Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Daniel 2:1-49

2  Ket iti maikadua a tawen ti panagari ni Nabucodonosor, nagtagtagainep ni Nabucodonosor kadagiti tagtagainep;+ ket nangrugi a mariribukan ti espirituna,+ ket saanna a maala ti mismo a tuturoganna.  Gapuna nagsao ti ari a maayaban ti managsalamangka a papadi+ ken dagiti aran ken dagiti mangkukulam ken dagiti Caldeo tapno ibagada iti ari dagiti tagtagainepna.+ Ket simrekda ket nagtakderda iti sanguanan ti ari.  Idin kinuna kadakuada ti ari: “Adda tagtagainep a natagtagainepko, ket ti espirituk mariribukan a mangammo iti tagtagainep.”  Iti kasta dagiti Caldeo nagsaoda iti ari iti pagsasao nga Aramaiko:+ “O ari, agbiagka uray agingga kadagiti tiempo a di nakedngan.+ Sawem kadagiti adipenmo no ania ti tagtagainep, ket iparangminto ti mismo a kayuloganna.”+  Simmungbat ti ari ket kinunana kadagiti Caldeo: “Ti sao ipaulogko: No dikay ipakaammo kaniak ti tagtagainep, ken ti kayuloganna, marangrangkaykayto,+ ket dagiti bukodyo a balay mapagbalinto a publiko a pagiblengan.+  Ngem no iparangyonto ti tagtagainep ken ti kayuloganna, awatenyonto iti biangko ti sagsagut ken maysa a rangkap ken adu a dayaw.+ Gapuna iparangyo kaniak ti mismo a tagtagainep ken ti kayuloganna.”  Simmungbatda iti maikadua a daras ket kinunada: “Sawen koma ti ari kadagiti adipenna no ania ti tagtagainep, ket iparangminto ti mismo a kayuloganna.”  Simmungbat ti ari ket kinunana: “Iti kinapudnona, ammok a tiempo ti padpadasenyo nga ibaybayag, yantangay nakitayo a ti sao ipaulogko.  Ta no saanyo nga ipakaammo kaniak ti mismo a tagtagainep, daytoy maymaysa laeng a sentensia+ maipatay kadakayo. Ngem naulbod ken di umiso a sao ti nagaanamonganyo a sawen iti sanguanak,+ agingga a mabaliwan ti mismo a tiempo. Gapuna ibagayo kaniak ti mismo a tagtagainep, ket maammuakto a kabaelanyo nga iparang ti mismo a kayuloganna.” 10  Simmungbat dagiti Caldeo iti sanguanan ti ari, ket kinunada: “Awan ti tao iti namaga a daga a makabalin a mangiparang iti banag ti ari, yantangay awan ti naindaklan nga ari wenno gobernador a nagkiddaw iti kas itoy a banag iti asinoman a padi a managsalamangka wenno aran wenno Caldeo. 11  Ngem nakarigrigat ti banag a kidkiddawen ti mismo nga ari, ket awanen ti asinoman a makaiparang iti dayta iti sanguanan ti ari malaksid iti didios,+ a ti bukodda a pagnaedan saan a pulos masarakan iti lasag.”+ 12  Gapu itoy nakaunget ti mismo nga ari ket nagrungsot unay,+ ket insaona a madadael amin dagiti masirib a tattao ti Babilonia.+ 13  Ket rimmuar ti mismo a bilin, ket mapapatayen dagiti masirib a tattao; ket sinapulda ni Daniel ken dagiti kaduana, tapno mapapatayda. 14  Iti dayta a tiempo, ni Daniel, iti biangna, buyogen ti pammatigmaan ken kinamanakem+ nagsao a mismo ken Arioc a panguluen ti para-guardia ti ari, a rimmuar a mangpapatay kadagiti masirib a tattao ti Babilonia. 15  Simmungbat ket kinunana ken Arioc nga opisial ti ari: “Iti ania a rason nga adda ti kasta a nagubsang a bilin iti biang ti ari?” Iti daydin a ni Arioc impakaammona ken Daniel dayta met laeng a banag.+ 16  Gapuna ni met laeng Daniel simrek ket dinawatna iti ari nga ikkanna koma iti tiempo a mangiparang a silalawag iti mismo a kayulogan iti ari.+ 17  Kalpasan dayta napan ni Daniel iti bukodna a balay; ket impakaammona ti banag kada Hananias, Misael ken Azarias a kakaduana, 18  tapno agkiddawda a mismo kadagiti asi+ iti biang ti Dios ti langit+ maipapan itoy a palimed,+ tapno iti kasta saanda koma a dadaelen ni Daniel ken ti kakaduana a mairaman kadagiti nabatbati a masirib a tattao ti Babilonia.