Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Aramid 13:1-52

13  Itan idiay Antioquia adda dagiti mammadto+ ken mannursuro iti lokal a kongregasion, ni Bernabe kasta met ni Simeon a naawagan Niger, ken ni Lucio+ a taga Cirene, ken ni Manaen a nasursuruan a kadua ni Herodes nga agturay iti distrito, ken ni Saulo.  Bayat a publiko nga agserserbida+ ken Jehova ken agay-ayunarda, kinuna ti nasantuan nga espiritu: “Kadagiti amin a tattao ilasinyo a maipaay kaniak da Bernabe ken Saulo+ maipaay iti aramid a nangayabak kadakuada.”  Idin nagayunarda ket nagkararagda ket impatayda kadakuada dagiti imada+ ket pinalubosanda ida.  Iti kasta dagitoy a lallaki, nga imbaon ti nasantuan nga espiritu, simmalogda a napan idiay Seleucia, ket manipud sadiay naglayagda nga agturong idiay Chipre.  Ket idi nakadanonda idiay Salamis rinugianda nga imbunannag ti sao ti Dios kadagiti sinagoga dagiti Judio. Kaduada met ni Juan+ kas agserserbi.  Idi nalasatdan ti intero nga isla agingga idiay Pafo, nakasabetda iti maysa a lalaki, a mangkukulam, ulbod a mammadto,+ maysa a Judio a ti naganna ket Bar-Jesus,  ket isu kadua ti prokonsul a ni Sergio Paulo, maysa a nasaririt a lalaki. Idi inayabanna da Bernabe ken Saulo, daytoy a lalaki inkagumaanna a denggen ti sao ti Dios.  Ngem ni Elimas a mangkukulam (iti kinapudnona, kasta ti pannakaipatarus ti naganna) rinugianna a binusor ida,+ nga inkagkagumaanna nga iyadayo ti prokonsul manipud iti pammati.  Ni Saulo, nga isu met laeng ni Pablo, idi a napno iti nasantuan nga espiritu, minatmatanna a sipapasnek 10  ket kinunana: “O tao a napno iti tunggal kita ti kinasaur ken tunggal kita ti kinadangkok, sika nga anak ti Diablo,+ sika a kabusor ti isuamin a nalinteg, saankanto kadi a sumardeng a mangkilkillo kadagiti nalinteg a dalan ni Jehova? 11  Ala ket, ngarud, adtoy! ti ima ni Jehova agdisso kenka, ket mabulsekkanto, a saanmonto a makita ti lawag ti init iti maysa a kapaut ti tiempo.” Giddato nga immapay kenkuana ti napuskol nga angep ken kinasipnget, ket nagliklikmut nga agsapsapul kadagiti tattao a mangkibin kenkuana.+ 12  Idin ti prokonsul,+ idi nakitana ti napasamak, nagbalin a manamati, ta nagsiddaaw unay iti sursuro ni Jehova. 13  Dagiti lallaki, agraman ken ni Pablo, naglayagda itan manipud Pafo ket dimtengda idiay Perga sadi Pamfilia.+ Ngem simmina kadakuada ni Juan+ ket nagsubli+ idiay Jerusalem. 14  Nupay kasta, nagtultuloyda manipud Perga ket dimtengda idiay Antioquia sadi Pisidia ket, idi napanda idiay sinagoga+ iti aldaw ti sabbath, nagtugawda. 15  Kalpasan ti publiko a pannakaibasa ti Linteg+ ken dagiti Mammadto nangibaon kadakuada dagiti mangidadaulo nga opisial+ iti sinagoga, a kunkunada: “Lallaki, kakabsat, no addaankayo iti aniaman a sao a pammaregta a maipaay kadagiti umili, ibagayo.” 16  Gapuna timmakder ni Pablo, ket idi inseniasna+ ti imana, kinunana: “Lallaki, Israelita ken dakayo a sabsabali nga agbuteng iti Dios, dumngegkayo.