Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Samuel 3:1-39

3  Ket ti gubat iti nagbaetan ti balay ni Saul ken ti balay ni David nakapapaut idi;+ ket nagtultuloy a pimmigsa ni David,+ ket ti balay ni Saul nagtultuloy a kimmapuy a kimmapuy.+  Kabayatanna, nayanak ken David ti annak+ idiay Hebron,+ ket ti inaunana isu idi ni Amnon+ babaen ken Ahinoam+ a Jezraelita.  Ket ti maikaduana isu ni Kileab+ babaen ken Abigail+ nga asawa ni Nabal a Carmelita, ket ti maikatlo isu ni Absalom+ nga anak ni Maaca nga anak a babai ni Talmai+ nga ari ti Gesur.  Ket ti maikapat isu ni Adonias+ nga anak ni Haggit,+ ket ti maikalima isu ni Sefatias+ nga anak ni Abital.  Ket ti maikanem isu ni Itream+ babaen ken Egla, asawa ni David. Dagitoy ti nayanak ken David idiay Hebron.  Ket naaramid a bayat ti panagtultuloy ti gubat iti nagbaetan ti balay ni Saul ken ti balay ni David, ni met laeng Abner+ intultuloyna a pinapigsa ti saadna iti balay ni Saul.  Ita naaddaan ni Saul iti kamalala nga agnagan Rizpa,+ ti anak a babai ni Aya.+ Idi agangay ni Is-boset+ kinunana ken Abner: “Apay a nakidennaka iti kamalala+ ni amak?”  Ket nakaunget unay+ ni Abner iti sasao ni Is-boset ket kinunana: “Maysaak aya nga ulo ti aso+ a kukua ti Juda? Ita nga aldaw watwatwatek ti naayat a kinamanangngaasi maipaay iti balay ni Saul nga amam, iti kakabsatna ken iti kabukbukodanna a gagayyem, ket saanko nga impalubos a masarakam ta bagim iti ima ni David; ket kaskasdi nga isingirmo kaniak ti biddut maipapan iti maysa a babai ita nga aldaw.  Gapuna kasta koma ti aramiden ti Dios ken Abner ken kasta koma ti inayonna iti dayta,+ no, kas iti insapata ni Jehova ken David,+ saan a kasta ti aramidekto kenkuana, 10  tapno iyalis ti pagarian manipud balay ni Saul ken tapno ipasdek ti trono ni David iti Israel ken iti Juda manipud Dan agingga iti Beer-seba.”+ 11  Ket saanna a nabalinan ti mangibaga pay iti maysa a sao kas sungbat ken Abner gapu iti panagbutengna kenkuana.+ 12  Iti kasta nangibaon ni Abner kadagiti mensahero a mapan ken David iti dayta a kanito, a kunkunana: “Siasino ti makinkukua iti daga?” nga innayonna: “Patalgedam kaniak ti tulagmo, ket, adtoy! addanto kenka ti imak a mangiturong iti dasigmo ti intero nga Israel.”+ 13  Iti daytoy kinunana: “Naimbag! Siak mamatalgedak kenka iti tulag. Adda laeng maysa a banag a kiddawek kenka, a kunana, ‘Saanmo a makita ti rupak+ malaksid no umuna nga iyegmo ni Mical,+ anak a babai ni Saul, inton umaymo kitaen ti rupak.’” 14  Kanayonanna, nangibaon ni David kadagiti mensahero a mapan ken Is-boset,+ anak ni Saul, a kunkunana: “Itedmo ti asawak a ni Mical, nga intulagko iti bagik maipaay iti sangagasut a makinsango a kudil+ dagiti Filisteo.” 15  Gapuna nagbaon ni Is-boset ket innalana ken asawana, ni Paltiel+ nga anak ni Lais. 16  Ngem ti asawana nagtultuloy a nagna a kaduana, nga agsangsangit bayat ti pannagnana a sumarsaruno kenkuana agingga idiay Bahurim.+ Kalpasanna kinuna kenkuana ni Abner: “Inka, agsublika!” Iti kasta nagsubli. 17  Kabayatanna naaddaan ni Abner iti pannakisao iti lallakay ti Israel, a kunkunana: “Agpadpada idi kalman ken iti napalabas+ tinartarigagayanyo ni David nga agari kadakayo. 18  Ket ita agtignaykayo, ta ni met laeng Jehova kinunana ken David, ‘Babaen ti ima ni David+ nga adipenko isalakankonto ti ilik nga Israel iti ima dagiti Filisteo ken iti ima dagiti amin a kabusorda.’” 19  Kalpasanna nagsao met ni Abner kadagiti lapayag ti Benjamin,+ a kalpasan dayta sinao met ni Abner kadagiti lapayag ni David idiay Hebron ti isuamin a naimbag kadagiti mata ti Israel ken kadagiti mata ti intero a balay ni Benjamin. 20  Idi a ni Abner dimteng ken David idiay Hebron, ken naikuyog kenkuana ti duapulo a lallaki, nangangay ni David iti padaya+ maipaay ken Abner ken maipaay kadagiti lallaki a naikuyog kenkuana. 