Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Aramid 19:1-41

19  Iti panagtultuloy dagiti pasamak, bayat nga adda ni Apolos+ idiay Corinto, linasat ni Pablo ti nasulinek a paspaset ket dimteng idiay Efeso,+ ket nakasarak iti sumagmamano nga ad-adalan;  ket kinunana kadakuada: “Immawatkayo kadi iti nasantuan nga espiritu+ idi nagbalinkayo a manamati?” Kinunada kenkuana: “Ay ket, saanmi pay a pulos nangngegan no adda nasantuan nga espiritu.”+  Ket kinunana: “Iti ania, ngarud, ti nakabautisaranyo?” Kinunada: “Iti pammautisar ni Juan.”+  Kinuna ni Pablo: “Ni Juan nangbautisar iti bautismo kas simbolo ti panagbabawi,+ nga ibagbagana kadagiti tattao a mamatida iti daydiay um-umay a sumaruno kenkuana,+ kayatna a sawen, ni Jesus.”  Idi mangngegda daytoy, nabautisaranda iti nagan ni Apo Jesus.+  Ket idi a ni Pablo impatayna kadakuada dagiti imana,+ ti nasantuan nga espiritu immay kadakuada, ket nangrugida a nagsao kadagiti pagsasao ken nagipadto.+  Iti dagupda amin, adda agarup sangapulo ket dua a lallaki.  Idi simrek idiay sinagoga,+ nagsao a situtured iti tallo a bulan, a mangipapaay kadagiti palawag ken agus-usar iti panangguyugoy maipapan iti pagarian+ ti Dios.  Ngem idi a ti sumagmamano pinatangkenda ti bagbagida ket saanda a namati,+ a nagsasaoda iti makadangran maipapan Ti Dalan+ iti sanguanan ti umariwekwek, isu pimmanaw kadakuada+ ket insinana kadakuada dagiti adalan,+ nga inaldaw a nangipapaay kadagiti palawag idiay pagtataripnongan ti eskuelaan ni Tirano. 10  Napasamak daytoy iti dua a tawen,+ iti kasta amin dagidiay agnanaed iti distrito ti Asia+ nangngegda ti sao ti Apo, agpadpada dagiti Judio ken dagiti Griego. 11  Ket ti Dios intultuloyna nga inaramid dagiti karkarna nga aramid ti pannakabalin babaen kadagiti ima ni Pablo,+ 12  iti kasta uray dagiti lupot ken dagiti bidang manipud iti bagina naitedda kadagiti masaksakit a tattao,+ ket dagiti sagubanit pimmanaw kadakuada, ket rimmuar dagiti nadangkes nga espiritu.+ 13  Ngem sumagmamano kadagiti agsursursor a Judio a mangan-annurot met iti panangparuar kadagiti sairo+ ginayagayda nga awagan ti nagan ni Apo Jesus+ kadagidiay addaan kadagiti nadangkes nga espiritu, a kunkunada: “Sipapasnek a bilinenkayo+ babaen ken Jesus nga ikaskasaba ni Pablo.” 14  Ita adda pito nga annak ti maysa a Sceva, a panguluen a padi a Judio, a mangar-aramid iti daytoy. 15  Ngem kas sungbat kinuna kadakuada ti nadangkes nga espiritu: “Ammok ni Jesus+ ket am-ammok ni Pablo;+ ngem siasinokayo?” 16  Gapu iti dayta ti tao nga ayan ti nadangkes nga espiritu limmagto iti rabawda,+ agsasaruno a pinarukmana ida, ket inabakna ida, iti kasta nagtalawda a lamolamo ken sugatsugat manipud iti dayta a balay. 17  Naammuan daytoy ti isuamin, agpadpada dagiti Judio ken dagiti Griego a nagnaed idiay Efeso; ket immapay kadakuada amin ti panagbuteng,+ ket ti nagan ni Apo Jesus nagtultuloy a naitan-ok.+ 18  Ket adu kadagidiay nagbalin a manamati umayda ket ipudnoda+ ken sipapanayag nga ipadamagda dagiti aramidda. 19  Kinapudnona, adu kadagidiay nangan-annurot kadagiti arte ti panagsalamangka+ inyegda a pinagkaykaysa dagiti libroda ket pinuoranda ida iti sanguanan ti isuamin. Ket pinattapattada a sangsangkamaysa dagiti gatadda ket nasarakanda nga agpategda iti limapulo ribu a kapisi ti pirak. 20  Ngarud iti nabileg a pamay-an nagtultuloy a rimmang-ay ken nagballigi ti sao ni Jehova.+ 21  Ita idi nalpasen dagitoy a banag, pinanggep ni Pablo iti espirituna a, kalpasan ti ilalasatna iti Macedonia+ ken Acaya, agbaniaga a mapan idiay Jerusalem,+ a kunkunana: “Kalpasan a makapanak sadiay masapul a kitaek met ti Roma.”