+ 17  Ti Dios daytoy ili nga Israel pinilina dagidi ammatayo, ket intan-okna ti ili kabayatan ti panagnaedda kas ganggannaet idiay daga ti Egipto ket inruarna ida manipud iti dayta babaen iti sitatag-ay a takiag.+ 18  Ket iti kapaut nga agarup uppat a pulo a tawen+ inanusanna ti wagas a panagtignayda idiay let-ang. 19  Kalpasan ti panangdadaelna iti pito a nasion idiay daga ti Canaan, imbunongna kadakuada ti daga babaen ti panagbibinnunot:+ 20  amin dayta bayat ti agarup uppat a gasut ket limapulo a tawen. “Ket kalpasan dagitoy a banag inikkanna ida iti uk-ukom agingga ken Samuel a mammadto.+ 21  Ngem manipud idin kinalikagumanda ti maysa nga ari,+ ket ti Dios intedna kadakuada ni Saul nga anak ni Kis, maysa a lalaki iti tribu ni Benjamin,+ iti uppat a pulo a tawen. 22  Ket kalpasan ti panangikkatna kenkuana,+ imbangonna maipaay kadakuada ni David kas ari,+ a maipapan kenkuana nangsaksi ket kinunana, ‘Nasarakak ni David nga anak ni Jesse,+ maysa a lalaki a naanamongan iti pusok,+ a mangaramidto iti amin a bambanag a tarigagayak.’+ 23  Manipud iti kaputotan+ daytoy a tao sigun iti karina inyeg ti Dios iti Israel ti maysa a manangisalakan,+ ni Jesus, 24  kalpasan a ni Juan,+ kas pakpakauna iti iseserrek Daydiay,+ silalatak nga inkaskasabana kadagiti amin nga umili ti Israel ti bautismo kas simbolo ti panagbabawi. 25  Ngem bayat nga itungtungpal idi ni Juan ti aramidna, kunaenna, ‘Aniaak iti panangipapanyo? Saan a siak daydiay. Ngem, adtoy! adda um-umay a sumaruno kaniak a saanak a maikari a mangwarwar kadagiti palloka ti saksakana.’+ 26  “Lallaki, kakabsat, dakayo nga annak iti kaputotan ni Abraham ken dagidiay sabsabali kadakayo nga agbuteng iti Dios, ti sao daytoy a pannakaisalakan naipatulod kadatayo.+ 27  Ta dagiti agnanaed iti Jerusalem ken dagiti agturayda saanda nga am-ammo Daytoy,+ no di ket, idi nagakemda kas uk-ukom, tinungpalda ti bambanag nga inyebkas dagiti Mammadto,+ bambanag a maibasa a sipipigsa iti tunggal Sabbath, 28  ket, nupay awan nasarakanda a pakaigapuan iti ipapatay,+ kinalikagumanda ken Pilato nga isu mapapatay.+ 29  Itan, idi naitungpaldan ti amin a bambanag a naisurat maipapan kenkuana,+ imbabada manipud iti kayo+ ket impaiddada iti maysa a pakalaglagipan a tanem.+ 30  Ngem isu imbangon ti Dios manipud kadagiti natay;+ 31  ket iti adu nga aldaw nakita dagidiay nakipagsang-at kenkuana manipud Galilea nga agturong idiay Jerusalem, nga isuda itan dagiti saksina kadagiti umili.+ 32  “Ket ngarud idekdeklarami kadakayo ti naimbag a damag maipapan iti kari a naaramid kadagidi amma,+ 33  a ti Dios tinungpalna a naan-anay dayta kadatayo nga annakda iti panangpagungarna ken Jesus;+ a kas met iti adda a naisurat iti maikadua a salmo, ‘Sika ti anakko, nagbalinak nga Amam itoy nga aldaw.’+ 34  Ket dayta a kinapudno a pinagungarna kadagiti natay nga inkeddengna a saanen nga agsubli iti panagrupsa, kinunana iti kastoy a pamay-an, ‘Itdekto kadakayo dagiti naayat a kinamanangngaasi ken David isuda a mapagtalkan.’