+ 19  Iti daydin nga iti sirmata iti rabii naipalgak ken Daniel ti palimed.+ Iti kasta ni met laeng Daniel binenditona+ ti Dios ti langit. 20  Simmungbat ni Daniel ket kinunana: “Bendito koma ti nagan ti Dios+ manipud tiempo a di nakedngan agingga a mismo iti tiempo a di nakedngan, gapu iti sirib ken kinamannakabalin—ta kukuana ida.+ 21  Ket pagbalbaliwenna dagiti tiempo ken pampanawen,+ mangikkat iti ar-ari ken mangipasdek iti ar-ari,+ mangted iti sirib kadagidiay mamasirib ken pannakaammo kadagidiay makaammo iti panangilasin.+ 22  Ipalgakna ti nauneg a bambanag ken ti natalimeng a bambanag,+ ammona no ania ti adda iti sipnget;+ ket makipagnaed kenkuana ti lawag.+ 23  Kenka, O Dios dagidi ammak, mangipaayak iti daydayaw ken pammadayaw,+ agsipud ta inikkannak iti sirib+ ken kinamannakabalin. Ket ita impakaammom kaniak ti kiniddawmi kenka, ta impakaammom kadakami ti mismo a banag ti ari.”+ 24  Gapu itoy ni met laeng Daniel simrek a napan ken Arioc,+ a dinutokan ti ari a mangdadael kadagiti masirib a tattao ti Babilonia.+ Isu napan, ket daytoy ti kinunana kenkuana: “Dika dadaelen ti asinoman kadagiti masirib a tattao ti Babilonia. Iserreknak iti sanguanan ti ari,+ tapno maiparangko ti mismo a kayulogan iti ari.” 25  Iti daydin a ni Arioc, nga agdardaras, inserrekna ni Daniel iti sanguanan ti ari, ket daytoy ti kinunana kenkuana: “Nakasarakak iti nabaneg a lalaki kadagiti destiero+ ti Juda a makabalin a mangipakaammo iti mismo a kayulogan iti ari.” 26  Simmungbat ti ari ket kinunana ken Daniel, nga agnagan Baltazar:+ “Naan-anay kadi a makabaelka a mangipakaammo kaniak iti tagtagainep a nakitak, ken ti kayuloganna?”+ 27  Simmungbat ni Daniel iti sanguanan ti ari ket kinunana: “Ti palimed nga im-imtuoden a mismo ti ari, dagiti masirib a tattao, dagiti aran, ti managsalamangka a papadi ken dagiti astrologo saanda a mismo a kabaelan nga iparang iti ari.+ 28  Nupay kasta, adda maysa a Dios iti langlangit a Manangipalgak kadagiti palimed,+ ket impakaammona ken Ari Nabucodonosor no ania ti mapasamak iti kamaudianan a paset dagiti aldaw.+ Ti tagtagainepmo ken dagiti sirmata ti ulom iti pagiddaam—isu daytoy: 29  “No maipapan kenka, O ari, iti pagiddaam+ timpuar dagiti bukodmo a panunot maipapan iti mapasamak kalpasan daytoy, ket impakaammo kenka Daydiay a Manangipalgak kadagiti palimed no ania ti mapasamak.+ 30  Ket no maipapan kaniak, daytoy a palimed naipalgak kaniak saan a babaen iti aniaman nga adda kaniak a sirib a nangnangruna ngem iti asinoman a sabsabali pay a sibibiag,+ malaksid iti panggep a ti kayulogan maipakaammo koma iti mismo nga ari ket maammuam koma dagiti kapanunotan ta pusom.+ 31  “Sika, O ari, kumitkitaka idi, ket, adtoy! maysa a nagdakkelan a ladawan. Dayta a ladawan, a dakkel ken nalablabes ti kinaraniagna, sitatakder idi iti sanguanam, ket makapaalinggaget ti langana. 32  No maipapan iti dayta a ladawan, ti ulona nasayaat a balitok,+ ti barukongna ken dagiti takiagna pirak,+ ti tianna ken dagiti luppona gambang,+ 33  dagiti gurongna landok,+ dagiti sakana sangkapaset a landok ken sangkapaset a sinukog a pila.+ 34  Nagtultuloyka a kimmita agingga a ti maysa a bato natikap saan a babaen kadagiti ima,+ ket kinabilna ti ladawan kadagiti sakana a landok ken sinukog a pila ket rinumekna ida.