Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Aramid 15:1-41

15  Ket adda sumagmamano a lallaki a simmalog manipud Judea+ ket rinugianda nga isuro dagiti kakabsat: “Malaksid no agpakugitkayo+ sigun iti kaugalian ni Moises,+ saankayo a maisalakan.”  Ngem idi adda napasamak a saan a bassit a di panagtutunos ken pannakisupiat kadakuada da Pablo ken Bernabe, inyurnosda da Pablo ken Bernabe ken ti dadduma pay kadakuada a sumang-atda nga agturong kadagiti apostol ken lallakay idiay Jerusalem+ mainaig itoy a supiat.  Ngarud, kalpasan a ti kongregasion intulodna ida iti pangasidegen,+ dagitoy a lallaki nagtultuloyda iti dalanda a lumasat agpadpada iti Fenicia ken Samaria, nga insalsalaysayda a detalyado ti pannakakomberte dagiti tattao iti nasnasion,+ ket namataudda iti dakkel a rag-o iti amin a kakabsat.+  Idi simmangpetda idiay Jerusalem siaasi nga inawat ida+ ti kongregasion ken dagiti apostol ken dagiti lallakay, ket sinaritada ti adu a bambanag nga inaramid ti Dios babaen kadakuada.+  Kaskasdi, sumagmamano kadagidiay namati a kameng ti sekta dagiti Fariseo timmakderda manipud kadagiti tugawda ket kinunada: “Masapul a kugiten ida+ ken bilinen ida a tungpalenda ti linteg ni Moises.”+  Ket dagiti apostol ken dagiti lallakay naguurnongda a sangsangkamaysa tapno tamingenda daytoy a banag.+  Ita idi napasamak ti kasta unay a panagsusupiat,+ timmakder ni Pedro ket kinunana kadakuada: “Lallaki, kakabsat, pagaammoyo unay a manipud kadagiti immun-una nga aldaw nagpili kadakayo ti Dios tapno babaen iti ngiwatko mangngeg koma dagiti tattao iti nasnasion ti sao ti naimbag a damag ket mamatida;+  ket ti Dios, a makaammo iti puso,+ sinaksianna babaen ti panangitedna kadakuada ti nasantuan nga espiritu,+ a kas met iti inaramidna kadatayo.  Ket awan a pulos ti inaramidna a panamaglalasin iti nagbaetantayo ken kadakuada,+ no di ket ginugoranna dagiti pusoda babaen iti pammati.+ 10  Ita, ngarud, apay a subsubokenyo ti Dios babaen ti panangikabilyo iti teltel dagiti adalan ti sangol+ a di nabaelan nga inawit dagidi ammatayo wenno uray datayo?+ 11  Iti kasupadina, agtalektayo a maisalakantayo babaen ti di kaikarian a kinamanangngaasi+ ni Apo Jesus iti isu met laeng a wagas a kas met kadagidiay a tattao.”+ 12  Iti kasta nagulimek ti intero nga umariwekwek, ket rinugianda ti agimdeng ken Bernabe ket insalaysay ni Pablo ti adu a pagilasinan ken tanda nga inaramid ti Dios babaen kadakuada iti tengnga dagiti nasion.+ 13  Kalpasan a simmardengda nga agsao, simmungbat ni Santiago, a kunkunana: “Lallaki, kakabsat, denggendak.+ 14  Ni Simeon+ insalaysayna a naan-anay no kasano a ti Dios iti umuna a gundaway inturongna ti asikasona kadagiti nasion tapno mangala kadakuada iti ili a maipaay iti naganna.+ 15  Ket mayannugot itoy ti sasao dagiti Mammadto, a kas iti adda a naisurat, 16  ‘Kalpasan dagitoy a banag agsubliak ket bangonek manen ti narba nga abong-abong ni David; ket bangonek manen dagiti rebbana ken ipatakderko manen,+ 17  tapno dagidiay nabatbati kadagiti tattao sipapasnek koma a sapulenda ni Jehova, agraman kadagiti tattao iti amin a nasnasion, tattao a maawagan iti naganko, kuna ni Jehova, a mangar-aramid kadagitoy a banag,+ 18  a naammuan nanipud idi ugma.’