Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Samuel 2:1-32

2  Ket naaramid kalpasanna a ni David nagimtuod ken Jehova,+ a kunkunana: “Sumang-atak kadi a mapan iti maysa kadagiti siudad ti Juda?” Gapu itoy kinuna kenkuana ni Jehova: “Sumang-atka.” Ket kinuna ni David: “Sadino ti sang-atak?” Idin kinunana: “Idiay Hebron.”+  Iti kasta simmang-at sadiay ni David ken kasta met ti dua nga assawana, da Ahinoam+ a Jezraelita ken Abigail+ nga asawa ni Nabal a Carmelita.  Ket dagiti lallaki+ a naikuyog kenkuana insang-at ni David, tunggal maysa agraman ti sangakabbalayanna; ket nagnaedda kadagiti siudad ti teritoria ti Hebron.  Kalpasanna immay dagiti lallaki ti Juda+ ket pinulotanda+ sadiay ni David kas ari iti balay ni Juda.+ Ket immayda imbaga ken David, a kunkunada: “Dagiti lallaki ti Jabes-galaad isuda ti nangitabon ken Saul.”  Gapuna nagbaon ni David kadagiti mensahero a mapan kadagiti lallaki ti Jabes-galaad+ ket kinunana kadakuada: “Benditonakayo koma ni Jehova,+ agsipud ta winatwatyo daytoy a naayat a kinamanangngaasi+ maipaay iti apoyo, ken Saul, ta isu intabonyo.+  Ket ita watwaten koma maipaay kadakayo ni Jehova ti naayat a kinamanangngaasi+ ken kinamapagpiaran, ket siak met watwatek kadakayo daytoy a kinaimbag agsipud ta inaramidyo daytoy a banag.+  Ket ita pumigsa koma dagiti imayo ket agbalinkayo a mamaingel a lallaki,+ agsipud ta natayen ni apoyo a Saul, ket siak a mismo ti pinulotan ti balay ni Juda kas ari+ kadakuada.”  No maipapan ken Abner+ nga anak ni Ner a panguluen ti buyot a kukua ni Saul, innalana ni Is-boset,+ anak ni Saul, ket imballasiwna nga agturong iti Mahanaim,+  ket pinagbalinna nga ari iti Galaad+ ken kadagiti Asurita ken Jezrael+ ken iti Efraim+ ken Benjamin+ ken iti Israel, ti intero dayta. 10  Uppat a pulo ti tawen ni Is-boset, anak ni Saul, idi nagbalin nga ari iti Israel, ket iti dua a tawen nagturay kas ari. Ti laeng balay ni Juda+ ti nagbalin a paspasurot ni David. 11  Ket ti bilang ti al-aldaw a panagari ni David idiay Hebron iti balay ni Juda nagdagup iti pito a tawen ken innem a bulan.+ 12  Idi agangay ni Abner nga anak ni Ner ken dagiti adipen ni Is-boset, anak ni Saul, rimmuarda manipud Mahanaim+ nga agturong iti Gabaon.+ 13  No maipapan ken Joab+ nga anak ni Zeruia+ ken dagiti adipen ni David, rimmuarda ket idi agangay nagsasabetda a sangsangkamaysa iti sibay ti ban-aw ti Gabaon; ket nagtalinaedda a situtugaw, dagitoy iti daytoy a deppaar ti ban-aw ken dagidiay iti dayta a deppaar ti ban-aw. 14  Kamaudiananna ni Abner kinunana ken Joab: “Tumakder koma dagiti agtutubo a lallaki, pangngaasim, ket mapagrarangetda koma iti sangotayo.” Iti daytoy kinuna ni Joab: “Tumakderda koma.” 15  Gapuna timmakderda ket bimmallasiwda sigun iti bilang, sangapulo ket dua ti kukua da Benjamin ken Is-boset,+ anak ni Saul, ken sangapulo ket dua manipud kadagiti adipen ni David. 16  Ket rinugianda ti naggiginnammat iti ulo, nga induyok ti tunggal maysa ti kampilanna iti bakrang ti sabali, iti kasta napasagda a sangsangkamaysa. Ket naawagan dayta a disso iti Helcat-hazzurim, nga adda iti Gabaon.+ 17  Ket dimmegdeg unay ti panagrurupak iti dayta nga aldaw, ket ni Abner+ ken dagiti lallaki ti Israel naabakda kamaudiananna iti sanguanan dagiti adipen ni David. 