Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Aramid 2:1-47

2  Itan bayat ti panagtultuloy ti aldaw ti piesta ti Pentecostes+ addada amin idi a sangsangkamaysa iti maymaysa a lugar,  ket pagammuan adda dimteng manipud langit nga ungor a kaasping ti ungor ti bumanesbes a napigsa a puyupoy, ket pinunnona ti intero a balay nga ayanda a pagtugtugawan.+  Ket nagparang kadakuada ti dildila a kasla iti apuy+ ket naibunongda, ket maysa ti nagdisso iti tunggal maysa kadakuada,  ket napnoda amin iti nasantuan nga espiritu+ ket nangrugida nga agsao iti nagduduma a pagsasao,+ kas iti impaay kadakuada ti espiritu tapno sawenda.  Ket napasamak, adda dagiti Judio nga agnanaed idiay Jerusalem,+ nadayaw a lallaki,+ manipud iti tunggal nasion nga adda iti baba ti langit.  Gapuna, idi napasamak daytoy a daranudor, ti umariwekwek naguurnongda ket nariribukanda, agsipud ta ti tunggal maysa nangngegna ida nga agsasao iti bukodna a pagsasao.  Kinapudnona, nagmalmalangada ket nangrugida nga agsiddaaw ken agkuna: “Kitaenyo daytoy, saan kadi nga amin dagitoy nga agsasao ket taga Galilea?+  Ket ngarud kasano a mangmangngegtayo, tunggal maysa kadatayo, ti bukodna a pagsasao a nakayanakantayo?  Dagiti taga Partia ken dagiti taga Media+ ken dagiti taga Elam,+ ken dagiti agnanaed iti Mesopotamia, ken Judea+ ken Capadocia,+ Ponto+ ken iti distrito ti Asia,+ 10  ken Frigia+ ken Pamfilia,+ Egipto ken kadagiti paset ti Libya, nga agturong iti Cirene, ken dagiti simmangbay manipud Roma, agpadpada dagiti Judio ken dagiti proselita,+ 11  dagiti Cretano+ ken Arabiano,+ mangmangngegtayo ida nga agsasao kadagiti pagsasaotayo maipapan iti natan-ok a bambanag ti Dios.” 12  Wen, nagmalmalangada amin ken nariribukanda, a kunkunada iti maysa ken maysa: “Ania ti ipasimudaag daytoy a banag?” 13  Nupay kasta, rinabrabak ida ti dadduma ket rinugianda a kunaen: “Napnoda iti nasam-it nga arak.”+ 14  Ngem timmakder ni Pedro agraman dagiti sangapulo ket maysa+ ket impigsana ti timekna ket insaona daytoy kadakuada: “Lallaki a taga Judea ken dakayo amin nga agnanaed iti Jerusalem,+ maipakaammo koma daytoy kadakayo ket imdenganyo ti sasaok. 15  Dagitoy a tattao, iti kinapudnona, saanda a nabartek,+ a kas iti panangipagarupyo, ta maikatlo nga oras pay laeng iti aldaw. 16  Iti kasupadina, isu daytoy ti naikuna babaen ken mammadto a Joel, 17  ‘“Ket kadagiti maudi nga aldaw,” kuna ti Dios, “mangiparukpokakto iti espirituk+ iti tunggal kita ti lasag, ket ti annakyo a lallaki ken ti annakyo a babbai agipadtodanto ket dagiti agtutuboyo a lallaki makakitadanto kadagiti sirmata ket dagiti lallakay kadakayo agtagtagainepdanto kadagiti tagtagainep;+ 18  ket uray kadagiti lallaki nga adipenko ken kadagiti babbai nga adipenko mangiparukpokakto iti espirituk kadagidiay nga aldaw, ket agipadtodanto.+ 19  Ket mangtedakto kadagiti tanda iti langit sadi ngato ken kadagiti pagilasinan iti daga ditoy baba, dara ken apuy ken angep ti asuk;+ 20  ti init+ mapagbalinto a sipnget ket ti bulan mapagbalin a dara sakbay a dumteng ti naindaklan ken nangayed nga aldaw ni Jehova.+ 21  Ket tunggal maysa nga umawag iti nagan ni Jehova maisalakanto.”’+ 22  “Lallaki a taga Israel, denggenyo dagitoy a sasao: Ni Jesus a Nazareno,+ maysa a lalaki nga imparang a silalatak kadakayo ti Dios babaen kadagiti mannakabalin nga aramid+ ken kadagiti tanda ken kadagiti pagilasinan nga inaramid ti Dios babaen kenkuana iti nagtetengngaanyo,+ a kas iti pagaammoyo a mismo, 23  daytoy a tao, kas maysa a nayawat babaen iti naikeddeng a pammatigmaan ken nasakbay a pannakaammo ti Dios,+ inlansayo iti kayo babaen ti ima dagiti nakillo a tattao ket pinapatayyo.