Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Aramid 24:1-27

24  Lima nga aldaw kalpasanna simmalog ti nangato a padi a ni Ananias+ agraman sumagmamano a lallakay ken maysa a pumapalawag iti publiko, maysa a Tertulo, ket nangtedda ti pakaammo+ iti gobernador+ maibusor ken Pablo.  Idi naayaban, rinugian nga akusaren ni Tertulo, a kunkunana: “Yantangay tagtagiragsakenmi ti dakkel a talna+ gapu kenka ket dagiti panangpasayaat maar-aramid iti daytoy a nasion gapu iti nasakbay a panagpampanunotmo,  iti amin a tiempo ken kasta met iti amin a lugar awatenmi dayta, Natan-ok Unay+ a Felix, buyogen ti kadakkelan a kinamanagyaman.  Ngem tapno saankan a malappedan pay, dawatek kenka a denggennakami iti apagbiit iti kinaasim.  Ta nasarakanmi a daytoy a lalaki peste+ a tao ken mangparparnuay kadagiti iyaalsa+ iti tengnga dagiti amin a Judio iti intero a mapagnaedan a daga ken maysa a dadaulo ti sekta dagiti Nazareno,+  maysa a nangpadas met a mangtabbaaw iti templo+ ken kinemmegmi.  ——  Manipud kenkuana babaen ti panangusig sika maammuam ti maipapan iti amin dagitoy a banag a pangak-akusaranmi kenkuana.”  Iti kasta dagiti Judio nakiramanda met iti panangatakar, nga ipappapilitda nga agpayso dagitoy a banag. 10  Ket ni Pablo, idi a ti gobernador nagtang-ed kenkuana tapno agsao, simmungbat: “Yantangay pagaammok unay nga ukomnaka daytoy a nasion iti adu a tawenen, sisasaganaak a mangisao iti bambanag maipapan iti bagik kas depensak,+ 11  ta adda karbengam a mangammo a no kaniak saan a nasursurok ngem sangapulo ket dua nga aldaw nanipud simmang-atak tapno agdaydayawak+ idiay Jerusalem; 12  ket saandak a nasarakan iti templo+ a makirikrikiar iti asinoman wenno uray mamagdaruros a sangsangkamaysa kadagiti managderraaw,+ uray kadagiti sinagoga wenno iti intero a siudad. 13  Saanda met a mapaneknekan+ kenka ti bambanag a pangak-akusaranda kaniak ita met laeng. 14  Ngem annugotek kenka daytoy, a, sigun iti dalan nga awaganda a ‘sekta,’ iti kastoy a pamay-an mangipapaayak ti sagrado a panagserbi iti Dios dagidi ammak,+ ta patiek ti amin bambanag a nailanad iti Linteg+ ken naisurat kadagiti Mammadto; 15  ket adda inanamak+ iti Dios, ti inanama nga ab-abrasaen met dagitoy a tattao, nga addanto panagungar+ agpadpada dagiti nalinteg+ ken dagiti nakillo.+ 16  Pudno unay, iti daytoy a banag agtultuloy a sansanayek ti bagik tapno sipupuot+ a di agsalungasing maikaniwas iti Dios ken kadagiti tattao. 17  Gapuna kalpasan ti adu a tawen dimtengak tapno mangyegak iti sagsagut ti asi iti nasionko, ken datdaton.+ 18  Bayat nga ar-aramidek dagitoy a banag nasarakandak idiay templo a nadalusanak babaen ti seremonia,+ ngem saan a kadua ti maysa a bunggoy wenno buyogen ti arimbangaw. Ngem adda idi sumagmamano a Judio manipud iti distrito ti Asia, 19  a rebbeng koma nga adda iti saklangmo ket akusarendak no addaanda iti aniaman a maibusor kaniak.+ 20  Wenno, sawen koma a mismo dagiti tattao nga adda ditoy no ania ti dakes a nasarakanda bayat a sitatakderak idi iti sanguanan ti Sanhedrin, 21  malaksid iti maipapan itoy maysa nga ebkas nga inyikkisko bayat a sitatakderak iti tengngada, ‘Maipapan iti panagungar dagiti natay mauk-ukomak ita nga aldaw iti sanguananyo!’”+ 22  Nupay kasta, ni Felix,+ gapu ta siuumiso unay nga ammona ti bambanag maipapan itoy a Dalan,+ inrugina a pagurayen dagiti lallaki ket kinunana: “Inton sumalog ni Lisias+ a komandante ti militar, mangngeddengakto kadagitoy a banag a nakairamananyo.” 23  Ket binilinna ti opisial ti buyot a ti lalaki maaywanan ken mapalag-anan iti pannakaipupok, ket saanna a pinaritan ti asinoman kadagiti kailianna nga agserbi kenkuana.+ 24  Sumagmamano nga aldaw kalpasanna simmangpet ni Felix+ agraman ni Drusila nga asawana, a maysa a Judia,+ ket pinaayabanna ni Pablo ket nagimdeng kenkuana maipapan iti panamati ken Kristo Jesus.+ 25  Ngem bayat nga agpalpalawag maipapan iti kinalinteg+ ken panagteppel+ ken iti pannakaukom+ nga umayto, nagbuteng ni Felix ket simmungbat: “Mapanka pay laeng ita, ngem inton maaddaanak iti nainggundawayan a tiempo paayabankanto manen.” 26  Kabayatanna, nupay kasta, nangin-inanama nga ikkan ni Pablo iti kuarta.+ Gapu iti dayta ad-adda pay ti kasansan ti panangpaayabna kenkuana ket makipatang kenkuana.+ 27  Ngem, idi naglabasen ti dua a tawen, ni Felix ket sinukatan ni Porcio Festo; ket agsipud ta tinarigagayan ni Felix a magun-odan ti pabor+ dagiti Judio, pinanawanna a sipaparaut ni Pablo.

Footnotes