Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

2 Samuel 4:1-12

4  Idi nangngeg ti anak+ ni Saul a natay ni Abner idiay Hebron,+ idin kimmapsut dagiti imana+ ket nariribukan dagiti amin nga Israelita.  Ket adda idi dua a lallaki, pangpanguluen ti tulisan a buybuyot,+ a kukua ti anak ni Saul, a ti nagan ti maysa Baanah ket ti nagan ti sabali Recab, ti annak ni Rimmon a Beerotita, iti annak ni Benjamin; ta ti met Beerot+ maibilbilang idi kas paset ti Benjamin.  Ket nagtalaw dagiti Beerotita a napan iti Gittaim,+ ket nagbalinda a ganggannaet nga agnanaed sadiay agingga itoy nga aldaw.  Ita ni Jonatan,+ ti anak ni Saul, addaan iti anak a lalaki a pilay dagiti sakana.+ Lima ti tawennan idi a ti damag maipapan kada Saul ken Jonatan dimteng manipud Jezrael;+ ket inawit ti mangtagtagibi kenkuana ket nagtalaw, ngem naaramid a bayat ti panagtarayna a silalagaw tapno agtalaw, iti kasta natnag ti ubing ket napilay. Ket ti naganna Mefiboset.+  Ket ti annak ni Rimmon a Beerotita, da Recab ken Baanah, napanda ket dimtengda iti balay ni Is-boset+ idi napudoten ti aldaw, bayat nga agin-inana iti ngalay ti aldaw.  Ket adtoy simrekda iti tengnga ti balay a kasla lallaki a mangala iti trigo, ket kalpasanna isu dinuyokna iti buksit;+ ket ni Recab ken ni Baanah+ a kabsatna saan ida a nadnadlaw.  Idi simrekda iti balay, siiidda iti rabaw ti sopana iti makin-uneg a siled a pagturoganna, ket kalpasanna kinabilda iti kasta pinapatayda,+ a kalpasan dayta inikkatda ti ulona+ ket innalada ti ulona ket nagnada iti dalan nga agturong iti Araba iti intero nga agpatnag.  Iti kamaudiananna inyegda ken David idiay Hebron ti ulo ni Is-boset+ ket kinunada iti ari: “Adtoy ti ulo ni Is-boset nga anak ni Saul a kabusormo+ a nangsapul iti kararuam;+ ngem ited ni Jehova iti apok nga ari ti panagibales+ itoy nga aldaw ken Saul ken iti putotna.”  Nupay kasta, sinungbatan ni David da Recab ken Baanah a kabsatna, ti annak ni Rimmon a Beerotita, ket kinunana kadakuada: “Kas sibibiag+ ni Jehova a nangsubbot+ iti kararuak+ manipud iti isuamin a rigat,+ 10  idi adda nangipadamag kaniak,+ a kunkunana, ‘Adtoy natay ni Saul,’ ket isu iti bukodna a matmata nagbalin a kasla manangyeg iti naimbag a damag, siak, nupay kasta, tinengngelko ket pinatayko+ idiay Siclag idi maiparbeng nga itedko kenkuana ti bayad ti mensahero; 11  anian nga ad-adda pay no dagiti met laeng nadangkes a lallaki+ nangpapatayda iti nalinteg a tao iti bukodna a balay iti rabaw ti pagiddaanna? Ket ita saan kadi a rebbeng a singirek ti darana ita im-imayo,+ ket saan kadi a masapul nga ikkatenkayo iti daga?”+ 12  Gapuna binilin ni David dagiti agtutubo a lallaki ket pinatayda ida+ ket pinutedda ti im-imada ken saksakada ket imbitinda+ ida iti igid ti ban-aw idiay Hebron; ket ti ulo ni Is-boset innalada ket intabonda iti lugar a pagitabonan ni Abner idiay Hebron.+

Footnotes