+ 24  Ngem pinagungar ti Dios+ babaen ti panangwarwarna kadagiti ut-ot ni patay,+ agsipud ta di mabalin nga isu agtultuloy a tenglen a siiirut dayta.+ 25  Ta kuna ni David maipapan kenkuana, ‘Patinayon nga adda kaniak ni Jehova iti imatangko; agsipud ta isu adda iti makannawanko tapno saanakto a pulos agkintayeg.+ 26  Gapu itoy ti pusok maragragsakan ket ti dilak nagrag-o unay. Mainayon pay, uray ti lasagko agtaengto iti namnama;+ 27  agsipud ta saanmonto a baybay-an ti kararuak idiay Hades, saanmonto met nga ipalubos a daydiay nasungdom makitana ti panagrupsa.+ 28  Impakaammom kaniak dagiti dalan ti biag, punnuennakto iti panagragsak ita rupam.’+ 29  “Lallaki, kakabsat, maipalubos ti agsao kadakayo buyogen ti wayawaya nga agsao maipapan iti ulo ti pamilia a ni David, nga agpadpada a pimmusay+ ken naitabon ket ti tanemna adda kadatayo agingga itoy nga aldaw. 30  Gapuna, agsipud ta isu mammadto ken ammona a nagsapata kenkuana ti Dios iti maysa a sapata a pagtugawennanto iti tronona ti maysa a nagtaud iti bunga dagiti lomona,+ 31  nakitana a nasaksakbay ket nagsao maipapan iti panagungar ti Kristo, a saan a nabaybay-an iti Hades ket saan met a nakita ti lasagna ti panagrupsa.+ 32  Daytoy a Jesus pinagungar ti Dios, nga iti daytoy a kinapudno saksikami amin.+ 33  Gapuna agsipud ta naitan-ok iti makannawan ti Dios+ ket inawatna ti naikari a nasantuan nga espiritu manipud iti Ama,+ imparukpokna daytoy a makitkita ken mangmangngegyo. 34  Iti kinaagpaysuanna ni David saan nga immuli iti langlangit,+ ngem isu kunana, ‘Kinuna ni Jehova iti Apok: “Agtugawka iti makannawanko,+ 35  agingga nga ikabilko dagiti kabusormo a pagbatayan dagiti sakam.”’+ 36  Gapuna ammuen koma ti intero a balay ti Israel nga awan duadua a ti Dios pinagbalinna nga agpadpada nga Apo+ ken Kristo, daytoy Jesus nga inlansayo.”+ 37  Itan idi nangngegda daytoy naduyok dagiti pusoda,+ ket kinunada ken Pedro ken iti dadduma kadagiti apostol: “Lallaki, kakabsat, ania ti aramidenmi?”+ 38  Kinuna kadakuada ni Pedro: “Agbabawikayo,+ ket mabautisaran+ koma ti tunggal maysa kadakayo iti nagan+ ni Jesu-Kristo maipaay iti pannakapakawan+ dagiti basolyo, ket awatenyonto ti awan bayadna a sagut+ ti nasantuan nga espiritu. 39  Ta ti kari+ agpaay kadakayo ken iti annakyo ken kadagidiay amin nga adda iti adayo,+ kas iti kaadu ti ayaban ni Jehova a Diostayo.”+ 40  Ket buyogen ti adu a sabali pay a sasao naan-anay a nangsaksi ket binagbagaanna ida, a kunkunana: “Maisalakankayo iti daytoy nakillo a kaputotan.”+ 41  Gapuna nabautisaran dagidiay naimpusuan a nangabrasa iti saona,+ ket iti dayta nga aldaw nainayon ti agarup tallo ribu a kararua.+ 42  Ket intuloyda nga impamaysa ti bagbagida iti sursuro dagiti apostol ken iti panagririnnanud,+ kadagiti pannangan+ ken kadagiti panagkararag.+ 43  Kinapudnona, ti buteng nangrugi nga umapay iti tunggal kararua, ket adu a tanda ken pagilasinan ti nangrugi a mapasamak babaen kadagiti apostol.+ 44  Amin dagidiay nagbalin a manamati nagsangsangkamaysada a nagikut iti amin a bambanag a kas kukuada amin,+ 45  ket napanda inlako dagiti sanikua+ ken dagiti kukuada ket dagiti naglakuanda imbunongda kadagiti amin, kas iti pakasapulan ti asinoman.+ 46  Ket iti inaldaw-aldaw naynay a nagserserbida idiay templo buyogen ti panagkaykaysa,+ ket nakipanganda kadagiti pribado a pagtaengan ket nakiramanda iti taraon buyogen ti dakkel a panagrag-o+ ken kinapasnek ti puso, 47  nga indaydayawda ti Dios ket nakasarakda iti pabor kadagiti amin a tattao.+ Kabayatanna intultuloy ni Jehova nga itipon+ kadakuada iti inaldaw dagidiay maisalsalakan.+

Footnotes