Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Aramid 1:1-26

1  Ti umuna a salaysay, O Teofilo,+ pinutarko maipapan iti amin a bambanag a rinugian ni Jesus nga agpadpada nga aramiden ken isuro,+  agingga iti aldaw a pannakaipangatona,+ kalpasan ti panangbilinna babaen ti nasantuan nga espiritu kadagiti apostol a pinilina.+  Kadagitoy met babaen iti adu a positibo a pammaneknek imparangna ti bagina a sibibiag kalpasan ti panagsagabana,+ a nakitkitada iti las-ud ti uppat a pulo nga aldaw ken imbagbagana ti bambanag maipapan iti pagarian ti Dios.+  Ket bayat a makitartaripnong idi kadakuada imbilinna kadakuada: “Dikay pumanaw manipud Jerusalem,+ no di ket itultuloyyo nga urayen ti inkari ti Ama,+ a dayta ti nangngegyo kaniak;  agsipud ta ni Juan, iti kinapudnona, nangbautisar iti danum, ngem mabautisarankayto iti nasantuan nga espiritu+ saan nga adu nga aldaw kalpasan daytoy.”  Itan, idi nakapaguummongdan, inimtuodda kenkuana: “Apo, isublim kadi ti pagarian+ iti Israel iti daytoy a tiempo?”  Kinunana kadakuada: “Saan nga agpaay kadakayo ti panangammo kadagiti tiempo wenno pampanawen+ nga inkabil ti Ama iti bukodna a sakup;+  ngem umawatkayto iti pannakabalin+ inton dumteng kadakayo ti nasantuan nga espiritu, ket dakayto dagiti saksik+ agpadpada idiay Jerusalem+ ken iti intero a Judea ken Samaria+ ken agingga iti kaadaywan a paset ti daga.”+  Ket kalpasan a naisaona dagitoy a banag, bayat a kitkitaenda, isu naipangato+ ket maysa nga ulep ti nangala kenkuana manipud iti panagkitada.+ 10  Ket idi a simamatmatda iti tangatang bayat nga isu agpangpangato,+ kasta met, adtoy! nagtakder iti sibayda ti dua a lallaki a nakakawes iti puraw,+ 11  ket kinunada: “Lallaki a taga Galilea, apay nga agtatakderkayo a kumitkita iti tangatang? Daytoy Jesus a naawat iti tangatang manipud kadakayo umayto a kasta iti isu met laeng a pamay-an+ kas iti pannakakitayo kenkuana nga ipapanna iti tangatang.” 12  Idin nagsublida+ idiay Jerusalem manipud iti bantay a naawagan ti Bantay dagiti Olibo, nga asideg idiay Jerusalem, a ti kaadayona ket maysa nga aldaw ti sabbath a panagdaliasat.+ 13  Gapuna, idi nakastrekdan, immulida iti makinngato a siled,+ a paggigiananda idi, ni Pedro kasta met da Juan ken Santiago ken Andres, da Felipe ken Tomas, da Bartolome ken Mateo, ni Santiago nga anak ni Alfeo ken ni Simon a naregta, ken ni Judas nga anak ni Santiago.+ 14  Amin dagitoy nagkaykaysada a nagtultuloy iti panagkararag,+ agraman ti sumagmamano a babbai+ ken ni Maria nga ina ni Jesus ken ti kakabsatna.+ 15  Itan bayat dagitoy nga aldaw timmakder ni Pedro iti tengnga dagiti kakabsat ket kinunana (ti bunggoy ti tattao agdagupda iti agarup sangagasut ket duapulo): 16  “Lallaki, kakabsat, nasken idi a matungpal ti kasuratan,+ a nasaksakbay nga insao ti nasantuan nga espiritu+ babaen ti ngiwat ni David maipapan ken Judas,+ a nagbalin a manangidalan kadagidiay nangaresto ken Jesus,+ 17  agsipud ta naibilang kadatayo+ ket naaddaan iti paset iti daytoy a ministerio.+ 18  (Ngarud, daytoy a mismo a tao gimmatang+ iti talon babaen ti bayad ti kinakillo,+ ket idi a natnag a balinsuek+ siaariwawa a bimtak iti kaungganna ket naiwarawara amin a bagisna. 19  Naammuan met dayta dagiti amin nga agnanaed iti Jerusalem, iti kasta dayta a talon naawagan Akeldama iti pagsasaoda, a kayatna a sawen, Talon ti Dara.) 20  Ta adda a naisurat iti libro dagiti Salmo, ‘Ti lugar a pagdagdagusanna agbalin koma a langalang, ket awan koma ti agnaed iti dayta,’+ ken, ‘Ti akemna a panangaywan alaen koma ti sabali.’+ 21  Nasken ngarud a kadagiti lallaki a nakipagummong kadatayo kabayatan ti amin a tiempo nga iseserrek ken iruruar ni Apo Jesus iti tengngatayo,+ 22  mangrugi iti pannakabautisarna babaen ken Juan+ ken agingga iti aldaw a pannakaawatna manipud kadatayo,+ maysa kadagitoy a lallaki ti agbalin koma a kaduatayo a saksi iti panagungarna.”+ 23  Gapuna nangpatakderda iti dua, ni Jose a naawagan Barsabas, a napanaganan Justo, ken ni Matias. 24  Ket nagkararagda ket kinunada: “Sika, O Jehova, a makaammo kadagiti puso ti isuamin,+ itudingmo no asino kadagitoy dua a lallaki ti pinilim, 25  a mangala iti saad daytoy a ministerio ken kinaapostol,+ a manipud iti dayta simiasi ni Judas tapno mapan iti bukodna a lugar.” 26  Gapuna pinagbibinnunotanda+ ida, ket ti pannaka-bunot naitumpong ken Matias; ket isu naibilang kadagiti sangapulo ket maysa+ nga apostol.

Footnotes