Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Samuel 19:1-43

19  Idi agangay naipadamag ken Joab: “Adtoy! Agsangsangit ti ari, ket agtultuloy ti panagleddaangna gapu ken Absalom.”+  Gapuna ti pannakaisalakan iti dayta nga aldaw nagbalin a pasamak ti panagleddaang iti biang dagiti amin nga umili, agsipud ta nangngeg dagiti umili a naikuna iti dayta nga aldaw: “Nasaktan ti ari gapu iti anakna.”  Ket dagiti umili nangrugida nga aglibas a sumrek iti siudad iti dayta nga aldaw,+ kas iti panaglibas dagiti umili no naibabainda agsipud ta nagtalawda iti bakal.  Ket ti met laeng ari inabbungotanna ti rupana, ket intultuloy nga inyikkis ti ari iti natbag a timek: “Anakko nga Absalom! Absalom nga anakko, anakko!”+  Kamaudiananna ni Joab simrek a napan iti ari iti balay ket kinunana: “Ita nga aldaw imbabainmo ti rupa dagiti amin nga adipenmo, dagidiay mangilislisi iti kararuam ita nga aldaw+ ken iti kararua ti annakmo a lallaki+ ken annakmo a babbai+ ken iti kararua dagiti assawam+ ken iti kararua dagiti kamalalam,+  babaen ti panangayatmo kadagidiay manggurgura kenka ken babaen ti panangguram kadagidiay mangay-ayat kenka; ta impadamagmo ita nga aldaw nga awan kaes-eskan kenka dagiti panguluen ken ad-adipen, ta pagaammok unay ita nga aldaw a no sibibiag koma laeng ni Absalom ket dakami amin a sabsabali nataykami ita nga aldaw, ay ket, iti kasta a kaso umiso dayta kadagita matam.  Ket ita tumakderka, rummuarka ket agsaoka iti mismo a puso+ dagiti adipenmo, agsipud ta, babaen ken Jehova, isapatak a, no kas pagarigan saanka a rummuar, awan ti tao a makipagdagusto kenka ita a rabii;+ ket sigurado a dakdakesto daytoy kenka ngem iti isuamin a pannakadangran a dimteng kenka manipud kinaagtutubom agingga ita.”  Iti kasta timmakder ti ari ket nagtugaw iti ruangan,+ ket impadamagda kadagiti amin nga umili, a kunkunada: “Adda a situtugaw ti ari iti ruangan.” Ket dagiti amin nga umili nangrugida nga umay iti sanguanan ti ari. No maipapan iti Israel, nagtalawda tunggal maysa nga agturong iti pagtaenganna.+  Ket dagiti amin nga umili nairamanda iti supiat kadagiti amin a tribu ti Israel, a kunkunada: “Ti ari ti nangispal kadatayo iti dakulap dagiti kabusortayo,+ ket isu ti nangilisi kadatayo iti dakulap dagiti Filisteo; ket ita nagtalaw iti daga manipud ken Absalom.+ 10  No maipapan ken Absalom, a pinulotantayo nga agturay kadatayo,+ natay iti bakal.+ Gapuna ita apay nga awan ti ar-aramidenyo a mangisubli iti ari?”+ 11  No maipapan ken Ari David, nagbaon kada Sadok+ ken Abiatar+ a papadi, a kunkunana: “Agsaokayo kadagiti lallakay ti Juda,+ a kunkunayo, ‘Apay a dakayo ti agbalin a kaudian a mangisubli iti ari iti balayna, idinto ta ti met laeng sao ti intero nga Israel dimteng iti ari iti balayna? 12  Dakayo ket kakabsatko; dakayo ket tulangko ken lasagko.+ Gapuna apay a dakayo ti agbalin a kaudian a mangisubli iti ari?’ 13  Ket kunaenyo ken Amasa,+ ‘Saan aya a sika ket tulangko ken lasagko? Kasta koma ti aramiden kaniak ti Dios ken kasta koma ti inayonna iti dayta+ no saankanto nga agbalin a panguluen ti buyot iti sanguanak a kanayon imbes a ni Joab.’”