21  Kalpasanna ni Abner kinunana ken David: “Bay-annak a tumakder ken mapan ken mangummong a sangsangkamaysa ti intero nga Israel iti apok nga ari, tapno mamatalgedda iti tulag kenka, ket sigurado nga agbalinkanto nga ari iti isuamin a garteman ta kararuam.”+ Gapuna ni David pinalubosanna ni Abner, ket napan a sitatalna.+ 22  Ket adtoy dagiti adipen ni David ken ni Joab um-umayda idi manipud panagrubbuot, ket naruay ti samsam+ nga inkuyogda. No maipapan ken Abner, saan a kadua ni David idiay Hebron, ta isu pinalubosanna, ket adda iti dalanna a sitatalna. 23  Ket dimteng ni Joab+ ken ti intero a buyot a naikuyog kenkuana, ket impadamagda ita ken Joab, a kunkunada: “Ni Abner+ nga anak ni Ner+ immay iti ari, ket pinalubosanna, ket adda iti dalanna a sitatalna.” 24  Gapuna simrek ni Joab a napan iti ari ket kinunana: “Ania ti inaramidmo?+ Adtoy! Immay kenka ni Abner. Apay a pinalubosam iti kasta sibaballigi a pimmanaw? 25  Pagaammom unay ni Abner nga anak ni Ner, nga isu immay tapno sikapannaka ken tapno ammuenna ti iruruarmo ken ti iseserrekmo+ ken tapno ammuenna ti isuamin nga ar-aramidem.”+ 26  Gapuna rimmuar ni Joab manipud ken David ket nangibaon kadagiti mensahero a mangsurot ken Abner, ket kalpasanna isu pinagsublida+ manipud pagurnongan ti danum ti Sira; ket ni met laeng David saanna nga ammo dayta. 27  Idi nagsubli ni Abner idiay Hebron,+ isu impakni ita ni Joab iti uneg ti ruangan tapno makisao kenkuana a sililimed.+ Nupay kasta, dinuyokna sadiay iti buksit,+ iti kasta natay gapu iti dara ni Asael+ a kabsatna. 28  Idi nangngeg dayta ni David kalpasanna, madagdagus a kinunana: “Siak ken ti pagariak, iti panangmatmat ni Jehova, ket awanan basol iti tiempo a di nakedngan iti panagbasol iti dara+ gapu ken Abner nga anak ni Ner. 29  Agalipuno koma dayta nga agsubli iti ulo+ ni Joab ken iti intero a balay ni amana, ket saan koma a magessat iti balay ni Joab+ ti maysa a lalaki nga addaan iti panagpasayasay+ wenno agkukutel+ wenno maysa a lalaki a mangig-iggem iti agtaytayyek a takbian+ wenno maysa a mapasag babaen ti kampilan wenno maysa nga agkasapulan iti tinapay!”+ 30  No maipapan ken Joab ken ni Abisai+ a kabsatna, pinatayda ni Abner+ gapu iti kinapudno a pinapatayna ni Asael a kabsatda idiay Gabaon iti bakal.+ 31  Kalpasanna ni David kinunana ken Joab ken kadagiti amin nga umili a naikuyog kenkuana: “Ray-abenyo dagiti kawesyo+ ket mangibedbedkayo iti tinakpil+ ket agdung-awkayo iti sanguanan ni Abner.” Uray ni Ari David sumarsaruno idi iti likudan ti sopa. 32  Ket intabonda ni Abner idiay Hebron; ket rinugian ti ari nga ipigsa ti timekna ket nagsangit idiay lugar a pagitabonan ken Abner, ket nagsangit dagiti amin nga umili.+ 33  Ket nagdayyeng ti ari gapu ken Abner ket kinunana: “Rebbeng kadi a matay ni Abner a kas iti ipapatay ti nakuneng+ a tao? 34  Dagiti imam saanda a naparautan,+ Ket dagiti sakam saanda a naikabil kadagiti grilios a gambang.+ Kas iti maysa a napasag iti sanguanan ti annak ti kinakillo+ napasagka.” Iti kasta sinangitan+ manen dagiti amin nga umili. 35  Idi agangay immay dagiti amin nga umili tapno mangtedda ken David iti tinapay+ a pangliwliwa bayat dayta pay laeng nga aldaw, ngem nagsapata ni David, a kunkunana: “Kasta koma ti aramiden kaniak ti Dios+ ken kasta koma ti inayonna iti dayta, no sakbay a lumnek ti init+ mangramanak iti tinapay wenno uray aniaman!” 36  Ket nagpaliiw dagiti amin nga umili, ket naimbag dayta kadagiti matada. Kas iti isuamin nga inaramid ti ari, naimbag idi dayta kadagiti mata dagiti amin nga umili.+ 37  Ket naammuan dagiti amin nga umili ken ti intero nga Israel iti dayta nga aldaw a saan a namunganay iti ari ti pannakapapatay ni Abner nga anak ni Ner.+ 38  Ket kinuna ti ari kadagiti adipenna: “Saanyo kadi nga ammo a maysa a prinsipe ken naindaklan a tao ti napasag itoy nga aldaw iti Israel?+ 39  Ket siak nakapuyak ita nga aldaw nupay napulotanak+ a kas ari, ket dagitoy a lallaki, ti annak ni Zeruia,+ nakaroda unay kaniak.+ Supapakan koma ni Jehova ti managaramid iti dakes maitunos iti bukodna a kinadakes.”+

Footnotes