+ 35  Gapuna kunana met iti sabali pay a salmo, ‘Saanmonto nga ipalubos a daydiay nasungdom makitana ti panagrupsa.’+ 36  Ta ni David,+ iti maysa a bangir, nagserbi iti nalawag a pagayatan ti Dios iti mismo a kaputotanna ket naturog ken patay ket naipaidda a kadua dagidi ammana ket nakitana ti panagrupsa.+ 37  Iti sabali a bangir, daydi imbangon ti Dios saanna a nakita ti panagrupsa.+ 38  “Maipakaammo koma ngarud kadakayo, kakabsat, a babaen iti Daytoy maibumbunannag kadakayo ti pannakapakawan dagiti basol;+ 39  ket manipud iti amin a bambanag a saanyo a pakaideklaraan nga awanan basol babaen iti linteg ni Moises,+ tunggal maysa a mamati maideklara nga awanan basol babaen iti Daytoy.+ 40  Gapuna siguraduenyo a ti naisao nga adda kadagiti Mammadto saan a mapagteng kadakayo, 41  ‘Kitaenyo, dakayo a mananglais, ket pagsiddaawanyo, ket mapukawkayo, agsipud ta ar-aramidek ti maysa nga aramid kadagiti aldawyo, maysa nga aramid a saanyonto a pulos patien uray no detalyado nga isalaysay kadakayo ti asinoman.’”+ 42  Ita idi a rumrummuardan, nangrugi a nagpakaasi dagiti tattao a dagitoy a banag maisao koma kadakuada iti sumaganad a sabbath.+ 43  Gapuna kalpasan a nagsisina ti gimong iti sinagoga, adu kadagiti Judio ken kadagiti proselita a nagdaydayaw iti Dios simmurotda kada Pablo ken Bernabe,+ nga iti pannakisasao kadakuada rinugianda a ginuyugoy+ ida nga agtalinaedda iti di kaikarian a kinamanangngaasi ti Dios.+ 44  Iti sumaganad a sabbath naguurnong a sangsangkamaysa ti nganngani intero a siudad tapno dumngegda iti sao ni Jehova.+ 45  Idi a dagiti Judio nakitada dagiti bunggoy, napnoda iti imon+ ket rinugianda a sinupiat a sitatabbaaw ti bambanag a sasawen ni Pablo.+ 46  Ket ngarud, idi agsaoda a situtured, kinuna da Pablo ken Bernabe: “Masapul a maisao nga umuna kadakayo+ ti sao ti Dios. Yantangay papaidenyo nga iyadayo+ kadakayo ken saanyo nga ipato a maikari ti bagbagiyo iti agnanayon a biag, adtoy! agturongkami kadagiti nasion.+ 47  Iti kinapudnona, ni Jehova nangipasdek iti bilin kadakami itoy a sasao, ‘Dinutokanka a kas silaw dagiti nasion,+ tapno agbalinka a pakaisalakanan agingga iti ungto ti daga.’”+ 48  Idi nangngeg daytoy dagidiay naggapu kadagiti nasion, nangrugida nga agrag-o ken mangidaydayaw iti sao ni Jehova,+ ket amin dagidiay siuumiso nga agannayas iti agnanayon a biag nagbalinda a manamati.+ 49  Kanayonanna pay, ti sao ni Jehova nagtultuloy a naisaknap iti intero a pagilian.+ 50  Ngem dagiti Judio+ riniribukda dagiti mararaem a babbai nga agdaydayaw iti Dios ken dagiti kangrunaan a lallaki iti siudad, ket namangonda iti panangidadanes+ a maibusor kada Pablo ken Bernabe ket pinaruarda ida kadagiti beddengda. 51  Dagitoy pinampagda ti tapok kadagiti sakada maibusor kadakuada+ ket napanda idiay Iconio. 52  Ket dagiti adalan nagtultuloy a mapunnoda iti rag-o+ ken nasantuan nga espiritu.

Footnotes