+ 35  Iti dayta a tiempo narumek ti landok, ti sinukog a pila, ti gambang, ti pirak ken ti balitok, isuda amin, ket nagbalinda a kas iti taep manipud iti pagirikan iti kalgaw,+ ket impanaw ida ti angin iti kasta awan a pulos ti masarakan a pangtuntonan kadakuada.+ Ket no maipapan iti bato a nangkabil iti ladawan, nagbalin a dakkel a bantay ket pinunnona ti intero a daga.+ 36  “Daytoy ti tagtagainep, ket ti kayuloganna sawenmi iti sanguanan ti ari.+ 37  Sika, O ari, ti ari dagiti ar-ari, sika a nangtedan ti Dios ti langit iti pagarian,+ iti pannakabalin, ken iti pigsa ken iti dayaw, 38  ken sika nga ita imam intedna,+ sadinoman a pagnanaedan ti annak ti sangatauan, dagiti animal iti tay-ak ken dagiti nagpayak a parsua iti langlangit, ken sika a pinagbalinna nga agturay kadakuada amin, sika ti ulo a balitok.+ 39  “Ket iti kalpasam addanto tumakder a sabali a pagarian+ a nababbaba ngem sika;+ ken sabali pay a pagarian, daydiay maikatlo, a gambang, nga agturayto iti intero a daga.+ 40  “Ket no maipapan iti maikapat a pagarian,+ napigsanto a kas iti landok.+ Yantangay ti landok rumeken ken mekmekenna ti isuamin a sabsabali, gapuna, kas iti landok a mangburak, rumeken ken burakennanto uray amin dagitoy.+ 41  “Ket idinto ta nakitam dagiti saka ken dagiti ramay a sangkapaset a sinukog a pila ti agdamdamili ken sangkapaset a landok,+ ti met laeng pagarian mabingbingayto,+ ngem addanto iti dayta ti kasla katangken ti landok, yantangay nakitam a ti landok nailaok iti nabasa a pila.+ 42  Ket no maipapan iti ramramay dagiti saka a sangkapaset a landok ken sangkapaset a sinukog a pila, ti sangkapaset ti pagarian napigsanto ket ti sangkapaset narasinto. 43  Idinto ta nakitam a ti landok nailaok iti nabasa a pila, mailaokdanto kadagiti putot ti sangatauan; ngem saandanto nga agdedekket, daytoy iti daydiay, no kasano a ti landok saan a makilaok iti sinukog a pila. 44  “Ket iti kaaldawan dagidiay nga ar-ari+ mangipasdekto ti Dios ti langit+ iti maysa a pagarian+ a saanto a pulos madadael.+ Ket ti met laeng pagarian saanto a mayawat iti aniaman a sabali nga ili.+ Rumekennanto ken pagpatinggaenna amin dagitoy a pagarian,+ ket dayta agtalinaedto agingga kadagiti tiempo a di nakedngan;+ 45  yantangay nakitam a manipud iti bantay natikap ti maysa a bato a saan a babaen kadagiti ima,+ ket rinumekna ti landok, ti gambang, ti sinukog a pila, ti pirak ken ti balitok.+ Ti met laeng Naindaklan a Dios+ impakaammona iti ari no ania ti mapasamak kalpasan daytoy.+ Ket ti tagtagainep mapagtalkan, ket ti kayuloganna mapagpiaran.”+ 46  Iti dayta a tiempo inruknoy ni Ari Nabucodonosor a mismo ti rupana, ket nagraem ken Daniel, ket kinunana a mangidiaya pay kenkuana iti rangkap ken insienso.+ 47  Ti ari simmungbat ken Daniel ket kinunana: “Pudno unay a ti Diosyo ket Dios dagiti didios+ ken Apo ti ar-ari+ ken Manangipalgak kadagiti palimed, agsipud ta nabaelam nga ipalgak daytoy a palimed.”+ 48  Iti kasta ti ari pinagbalinna ni Daniel a maysa a naindaklan,+ ket nangted kenkuana iti adu a dadakkel a sagut, ket pinagbalinna nga agturay iti intero a masaksakupan a distrito ti Babilonia+ ken panguluen a prepekto kadagiti amin a masirib a tattao ti Babilonia. 49  Ket ni Daniel, iti biangna, nagkiddaw iti ari, ket dinutokanna da Sidrac, Mesac ken Abednego iti panangaywan iti masaksakupan a distrito ti Babilonia,+ ngem ni Daniel adda idi iti palasio+ ti ari.

Footnotes