+ 19  Gapuna ti pangngeddengko isu ti saan a panangriribuk kadagidiay naggapu kadagiti nasion nga agturturong iti Dios,+ 20  no di ket ti panangisurat kadakuada nga umadayoda iti bambanag a namulitan kadagiti idolo+ ken iti pannakiabig+ ken iti nabekkel+ ken iti dara.+ 21  Ta manipud kadagidi kadaanan a tiempo naaddaan ni Moises kadagidiay mangikasaba kenkuana iti tunggal siudad, agsipud ta isu maibasa a sipipigsa kadagiti sinagoga iti tunggal sabbath.”+ 22  Idin dagiti apostol ken dagiti lallakay agraman ti intero a kongregasion inanamonganda a maibaon idiay Antioquia dagiti napili a lallaki manipud kadakuada a kumuyogda kada Pablo ken Bernabe, awan sabali, ni Judas a naawagan Barsabas+ ken ni Silas, lallaki a mangidadaulo kadagiti kakabsat; 23  ket babaen iti imada insuratda: “Dagiti apostol ken dagiti lallakay, kakabsat, agpaay kadagidiay kakabsat iti Antioquia+ ken Siria ken Cilicia+ a naggapu kadagiti nasion: Dagiti kablaaw! 24  Yantangay nangngegmi a ti sumagmamano a naggapu kadakami riniribukdakayo iti sasao,+ a padpadasenda nga iluod dagiti kararuayo, nupay saankami a nangipaay kadakuada kadagiti aniaman a pammilin,+ 25  nagkaykaysaanmi+ ken inanamonganmi ti pumili kadagiti lallaki tapno ibaon kadakayo agraman kadagiti ay-ayatenmi, da Bernabe ken Pablo,+ 26  lallaki a nangyawat kadagiti kararuada maipaay iti nagan ni Apotayo a Jesu-Kristo.+ 27  Gapuna ibaonmi da Judas ken Silas,+ tapno maipakaammoda met ti isu met laeng a bambanag babaen ti sao.+ 28  Ta ti nasantuan nga espiritu+ ken dakami inanamonganmi ti saanen a panangnayon pay iti dadagsen+ kadakayo, malaksid kadagitoy nasken a banag, 29  nga itultuloyyo ti umadayo iti bambanag a naisakripisio kadagiti idolo+ ken iti dara+ ken iti bambanag a nabekkel+ ken iti pannakiabig.+ No siaannad nga iyadayoyo ti bagbagiyo kadagitoy a banag,+ rumang-aykayto. Naimbag a salun-at kadakayo!” 30  Ngarud, idi napalubosan dagitoy a lallaki, simmalogda idiay Antioquia, ket inurnongda a sangsangkamaysa ti umariwekwek ket inyawatda kadakuada ti surat.+ 31  Kalpasan a nabasada dayta, nagrag-oda gapu iti pammaregta.+ 32  Ket da Judas ken Silas, yantangay isuda mammadtoda met,+ pinaregtada dagiti kakabsat babaen iti adu a palawag ket pinabilegda ida.+ 33  Gapuna, idi nakapagpalabasdan iti sumagmamano a tiempo, pinalubosan ida dagiti kakabsat a mapanda a sitatalna+ kadagidiay nangibaon kadakuada. 34  —— 35  Nupay kasta, nagtultuloy da Pablo ken Bernabe a nangbusbos iti tiempo idiay Antioquia+ nga isursuro ken idekdeklarada, agraman ti adu a sabsabali pay, ti naimbag a damag ti sao ni Jehova.+ 36  Itan kalpasan ti sumagmamano nga aldaw kinuna ni Pablo ken Bernabe: “Kangrunaan iti amin, agsublita ket sarungkaranta dagiti kakabsat iti tunggal maysa kadagiti siudad a nangibunannaganta ti sao ni Jehova tapno kitaenta ti kasasaadda.”+ 37  Iti biangna, determinado ni Bernabe a mangikuyog met ken Juan, a naawagan ti Marcos.+ 38  Ngem pagarupen idi ni Pablo a di umiso ti panangikuyogda iti daytoy a tao, yantangay simmina kadakuada manipud Pamfilia+ ket saan a kimmuyog kadakuada iti trabaho. 39  Gapu itoy adda bimtak a nakaro a panagpungtot, iti kasta nagsinada a dua; ket ni Bernabe+ inkuyogna ni Marcos ket naglayag a nagturong idiay Chipre.+ 40  Ni Pablo pinilina ni Silas+ ket nagluas kalpasan nga isu intalek dagiti kakabsat iti di kaikarian a kinamanangngaasi ni Jehova.+ 41  Ngem linasatna ti Siria ken Cilicia, a pinabpabilegna dagiti kongregasion.+

Footnotes