Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Aramid 11:1-30

11  Itan dagiti apostol ken dagiti kakabsat nga adda sadi Judea nangngegda a dagiti tattao iti nasnasion+ inawatda met ti sao ti Dios.  Gapuna idi simmang-at ni Pedro idiay Jerusalem, nangrugi a makisupiat kenkuana dagiti manangitandudo iti pannakakugit,+  a kunkunada nga isu simrek iti balay dagiti tattao a saan a nakugit ket nakipangan kadakuada.  Gapu itoy nangrugi ni Pedro ket inlawlawagna kadakuada dagiti pinasempaset, a kunkunana:  “Addaak idi nga agkarkararag iti siudad ti Joppe, ket iti maysa a pannakaimayeng nakakitaak iti sirmata, maysa a kita ti pagkargaan a bumabbaba a kas iti dakkel nga ules a lienso a maipabpababa manipud langit babaen iti uppat nga ungtona, ket immay agingga kaniak.  Idi matmatak dayta, nagpalpaliiwak ket nakakitaak kadagiti uppat-sakana a parsua iti daga ken kadagiti atap nga animal ken kadagiti agkarkarayam a bambanag ken kadagiti tumatayab ti langit.+  Nakangngegak met iti timek a nagkuna kaniak, ‘Tumakderka, Pedro, pumartika ket manganka!’+  Ngem kinunak, ‘Nikaanoman, Apo, agsipud ta ti natulawan wenno narugit a banag saan pay a pulos simrek iti ngiwatko.’+  Iti maikadua a daras simmungbat ti timek manipud langit, ‘Isardengmon nga awagan natulawan ti bambanag a dinalusanen ti Dios.’+ 10  Napasamak daytoy iti maikatlo a daras, ket ti isuamin naunos manen sadi langit.+ 11  Kasta met, adtoy! iti dayta a kanito adda tallo a lallaki a sitatakder iti balay nga ayanmi, isuda a naibaon kaniak manipud Cesarea.+ 12  Gapuna imbaga kaniak ti espiritu+ a makikuyogak kadakuada, a diak pulos agduadua. Ngem dagitoy innem a kakabsat kimmuyogda met kaniak, ket simrekkami iti balay ti lalaki.+ 13  “Impadamagna kadakami no kasano a nakitana ti anghel a nagtakder iti balayna ken nagkuna, ‘Mangibaonka kadagiti lallaki idiay Joppe ket paayabam ni Simon a napanaganan ti Pedro,+ 14  ket sawennanto kenka dagidiay bambanag a babaen kadagita maisalakanka+ ken ti intero a sangakabbalayam.’ 15  Ngem idi rinugiak ti agsao, ti nasantuan nga espiritu bimmaba kadakuada a kas ti ibababana met kadatayo idi damo.+ 16  Gapu itoy nalagipko ti sasao ti Apo, no kasano a kinunkunana, ‘Ni Juan, iti biangna, nangbautisar iti danum,+ ngem mabautisarankayto iti nasantuan nga espiritu.’+ 17  Ngarud, no ti Dios intedna kadakuada ti isu met laeng nga awan bayadna a sagut kas iti inaramidna met kadatayo a namati ken Apo Jesu-Kristo,+ siasinoak tapno kabaelak koma a lapdan ti Dios?”+ 18  Itan idi nangngegda dagitoy a banag, timmulokda,+ ket indaydayawda ti Dios,+ a kunkunada: “No kasta, ngarud, ti Dios impalubosna ti panagbabawi maipaay iti panggep a biag kadagiti met tattao iti nasnasion.”+ 19  Iti kasta dagidiay naiwarawara+ babaen iti rigat a timmaud gapu ken Esteban napanda agingga idiay Fenicia+ ken Chipre+ ken Antioquia, ngem saanda a sasawen ti sao iti asinoman malaksid kadagiti Judio laeng.+ 20  Nupay kasta, adda sumagmamano kadakuada a lallaki a taga Chipre ken Cirene nga immay idiay Antioquia ket rinugianda a kasao dagiti tattao a Griego ti pagsasaoda,+ nga idekdeklarada ti naimbag a damag ni Apo Jesus.+ 21  Kanayonanna pay, ti ima ni Jehova+ adda kadakuada, ket maysa a dakkel a bilang dagiti nagbalin a manamati nagturongda iti Apo.+ 22  Ti salaysay maipapan kadakuada nakagteng kadagiti pagdengngeg ti kongregasion nga adda idiay Jerusalem, ket imbaonda ni Bernabe+ agingga idiay Antioquia. 23  Idi dimteng ken nakitana ti di kaikarian a kinamanangngaasi+ ti Dios, nagrag-o+ ket rinugianna a paregtaen ida amin nga agtalinaedda iti Apo buyogen ti naimpusuan a panggep;+ 24  ta isu maysa a lalaki a naimbag ken napno iti nasantuan nga espiritu ken iti pammati. Ket maysa a dakkel a bunggoy ti nainayon iti Apo.+ 25  Gapuna napan idiay Tarso+ tapno birokenna a nalaing ni Saulo+ 26  ket, kalpasan a nasarakanna, inyegna idiay Antioquia. Napasamak ngarud nga iti intero a tawen nakipaguurnongda kadakuada iti kongregasion ket sinursuruanda ti maysa a dakkel a bunggoy, ket immuna idiay Antioquia a dagiti adalan babaen ti nadibinuan a panangiwanwan naawaganda iti Kristiano.+ 27  Itan kadagitoy nga aldaw simmalog dagiti mammadto+ manipud Jerusalem nga agturong idiay Antioquia. 28  Timmakder ti maysa kadakuada a managan Agabo+ ket impasimudaagna babaen ti espiritu a ti dakkel a panagbisin asideg idin a mapagteng iti intero a mapagnaedan a daga;+ a, no maipapan iti dayta a banag, pudno a naaramid idi tiempo ni Claudio. 29  Gapuna dagidiay manipud kadagiti adalan inkeddengda, tunggal maysa kadakuada sigun iti kabaelan ti asinoman,+ a mangipatulodda iti tulong+ a pagserbi kadagiti kakabsat nga agnanaed idiay Judea; 30  ket inaramidda daytoy, nga impatulodda dayta kadagiti lallakay babaen ti ima da Bernabe ken Saulo.+

Footnotes