sidrac, Mesac ken Abednego; dagitoy a nabaneg a lallaki saandaka a rinaem, O ari, saanda a pagserserbian ti bukodmo a didios, ket ti ladawan a balitok nga impasdekmo saanda a pagdaydayawan.”+ 13  Iti dayta a tiempo kinuna ni Nabucodonosor, iti pungtot ken rungsotna,+ a maiyeg da Sidrac, Mesac ken Abednego.+ Iti kasta dagitoy a nabaneg a lallaki naiyegda iti sanguanan ti ari. 14  Simmungbat ni Nabucodonosor ket kinunana kadakuada: “Pudno kadi a kasta, O Sidrac, Mesac ken Abednego, a saanyo a pagserserbian ti bukodko a didios,+ ket ti ladawan a balitok nga impasdekko saanyo a pagdaydayawan?+ 15  Ita no nakasaganakayon tapno inton mangngegyo ti uni ti tangguyob, ti pito, ti sitara, ti tallo ti sulina nga arpa, ti pagtokar nga adda kuerdasna, ken ti gaita ken dagiti amin a kita ti pagtokar iti musika,+ agruknoy ken agdayawkayo iti ladawan nga inaramidko, naimbag. Ngem no dikay agdayaw, iti dayta met laeng a kanito maipalladawkayto iti gumilgil-ayab a naapuy nga urno. Ket siasino dayta a dios a makabael a mangalaw kadakayo manipud iti im-imak?”+ 16  Simmungbat da Sidrac, Mesac ken Abednego, ket kinunada iti ari: “O Nabucodonosor, iti daytoy a banag saan a kasapulan a sungbatandaka iti sao.+ 17  No maipalladawkami, ti Diosmi a pagserserbianmi kabaelannakami nga alawen. Manipud iti gumilgil-ayab a naapuy nga urno ken manipud iti imam, O ari, isu alawennakamto.+ 18  Ngem no saan, maipakaammo koma kenka, O ari, a ti didiosmo saan nga isuda ti pagserbianmi, ket ti ladawan a balitok nga impasdekmo saanminto a pagdayawan.”+ 19  Iti daydin a ni met laeng Nabucodonosor napno iti rungsot, ket ti mismo a langa ti rupana nagbaliw kada Sidrac, Mesac ken Abednego. Simmungbat ket kinunana a papudotenda ti urno iti mamimpito nga ad-adda ngem iti kadawyan a pannakapapudotna. 20  Ket iti sumagmamano a nabaneg a lallaki a nakired+ isuda nga adda iti puersa militarna kinunana a reppetenda da Sidrac, Mesac ken Abednego, tapno ipalladaw ida iti gumilgil-ayab a naapuy nga urno.+ 21  Iti daydin a naparautan dagitoy a nabaneg a lallaki a sikakapet dagiti kagayda, dagiti kawesda ken dagiti gorada ken ti dadduma a pagan-anayda ket naipalladawda iti gumilgil-ayab a naapuy nga urno. 22  Gapu ta nagubsang ti sao ti ari ket ti urno napapudot iti nakalablabes, dagitoy a nabaneg a lallaki a nangbagkat kada Sidrac, Mesac ken Abednego isuda ti pinatay ti umap-apuy a gil-ayab. 23  Ngem dagitoy sabsabali a nabaneg a lallaki, isuda a tallo, da Sidrac, Mesac ken Abednego, natnagda a sipaparaut iti tengnga ti gumilgil-ayab a naapuy nga urno.+ 24  Iti daydi a tiempo naaliaw a mismo ni Nabucodonosor nga ari ket timmakder a sidadaras. Simmungbat ket kinunana kadagiti nangato a naarian nga opisialna: “Saan kadi a tallo a nabaneg a lallaki ti impalladawtayo a sipaparaut iti tengnga ti apuy?”+ Simmungbatda ket kinunada iti ari: “Wen, O ari.” 25  Simmungbat ket kinunana: “Adtoy! Makitkitak ti uppat a nabaneg a lallaki nga agpagnapagna a siwayawaya iti tengnga ti apuy, ket saanda a nasaktan, ket ti langa daydiay maikapat umarngi iti anak ti didios.”+ 26  Iti daydin nga immasideg ni Nabucodonosor iti ruangan ti gumilgil-ayab a naapuy nga urno.+ Simmungbat ket kinunana: “Sidrac, Mesac ken Abednego, dakayo nga ad-adipen ti Kangatuan a Dios,+ rummuarkayo ket umaykayo ditoy!” Iti dayta a tiempo rimmuar da Sidrac, Mesac ken Abednego manipud iti tengnga ti apuy. 27  Ket dagiti satrapa, dagiti prepekto ken dagiti gobernador ken dagiti nangato nga opisial+ ti ari a naummong makitkitada idi dagitoy a nabaneg a lallaki, a ti apuy awanan pannakabalin iti bagbagida,+ ket awan nasiraman a buok ti uloda,+ ket uray dagiti kagayda saan a nabaliwan ket ti angot ti mismo nga apuy saan a dimket kadakuada. 28  Simmungbat ni Nabucodonosor ket kinunana: “Bendito koma ti Dios da Sidrac, Mesac ken Abednego,+ a nangibaon iti anghelna+ ken nangalaw kadagiti adipenna a nagtalek kenkuana+ ken namagbalbaliw iti mismo a sao ti ari ken nangyawat iti bagbagida, agsipud ta saanda a pagserbian+ ken saanda a pagdayawan+ a pulos ti aniaman a dios malaksid iti bukodda a Dios.+ 29  Ket manipud kaniak maituyang ti maysa a bilin,+ nga aniaman nga ili, nasional a bunggoy wenno pagsasao nga agsao iti aniaman a di umiso maibusor iti Dios da Sidrac, Mesac ken Abednego rebbeng a marangrangkay,+ ket ti balayna mapagbalin a publiko a pagiblengan;+ yantangay awan ti sabali a dios a makabael a mangispal a kas iti daytoy.”+ 30  Iti dayta a tiempo, ti met laeng ari pinagrang-ayna da Sidrac, Mesac ken Abednego iti masaksakupan a distrito ti Babilonia.+

Footnotes