+ 22  Gapuna imbaonna idiay Macedonia ti dua kadagidiay nagserbi kenkuana, da Timoteo+ ken Erasto,+ ngem isu nagtaktak iti sumagmamano a tiempo idiay distrito ti Asia. 23  Iti dayta a mismo a tiempo adda timmaud a saan a bassit a riribuk+ maipapan Ti Dalan.+ 24  Ta ti maysa a lalaki a managan Demetrio, nga agpampanday iti pirak, babaen ti panagaramid iti pirak a sinantemplo ni Artemis impapaayanna dagiti nasigo a managtrabaho iti saan a bassit a magunggona;+ 25  ket inummongna ida ken dagidiay nagtrabaho iti kakasta a bambanag+ ket kinunana: “Lallaki, pagaammoyo unay a manipud itoy a negosio addaantayo ti kinarang-ay.+ 26  Kasta met, makita ken mangngegyo no kasano a saan laeng nga iti Efeso+ no di ket iti nganngani intero a distrito ti Asia a daytoy a Pablo nakaguyugoy iti dakkel a bunggoy ket imbaw-ingna ida iti sabali a kapanunotan, a kunkunana a saan a didios dagidiay inaramid dagiti ima.+ 27  Mainayon pay, adda peggad a daytoy a pagsapulantayo saanto laeng nga agbalin nga awan pategna no di ket ti templo ti naindaklan a diosa nga Artemis+ maibilangto met a kas awan kaes-eskanna ket uray ti kinatan-okna a daydayawen ti intero a distrito ti Asia ken ti mapagnaedan a daga dandanin agbalin nga awan kaes-eskanna.” 28  Idi mangngegda daytoy ken idi mapnoda iti unget, nangrugi a nagikkis dagiti tattao, a kunkunada: “Naindaklan ni Artemis dagiti taga Efeso!” 29  Gapuna ti siudad napno iti pannakariribuk, ket nagkaykaysada a dimmarup idiay teatro, a pinuersada nga innala da Gayo ken Aristarco,+ taga Macedonia, kakadua ni Pablo iti panagdaliasat. 30  Iti biangna, kayat ni Pablo ti sumrek a mapan kadagiti umili, ngem saan a palubosan dagiti adalan. 31  Uray ti sumagmamano kadagiti komisionado dagiti piesta ken paay-ayam, a nainggayyeman kenkuana, nagbaonda kenkuana ket rinugianda nga ipakaasi a saanna nga irisgo ti bagina idiay teatro. 32  Ti kinapudnona ket, sumagmamano ti mangyik-ikkis iti maysa a banag ket ti dadduma sabali met;+ ta ti gimong nariribuk, ket ti kaaduan kadakuada saanda nga ammo ti rason no apay a naguurnongda. 33  Gapuna sangsangkamaysa nga inruarda ni Alejandro manipud iti bunggoy, nga isu indurduron dagiti Judio iti sango; ket ni Alejandro nagsenias babaen iti imana ket kayatna a depensaan ti bagina kadagiti umili. 34  Ngem idi nailasinda nga isu ket Judio, timmaud ti maysa nga ikkis manipud kadakuada amin bayat nga impukpukkawda iti agarup dua nga oras: “Naindaklan+ ni Artemis dagiti taga Efeso!” 35  Idi nga, iti kamaudiananna, ti managilista iti siudad napagulimekna+ ti bunggoy, kinunana: “Lallaki a taga Efeso, siasino a pudpudno iti sangatauan ti di makaammo a ti siudad dagiti taga Efeso isu ti mangay-aywan iti templo ni naindaklan nga Artemis ken iti ladawan a nagtinnag manipud langit? 36  Gapuna yantangay di masupiat dagitoy a banag, mayanatup nga agtalnakayo ket dikay agtignay a sidadarasudos.+ 37  Ta inyegyo dagitoy a lallaki a saan a mannanakaw kadagiti templo wenno uray managtabbaaw iti diosatayo. 38  Gapuna no ni Demetrio+ ken dagiti nasigo a managtrabaho a kakaduana addaanda iti kaso a maibusor iti siasinoman, maangay dagiti aldaw ti pangukoman+ ket adda dagiti prokonsul;+ iyegda koma dagiti pammabasol a maibusor iti maysa ken maysa. 39  Ngarud, no agbirbirokkayo iti aniaman a banag iti labes dayta, masapul a maikeddeng iti maysa a kadawyan a gimong. 40  Ta pudno nga agpegpeggadtayo a mapabasol iti iyaalsa gapu iti pasamak ita nga aldaw, awan ti uray maysa a makagapu a mangipalubosto kadatayo nga irasonan daytoy nagulo a panagraragup.” 41  Ket idi naisaonan dagitoy a banag,+ pinagawidna ti gimong.+

Footnotes