18  Ita adda idi sadiay ti tallo nga annak ni Zeruia,+ da Joab+ ken Abisai+ ken Asael;+ ket ni Asael nasiglat dagiti sakana, kas iti maysa kadagiti gasela+ nga adda iti nawayang a tay-ak. 19  Ket ni Asael kinamatna ni Abner, ket saan a nagannayas a mapan iti makannawan wenno iti makannigid manipud panangsurot ken Abner. 20  Iti kamaudiananna timmaliaw ni Abner iti likudanna ket kinunana: “Sika kadi daytoy, Asael?” nga iti dayta kinunana: “Siak.” 21  Idin kinuna kenkuana ni Abner: “Sumiasika iti makannawanmo wenno iti makannigidmo ket mangkemmegka iti maysa kadagiti agtutubo a lallaki kas kukuam ket alaem ti mauksobmo+ kenkuana kas kukuam.” Ket saan a kinayat ni Asael ti sumiasi manipud panangsurot kenkuana. 22  Gapuna ni Abner kaskasdi a kinunana manen ken Asael: “Sumiasika iti turongen manipud panangsurot kaniak. Apay koma nga ipasagka iti daga?+ Kalpasanna, kasano ti panangitangwak iti rupak ken Joab a kabsatmo?” 23  Ngem nagtultuloy a nagkitakit a sumiasi; ket isu naduyok ni Abner iti buksitna+ babaen ti murdong a putan ti pika, iti kasta rimmuar ti pika iti bukotna; ket napasag sadiay ket natay iti ayanna. Ket naaramid nga amin dagidiay immay iti disso a nakapasagan ni Asael ken nakatayanna ket agintekda.+ 24  Ket da Joab ken Abisai kinamatda ni Abner. Bayat a lumlumnek ti init isuda dimtengda iti turod ti Amma, nga adda iti sango ti Gia iti dalan nga agpalet-ang ti Gabaon.+ 25  Ket ti annak ni Benjamin naguummongda a sangsangkamaysa iti likudan ni Abner, ket nagbalinda a maymaysa a bunggoy ket nagtalinaedda a sitatakder iti tapaw ti maysa a turod. 26  Ket ni Abner rinugianna a pukkawan ni Joab ket kinunana: “Awan patinggana kadi a mangan ti kampilan?+ Pudno kadi a saanmo nga ammo a kinapaitto ti tumaud iti kamaudianan?+ Kasanonto kabayag, ngarud, sakbay a kunaem kadagiti umili a tumallikudda manipud panangsurot iti kakabsatda?”+ 27  Iti kasta kinuna ni Joab: “Kas sibibiag ti pudno a Dios,+ no saanka a nagsao,+ ngarud iti bigat koma laeng nga agsanud dagiti umili, tunggal maysa manipud panangsurot iti kabsatna.” 28  Pinuyot ita ni Joab ti tangguyob,+ ket nagsardeng dagiti amin nga umili ket saandan nga intuloy a kinamat ti Israel, ken saandan nga inulit ti pannakirupak. 29  No maipapan ken Abner ken dagiti lallakina, nagmartsada a limmasat iti Araba+ iti intero dayta a rabii ket binallasiwda ti Jordan+ ket nagmartsada a limmasat iti intero a rawang ket kamaudiananna dimtengda iti Mahanaim.+ 30  No maipapan ken Joab, timmallikud manipud panangsurotna ken Abner ket rinugianna nga ummongen a sangsangkamaysa dagiti amin nga umili. Ket adda idi napukaw kadagiti adipen ni David a sangapulo ket siam a lallaki ken ni Asael. 31  Ket dagiti adipen ni David, iti biangda, kinabilda dagiti kameng ti Benjamin ken kameng dagiti lallaki ni Abner—adda idi tallo gasut ket innem a pulo a lallaki a natay.+ 32  Ket inawitda ni Asael+ ket intabonda iti lugar a pagitabonan ni amana,+ nga adda idiay Betlehem.+ Kalpasanna nagmarmartsa ni Joab ken dagiti lallakina iti intero nga agpatnag, ket nalawagan ida ti aldaw idiay Hebron.+

Footnotes