+ 14  Ket pinagpakumbabana ti puso dagiti amin a lallaki ti Juda a kasla maymaysa a tao,+ iti kasta nangipatulodda iti sao iti ari: “Agsublika, sika ken dagiti amin nga adipenmo.” 15  Ket nangrugi nga agsubli ti ari ket nakagteng agingga iti Jordan. No maipapan iti Juda, dimtengda iti Gilgal+ a mapan ken sumabet iti ari, tapno itulodda ti ari iti ballasiw ti Jordan. 16  Idin ni Simei+ nga anak ni Gera+ a Benjaminita, a naggapu iti Bahurim,+ nagdardaras ket nakipagsalog kadagiti lallaki ti Juda a sumabet ken Ari David. 17  Ket adda naikuyog kenkuana a sangaribu a lallaki manipud Benjamin. (Ken kasta met ni Ziba+ a katulongan ti balay ni Saul ken ti sangapulo ket lima nga annakna+ ken duapulo nga adipenna naikuyogda kenkuana, ket nakagtengda a sibaballigi iti Jordan iti sanguanan ti ari. 18  Ket binallasiwna ti pagballasiwan+ tapno itulodna ti sangakabbalayan ti ari iti ballasiw ken tapno aramidenna no ania ti naimbag kadagiti matana.) No maipapan ken Simei nga anak ni Gera, nagruknoy iti sanguanan ti ari idi ballasiwenna ti Jordan.+ 19  Kinunana ita iti ari: “Saan koma nga isaad kaniak ti apok ti biddut, ket dika lagipen ti dakes nga inaramid ti adipenmo+ idi aldaw ti iruruar ti apok nga ari manipud Jerusalem, tapno iti kasta ipapuso dayta ti ari.+ 20  Ta pagaammo unay ti adipenmo a siak ti nagbasol; ket ngarud adtoy immayak ita nga aldaw a kaunaan iti intero a balay ni Jose+ tapno sumalog a sumabet iti apok nga ari.” 21  Madagdagus a simmungbat ni Abisai+ nga anak ni Zeruia+ ket kinunana: “Kas supapak iti daytoy saan kadi a rebbeng a mapapatay ni Simei, ta indawdawatna ti pakadaksan ti pinulotan ni Jehova?”+ 22  Ngem kinuna ni David: “Ania ti bibiangko kadakayo,+ dakayo nga annak ni Zeruia, tapno agbalinkayo ita nga aldaw a manangsupiat+ kaniak? Mapapatay kadi ti asinoman iti Israel ita nga aldaw?+ Ta saanko aya a pagaammo unay nga ita nga aldaw siak ket ari iti Israel?” 23  Kalpasanna ti ari kinunana ken Simei: “Saankanto a matay.” Ket nagsapata kenkuana ti ari.+ 24  No maipapan ken Mefiboset+ nga apoko ni Saul, simmalog a sumabet iti ari; ket saanna nga inasikaso dagiti sakana+ wenno inasikaso ti imingna+ wenno linabaan dagiti kawesna manipud idi aldaw nga ipapanaw ti ari agingga iti aldaw nga iyaayna a sitatalna. 25  Ket naaramid nga, idi immay iti Jerusalem a sumabet iti ari, idin kinuna kenkuana ti ari: “Apay a saanka a kimmuyog kaniak, Mefiboset?” 26  Iti daytoy kinunana: “Apok nga ari, inallilawnak ti adipenko.+ Ta kinuna ti adipenmo, ‘Siliaak ti kabaian nga asno tapno pagsakayak ket makikuyogak iti ari,’ ta pilay ti adipenmo.+ 27  Gapuna pinardayana+ ti adipenmo iti apok nga ari. Ngem ti apok nga ari ket kas iti maysa nga anghel+ ti pudno a Dios, ket ngarud aramidem no ania ti naimbag kadagita matam. 28  Ta ti intero a sangakabbalayan ni amak agbalin laeng koman a naikeddeng iti ipapatay iti apok nga ari, ket kaskasdi nga insaadmo ti adipenmo kadagidiay mangmangan iti lamisaanmo.+ Gapuna ania pay laeng ti adda kaniak a kas nainkalintegan a dawat tapno umasugak+ pay iti ari?” 29  Nupay kasta, kinuna kenkuana ti ari: “Apay a sasawem pay laeng ti sasaom? Kunaek, Sika ken ni Ziba pagbinglayanyo ti talon.”