Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Aramid 16:1-40

16  Gapuna dimteng idiay Derbe ken kasta met idiay Listra.+ Ket, adtoy! adda sadiay ti maysa nga adalan nga agnagan Timoteo,+ ti anak ti maysa a babai a Judio a mamati ngem Griego ti amana,  ket naimbag ti damagna kadagiti kakabsat idiay Listra ken Iconio.  Inyebkas ni Pablo ti tarigagay a makikuyog kenkuana daytoy a lalaki, ket isu innalana ket kinugitna+ gapu kadagiti Judio nga adda kadagidiay a lugar, ta ammoda amin a ti amana ket Griego.  Ita bayat ti panagdaliasatda kadagiti siudad iyawatda kadagidiay adda sadiay dagiti bilin a napagtitinongan dagiti apostol ken lallakay nga adda idiay Jerusalem+ tapno salimetmetanda.  Gapuna, iti kinapudnona, dagiti kongregasion nagtultuloy a mapatibker iti pammati+ ken umadu iti bilang iti inaldaw-aldaw.  Mainayon pay, limmabasda iti Frigia ken iti pagilian ti Galacia,+ agsipud ta pinaritan ida ti nasantuan nga espiritu a sawenda ti sao idiay distrito ti Asia.  Kanayonanna, idi sumalsalogda nga agturong idiay Misia nagreggetanda ti mapan idiay Bitinia,+ ngem saan a pinalubosan ida ti espiritu ni Jesus.  Gapuna linabasanda ti Misia ket simmalogda nga agturong idiay Troas.+  Ket bayat ti rabii nagparang ken Pablo ti maysa a sirmata:+ maysa a lalaki a taga Macedonia agtaktakder ken agpakpakaasi kenkuana ket kunkunana: “Umallatiwka iti Macedonia ket tulongannakami.” 10  Ita apaman a nakitana ti sirmata, inkagumaanmi ti mapan idiay Macedonia,+ nga impapanmi nga inayabannakami ti Dios tapno ideklarami kadakuada ti naimbag a damag. 11  Gapuna naglayagkami manipud Troas ket dimtengkami a nagtartarus idiay Samotracia, ngem iti sumaruno nga aldaw idiay Neapolis, 12  ket manipud sadiay nagturongkami idiay Filipos,+ maysa a kolonia, a kangrunaan a siudad ti distrito ti Macedonia.+ Nagtalinaedkami iti daytoy a siudad, a binusbosmi ti sumagmamano nga aldaw. 13  Ket iti aldaw ti sabbath napankami iti ruar ti ruangan iti igid ti maysa a karayan, a sadiay impagarupmi nga adda disso a pagkararagan; ket nagtugawkami ket rinugianmi a kasao dagiti babbai a naguummong. 14  Ket maysa a babai a managan Lidia, nga aglaklako iti purpura, manipud iti siudad ti Tiatira+ ken managdaydayaw iti Dios, dumdumngeg idi, ket ti pusona+ linuktan a silalawa ni Jehova tapno imdenganna ti bambanag a sasawen ni Pablo. 15  Ita idi isu ken ti sangakabbalayanna nabautisaranda,+ kinunana nga impakpakaasi: “No impatoyo a matalekak ken Jehova, sumrekkayo iti balayko ket agyankayo.”+ Ket impapilitna nga umaykami.+ 16  Ket napasamak nga idi mapmapankami iti disso a pagkararagan, maysa nga adipen a babai nga addaan espiritu,+ maysa a sairo iti panagpadles,+ ti simmabat kadakami. Ipapaayanna idi dagiti appona iti adu a magunggona+ babaen ti panangannurot iti arte ti panagpadles. 17  Daytoy a babai simmursurot ken Pablo ken kadakami ket nagpukpukkaw+ iti sasao a: “Dagitoy a tattao ad-adipen ida ti Kangatuan a Dios, isuda a mangibumbunannag kadakayo ti dalan ti pannakaisalakan.” 18  Inar-aramidna daytoy iti adu nga aldaw. Kamaudiananna nauma ni Pablo iti dayta+ ket sinangona ken kinunana iti espiritu: “Ibilinko kenka iti nagan ni Jesu-Kristo a rummuarka kenkuana.”+ Ket rimmuar iti dayta met laeng nga oras.