Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Amos 2:1-16

2  “Daytoy ti kinuna ni Jehova, ‘“Maigapu iti tallo nga iyaalsa ti Moab,+ ken maigapu iti uppat, saankonto nga ibaw-ing dayta, gapu ta pinuoranna a pinaapug dagiti tulang ti ari ti Edom.+  Ket mangibaonakto iti apuy iti Moab, ket alun-onennanto dagiti pagnaedan a torre ti Keriot;+ ket ti Moab matayto buyogen ti daranudor, buyogen ti alarma a pagilasinan, buyogen ti uni ti tangguyob.+  Ket gessatekto ti ukom manipud tengngana, ket patayekto amin a piprinsipena a maikanunong kenkuana,”+ kinuna ni Jehova.’  “Daytoy ti kinuna ni Jehova, ‘Maigapu iti tallo nga iyaalsa ti Juda,+ ken maigapu iti uppat, saankonto nga ibaw-ing dayta, maigapu iti panangilaksidda iti linteg ni Jehova,+ ken agsipud ta saanda a sinalimetmetan dagiti bukodna nga alagaden; no di ket dagiti kinaulbodda,+ a dagita ti sinurot dagidi ammada, ti namagallaalla kadakuada.+  Ket mangibaonakto iti apuy iti Juda, ket alun-onennanto dagiti pagnaedan a torre ti Jerusalem.’+  “Daytoy ti kinuna ni Jehova, ‘Maigapu iti tallo nga iyaalsa ti Israel,+ ken maigapu iti uppat, saankonto nga ibaw-ing dayta, maigapu iti panangilakoda iti maysa a nalinteg maipaay laeng iti pirak, ken iti maysa a napanglaw maipaay iti gatad ti sangaparis a palloka.+  Aganangsabda maipaay iti tapok ti daga iti ulo dagiti nanumo a tattao;+ ket isiasida ti dalan dagiti naemma a tattao;+ ket ti maysa a lalaki ken ti bukodna nga ama napanda iti isu met laeng a babai,+ iti panggep a panangtabbaaw iti nasantuan a naganko.+  Ket kadagiti kawes a naagaw kas tani iyunnatda ti bagbagida+ iti sibay ti tunggal altar;+ ket ti arak dagidiay napagmulta inumenda iti balay ti didiosda.’+  “‘Ngem no maipapan kaniak, tinalipuposko ti Amoreo+ maigapu kadakuada, a ti kangatona ket kasla kangato dagiti sedro, ken nakired kasla kadagiti nakarangrangpaya a kayo;+ ket tinalipuposko ti bungana iti ngato ken dagiti ramutna iti baba.+ 10  Ket siak inaonkayo iti daga ti Egipto,+ ket pinagpagnapagnakayo iti let-ang iti uppat a pulo a tawen,+ tapno tagikuaenyo ti daga ti Amoreo.+ 11  Ket imbangbangonko ti sumagmamano iti annakyo kas mammadto+ ken ti sumagmamano kadagiti agtutuboyo a lallaki kas Nazareo.+ Saan aya a rebbeng a kasta, O annak ti Israel?’ kuna ni Jehova. 12  “‘Ngem inik-ikkanyo dagiti Nazareo iti arak nga inumen,+ ket kadagiti mammadto nangipasdekkayo iti bilin, a kunkunayo: “Dikay agipadto.”+ 13  Adtoy paglugayogek ti adda iti sirokyo, kas iti panaglugayog ti kareson a napunno iti intar ti kagapgapas a binukel. 14  Ket ti disso a pagkamangan madadaelto manipud iti daydiay nasiglat,+ ket awan ti napigsa a mangpatibkerto iti bilegna, ket awanto ti nabileg a lalaki a makailisi iti kararuana.+ 15  Ket awanto ti agtakder nga agig-iggem iti bai, ket awanto ti makatalaw a nasiglat dagiti sakana, ket awanto ti agsaksakay iti kabalio a makailisi iti kararuana.+ 16  Ket no maipapan iti maysa a napigsa ti pusona kadagiti nabileg a lallaki, silalamolamo nga agtalawto iti dayta nga aldaw,’+ kuna ni Jehova.”

Footnotes