+ 30  Gapu itoy kinuna ni Mefiboset iti ari: “Bay-am nga uray alaenna amin,+ ita ta dimtengen a sitatalna ti apok nga ari iti balayna.” 31  Ket ni met laeng Barzillai+ a Galaadita simmalog manipud Rogelim tapno lumasat iti Jordan a kadua ti ari tapno kuyogenna iti Jordan. 32  Ket lakay unayen ni Barzillai, a walopulo a tawen ti edadna;+ ket isu inab-abastuanna ti ari iti taraon bayat a nagnanaed idiay Mahanaim,+ ta naindaklan unay+ idi a tao. 33  Gapuna kinuna ti ari ken Barzillai: “Sika makipagballasiwka kaniak, ket sigurado nga abastuankanto iti taraon a mairaman kaniak idiay Jerusalem.”+ 34  Ngem kinuna ni Barzillai iti ari: “Ania aya ti al-aldaw dagiti tawen ti biagko, tapno makipagsang-atak iti ari agingga iti Jerusalem? 35  Agtawenak iti walopulo ita nga aldaw.+ Mailasinko aya ti naimbag ken dakes, wenno maramanan aya ti adipenmo ti kinnanko ken ti ininumko,+ wenno maimdengak+ pay aya ti timek ti lallaki wenno babbai a kumakanta?+ Gapuna apay koma nga agbalin ti adipenmo a dadagsen+ pay laeng iti apok nga ari? 36  Ta pangasidegen laeng ti kabaelan ti adipenmo a pangkuyogan iti ari iti Jordan, ket apay a supapakannak ti ari iti daytoy a gunggona?+ 37  Palubosam nga agsubli ti adipenmo, pangngaasim, ket bay-annak a matay+ iti siudadko nga asideg iti lugar a pagitabonan ni amak ken ni inak.+ Ngem adtoy ni adipenmo a Kimham.+ Palubosam a makipagballasiw iti apok nga ari; ket aramidem kenkuana no ania ti naimbag kadagita matam.” 38  Iti kasta kinuna ti ari: “Makipagballasiwto kaniak ni Kimham, ket siak aramidekto kenkuana no ania ti naimbag kadagita matam; ket isuamin a piliem nga ipabaklay kaniak aramidekto maipaay kenka.” 39  Dagiti amin nga umili rinugianda ita a ballasiwen ti Jordan, ket ti met laeng ari bimmallasiw; ngem ti ari inagkanna+ ni Barzillai ket binendisionanna,+ a kalpasan dayta isu nagsubli iti lugarna. 40  Idi a ti ari bimmallasiw nga agturong iti Gilgal,+ ni met laeng Kimham nakipagballasiw kenkuana, ken kasta met dagiti amin nga umili ti Juda, ken kasta met ti kagudua kadagiti umili ti Israel, tapno maiballasiwda ti ari. 41  Ket, adtoy! amin dagiti lallaki ti Israel um-umayda iti ari, ket kinunada iti ari: “Apay+ a tinakawdaka dagiti kakabsatmi a lallaki ti Juda tapno ti ari ken ti sangakabbalayanna ken dagiti amin a lallaki ni David a naikuyog kenkuana maiballasiwda iti Jordan?”+ 42  Gapu itoy dagiti amin a lallaki ti Juda insungbatda kadagiti lallaki ti Israel: “Agsipud ta ti ari asideg ti pannakikabagianna kadakami;+ ket apay a makaungetkayo iti daytoy a banag? Nangankami kadi latta a gastos ti ari, wenno nayegankami aya iti sagut?” 43  Nupay kasta, dagiti lallaki ti Israel sinungbatanda dagiti lallaki ti Juda ket kinunada: “Addaankami iti sangapulo a paset iti ari,+ iti kasta uray iti mainaig ken David nangnangrunakami ngem dakayo. Apay, ngarud, nga inumsidakami, ket apay a saan a nayun-una ti panggepmi+ a mangisubli iti aritayo?” Ngem ti sao dagiti lallaki ti Juda nakarkaro ngem iti sao dagiti lallaki ti Israel.

Footnotes