Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Aramid 28:1-31

28  Ket idi nakagtengkamin a sitatalged, iti kasta naammuanmi a ti isla naawagan ti Malta.+  Ket dagiti ganggannaet-pagsasaoda a tattao impakitaandakami iti naisangsangayan a natauan a kinamanangngaasi,+ ta nangpasgedda iti apuy ket inawatdakami amin buyogen ti panangtulong gapu iti tudo nga agtintinnag idi ken gapu iti lam-ek.+  Ngem idi nangummong ni Pablo iti sangareppet a ruting ket inkabilna dayta iti apuy, rimmuar ti maysa a karasaen gapu iti pudot ket kimpet iti imana.  Idi a dagiti ganggannaet-pagsasaoda a tattao nakitada ti nagita a parsua nga agbitbitin iti imana, rinugianda a kinuna iti maysa ken maysa: “Sigurado a daytoy a tao ket manangpapatay, ket uray nakagteng a sitatalged manipud iti baybay, ti manangibales a hustisia saanna a pinalubosan nga agtultuloy nga agbiag.”  Nupay kasta, inwagsina ti nagita a parsua iti apuy ket saan a nadangran.+  Ngem padpadaananda nga isu lumteg nga agebbal wenno kellaat a mapasag a matay. Kalpasan a nagurayda iti nabayag ken nakitada nga awan ti aniaman a makapasakit a napasamak kenkuana, binaliwanda ti panunotda ket inrugida a kinuna nga isu maysa a dios.+  Ita iti arubayan dayta a lugar addaan dagdaga ti kangrunaan a tao iti isla, a managan Publio; ket inawatnakami buyogen ti kinamanagpadagus ken sipaparabur a sinangailinakami iti tallo nga aldaw.  Ngem napasamak a ti ama ni Publio siiidda a naparigatan iti gurigor ken sika, ket ni Pablo simrek a napan kenkuana ket nagkararag, impatayna kenkuana dagiti imana+ ket pinaimbagna.+  Kalpasan a napasamak daytoy, dadduma kadagiti tattao iti isla nga addaan saksakit nangrugida met nga umay kenkuana ken maagasan.+ 10  Ket pinadayawandakami met babaen iti adu a sagut ket, idi aglayagkamin, pinaawitandakami iti bambanag maipaay kadagiti kasapulanmi. 11  Tallo a bulan kalpasanna naglayagkami iti maysa a barangay manipud Alejandria+ a nagpalabas iti kalam-ekna iti isla ken addaan parupa a tanda nga “Annak ni Zeus.” 12  Ket idi simmangladkami idiay Siracusa nagtalinaedkami iti tallo nga aldaw, 13  a manipud iti dayta a lugar nanglikawkami ket dimtengkami idiay Regio. Ket maysa nga aldaw kalpasanna timmaud ti abagat ket nakagtengkami idiay Puteoli iti maikadua nga aldaw. 14  Ditoy nakasarakkami kadagiti kakabsat ket naipakpakaasi kadakami nga agtalinaedkami kadakuada iti pito nga aldaw; ket iti kastoy a pamay-an nakapankami idiay Roma. 15  Ket manipud sadiay dagiti kakabsat, idi nangngegda ti damag maipapan kadakami, immayda simmabat kadakami agingga idiay Plasa ni Appio ken idiay Tallo a Taberna ket, idi makitana ida, ni Pablo nagyaman iti Dios ket bimmileg.+ 16  Idi nga, iti kamaudiananna, simrekkami idiay Roma, napalubosan+ ni Pablo nga agmaymaysa a kadua ti soldado a mangbambantay kenkuana. 17  Nupay kasta, tallo nga aldaw kalpasanna inayabanna a sangsangkamaysa dagidiay kangrunaan a lallaki dagiti Judio. Idi nakapaguummongdan, kinunana kadakuada: “Lallaki, kakabsat, nupay awan naaramidko a maibusor kadagiti umili wenno kadagiti kaugalian dagidi ammatayo,+ nayawatak a kas balud manipud Jerusalem iti im-ima dagiti taga Roma.+ 18  Ket dagitoy, kalpasan ti panangusigda,+ tinarigagayandak a luk-atan,+ ta awan ti gapu a papatayendak.+ 19  Ngem idi a dagiti Judio intultuloyda ti nagsao a maibusor iti dayta, napilitanak nga agapelar+ ken Cesar, ngem saan a kasla addaanak iti aniaman a pangakusaran iti nasionko. 20  Pudno a maigapu itoy nagpakaasiak a kitaen ken kasaokayo, ta gapu iti namnama+ ti Israel naiparaut kaniak daytoy a kawar.”+ 21  Kinunada kenkuana: “Saankami nga immawat kadagiti surat maipapan kenka manipud Judea, awan met ti asinoman kadagiti kakabsat a dimteng ti nangipadamag wenno nangisao iti aniaman a banag a dakes maipapan kenka. 22  Ngem pagarupenmi nga umiso a dumngegkami kenka no ania dagiti kapanunotam, ta pudno a no maipapan itoy a sekta+ naammuanmi a masupsupiat iti isuamin a lugar.”+ 23  Nangyurnosda itan iti maysa nga aldaw a makikaduada kenkuana, ket immayda kenkuana iti ad-adu a bilang idiay pagdagdagusanna. Ket inlawlawagna kadakuada ti banag babaen ti naan-anay a panangsaksina maipapan iti pagarian ti Dios+ ken babaen ti panangusarna iti panangguyugoy kadakuada maipapan ken Jesus agpadpada manipud iti linteg ni Moises+ ken kadagiti Mammadto,+ manipud iti bigat agingga iti rabii. 24  Ket ti sumagmamano nangrugida a mamati+ iti bambanag a naisao; ti dadduma saanda a mamati.+ 25  Iti kasta, agsipud ta saanda nga agtutunos iti maysa ken maysa, nangrugida a pumanaw, bayat nga ipapaay ni Pablo daytoy maysa a komento: “Ti nasantuan nga espiritu mayanatup ti panagsaona kadagidi ammayo babaen ken Isaias a mammadto, 26  a kunkunana, ‘Inka iti daytoy nga ili ket kunaem: “Iti panagdengngeg, makangngegkayto ngem saanyonto a pulos maawatan; ket, iti panangkita, kumitakayto ngem saanyonto a pulos makita.+ 27  Ta ti puso daytoy nga ili nagbalin a di makaawat, ket kadagiti lapayagda dimngegda nga awanan panagtignay, ket inkidemda dagiti matada; tapno saanda a pulos makakita kadagiti matada ken makangngeg kadagiti lapayagda ken makaawat kadagiti pusoda ket agsublida, ket paimbagek ida.”’+ 28  Ngarud maipakaammo koma kadakayo a daytoy, ti pamay-an a panangisalakan ti Dios, naipanen kadagiti nasion;+ sigurado nga umimdengdanto iti dayta.”+ 29  —— 30  Gapuna isu nagtalinaed iti intero a dua a tawen iti bukodna nga ab-abangan a balay,+ ket siaayat nga awatenna amin dagidiay umay kenkuana, 31  nga ikaskasabana kadakuada ti pagarian ti Dios ken isursurona ti bambanag maipapan ken Apo Jesu-Kristo buyogen ti dakkel unay a wayawaya nga agsao,+ nga awan lappedna.

Footnotes