Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Amos 9:1-15

9  Nakitak ni Jehova a nagsaad iti ngatuen ti altar,+ ket kinunana: “Kabilem ti pannakaulo ti adigi, tapno agyugayog dagiti arsadanan. Ket gessatem ida iti ulo, isuda amin.+ Ket ti maudi a pasetda patayekto iti mismo a kampilan. Awan ti pumanaw kadakuada nga agballiginto iti panagtalawna, ket awan ti tumalaw kadakuada a makaaramidto iti panaglibasna.+  No kumalida agingga iti Sheol, manipud sadiay alaento ida ti bukodko nga ima;+ ket no umulida iti langlangit, manipud sadiay ipababakto ida.+  Ket no aglemmengda iti tapaw ti Carmelo, manipud sadiay siaannad nga agbirokakto ket siguraduek nga alaen ida.+ Ket no aglingedda manipud sanguanan dagiti matak iti lansad ti baybay,+ sadiay bilinekto ti serpiente, ket kagatennanto ida.  Ket no mapanda iti pannakakautibo iti sanguanan dagiti kabusorda, manipud sadiay bilinekto ti kampilan, ket patayennanto ida;+ ket iturongkonto kadakuada dagiti matak maipaay iti pagdaksan, ket saan a maipaay iti pagimbagan.+  Ket ti Soberano nga Apo, ni Jehova ti buybuyot, isu Daydiay mangsagsagid iti daga, iti kasta malunag;+ ket kasapulanto nga agleddaang dagiti amin nga agnanaed iti dayta;+ ket sigurado a sumang-atto a kas iti Nilo, ti intero dayta, ket lumned a kas iti Nilo ti Egipto.+  “‘Daydiay a dagiti agdanna ibangbangonna iti langlangit,+ ken ti patakderna iti ngatuen ti daga nga imbangonna;+ daydiay mangaw-awag iti dandanum ti baybay,+ tapno ibuyatna ida iti rabaw ti daga+—Jehova ti naganna.’+  “‘Saankayo kadi a kasla iti annak dagiti Cusita kaniak, O annak ti Israel?’ kuna ni Jehova. ‘Saanko kadi nga inaon ti mismo nga Israel manipud daga ti Egipto,+ ken dagiti Filisteo+ manipud Creta, ken ti Siria manipud Kir?’+  “‘Adtoy! Dagiti mata ti Soberano nga Apo Jehova addada iti managbasol a pagarian,+ ket sigurado a talipuposennanto dayta iti rabaw ti daga.+ Nupay kasta, saankonto a naan-anay a talipuposen ti balay ni Jacob,’+ kuna ni Jehova.  ‘Ta, adtoy! agbilinak, ket wegwegekto ti balay ti Israel iti tengnga dagiti amin a nasion,+ kas iti panangwegweg ti maysa iti yakayakan, tapno awan bagging nga agtinnag iti daga. 10  Babaen ti kampilan mataydanto—amin dagiti managbasol iti ilik,+ dagidiay agkunkuna: “Ti didigra saanto nga umasideg wenno dumanon agingga kadakami.”’+ 11  “‘Iti dayta nga aldaw ibangonkonto+ ti narba nga abong-abong+ ni David,+ ket sigurado a tarimaanekto dagiti giwangda. Ket patakderekto dagiti rebbana, ket sigurado nga ibangonkonto kas kadagidi aldaw iti nabayagen a tiempo,+ 12  tapno tagikuaenda koma ti nabati iti Edom,+ ken ti amin a nasnasion a nakayawagan ti naganko,’+ kuna ni Jehova, a mangar-aramid iti daytoy. 13  “‘Adtoy! Adda um-umayen nga al-aldaw,’ kuna ni Jehova, ‘ket ti agar-arado pudno a makamakamnanto ti agan-ani,+ ket ti agibadbaddek kadagiti ubas, ti agaw-awit iti bin-i;+ ket dagiti bantay mangitaredteddanto iti nasam-it nga arak,+ ket dagiti mismo a turod malunagdanto amin.+ 14  Ket ummongekto nga isubli dagidiay kautibo iti ilik nga Israel,+ ket pudno a bangonendanto dagiti langalang a siudad ket pagnaedanda ida,+ ket agmulada kadagiti kaubasan ket inumenda dagiti arakda, ket agaramidda kadagiti minuyongan ket kanenda dagiti bungada.’+ 15  “‘Ket sigurado nga imulakto ida iti rabaw ti dagada, ket saandanton a maparut iti dagada nga intedko kadakuada,’+ kinuna ni Jehova a Diosmo.”

Footnotes