+ 19  Ala ket, idi nakita dagiti appona a pimmanawen daydi pangnamnamaanda iti magunggona,+ tinengngelda da Pablo ken Silas ket inulod-ulodda ida idiay plasa nga impan kadagiti agturay,+ 20  ket, idi inturongda ida kadagiti mahistrado sibil, kinunada: “Dagitoy a tattao rirriribukenda+ unay ti siudadtayo, idinto a Judioda, 21  ket ibumbunannagda dagiti kaugalian+ a di nainkalintegan kadatayo nga awaten wenno annuroten, yantangay taga Romatayo.” 22  Ket ti bunggoy timmakder a sangsangkamaysa a maibusor kadakuada; ket dagiti mahistrado sibil, kalpasan a rinay-abda kadakuada dagiti makinruar a kawesda, intedda ti bilin a pangpang-orenda ida.+ 23  Kalpasan ti adu a panangkabkabilda kadakuada,+ impisokda ida iti pagbaludan, a binilinda ti manangibalud a bantayanna ida a sitatalged.+ 24  Agsipud ta immawat iti kasta a bilin, impisokna ida iti makin-uneg a pagbaludan+ ket inipitna dagiti sakada kadagiti tul-ong.+ 25  Ngem idi agarup katengngaan ti rabii+ nagkarkararag da Pablo ken Silas ket indaydayawda ti Dios babaen iti kanta;+ wen, mangmangngeg ida dagiti balud. 26  Pagammuan napasamak ti dakkel a ginggined, iti kasta nagkintayeg dagiti pamuon ti pagbaludan. Mainayon pay, giddato a naluktan dagiti amin a ruangan, ket nawarwar dagiti parautda amin.+ 27  Ti manangibalud, idi nariing iti pannaturogna ken idi nakitana a silulukat dagiti ruangan ti pagbaludan, inasutna ti kampilanna ket papatayenna koman ti bagina,+ ta impagarupna a nakalibas dagiti balud.+ 28  Ngem ni Pablo nagpukkaw iti natbag a timek, a kunkunana: “Dika saktan ta bagim,+ ta addakami amin ditoy!” 29  Gapuna dimmawat iti silsilaw ket nagdardaras a simrek ket, idi immapay kenkuana ti panagpigerger, nagruknoy+ iti sanguanan da Pablo ken Silas. 30  Ket inruarna ida ket kinunana: “Appo, ania ti masapul nga aramidek+ tapno maisalakanak?” 31  Kinunada: “Mamatika ken Apo Jesus ket maisalakankanto,+ sika ken ti sangakabbalayam.”+ 32  Ket ti sao ni Jehova sinaoda kenkuana agraman amin dagidiay adda iti balayna.+ 33  Ket inkuyogna ida iti dayta nga oras ti rabii ket binugguanna dagidi saplitda; ket, tunggal maysa, isu ken ti sangakabbalayanna nabautisaranda+ nga awanan panagtaktak. 34  Ket impanna ida iti balayna ket indasaranna ida iti lamisaan, ket nagrag-o unay agraman ti intero a sangakabbalayanna ita ta isu namatin iti Dios. 35  Idi bumigaten, dagiti mahistrado sibil+ imbaonda dagiti kostable tapno kunaenda: “Luk-atanyo dagidiay a tattao.” 36  Gapuna ti manangibalud impakaammona ken Pablo ti sasaoda: “Dagiti mahistrado sibil nangibaonda iti tattao tapno dakayo a dua maluk-atankayo. Ita, ngarud, rummuarkayo ket mapankayon a sitatalna.” 37  Ngem kinuna kadakuada ni Pablo: “Publiko a sinaplitdakami a di nakondenar, tattao a taga Roma,+ ket impisokdakami iti pagbaludan; ket parparuarendakami kadi ita a sililimed? Ay, saan! no di ket bay-anyo nga isuda ti umay ket iruardakami.” 38  Iti kasta dagiti kostable impakaammoda dagitoy a sasao kadagiti mahistrado sibil. Nagbuteng dagitoy idi nangngegda a dagiti lallaki ket Romano.+ 39  Gapu itoy immayda ket nagpakaasida kadakuada ket, kalpasan ti panangiruarda kadakuada, kiniddawda a pumanawda iti siudad. 40  Ngem rimmuarda iti pagbaludan ket napanda iti pagtaengan ni Lidia, ket idi nakitada dagiti kakabsat pinaregtada+ ida ket pimmanawda.

Footnotes