Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Samuel 18:1-33

18  Ket binilang ni David dagiti umili a naikuyog kenkuana ket nangisaad kadakuada iti pangpanguluen ti rinibu ken pangpanguluen ti ginasut.+  Kanayonanna, imbaon ni David ti kakatlo+ dagiti umili iti sidong ti ima ni Joab+ ken kakatlo iti sidong ti ima ni Abisai+ nga anak ni Zeruia, kabsat ni Joab,+ ken kakatlo iti sidong ti ima ni Ittai+ a Gitita. Kalpasanna ti ari kinunana kadagiti umili: “Siak met di bumurong a makipagruarak kadakayo.”  Ngem kinuna dagiti umili: “Dika rummuar,+ ta no agtalawkami latta, saanda nga isaad ti puso kadakami;+ ket no kagudua kadakami ti matay, saanda nga isaad ti puso kadakami, agsipud ta agpategka iti sangapulo a ribu kadakami;+ ket ita nasaysayaat no agserbika kadakami a mangipaay iti tulong+ manipud iti siudad.”  Gapuna kinuna kadakuada ti ari: “Aniaman a naimbag kadagita matayo aramidek.”+ Ket nagtalinaed a sitatakder ti ari iti igid ti ruangan,+ ket amin dagiti umili rimmuarda a ginasut ken rinibu.+  Ket ti ari binilinna da Joab ken Abisai ken Ittai, a kunkunana: “Siaalumamay a pakilangenanyo+ ni agtutubo nga Absalom maigapu kaniak.” Ket amin dagiti umili nangngegda idi a ti ari binilinna dagiti amin a panguluen maipapan ken Absalom.  Ket nagtultuloy dagiti umili iti dalanda nga agturong iti tay-ak a sumabet iti Israel; ket naaramid ti bakal idiay bakir ti Efraim.+  Kamaudiananna naabak+ sadiay dagiti umili ti Israel+ iti sanguanan dagiti adipen ni David, ket ti pananggudas sadiay nagbanag a dakkel iti dayta nga aldaw, a duapulo a ribu a lallaki.  Ket ti bakal sadiay nagsaknap iti rabaw ti intero a daga a madanon ti panagkita. Kanayonanna pay, ti bakir ad-adu ti inibusna nga umili ngem ti inibus kadakuada ti kampilan iti dayta nga aldaw.  Iti kamaudiananna naipasango ni Absalom kadagiti adipen ni David. Ket sisasakay idi ni Absalom iti mulo, ket simrek ti mulo iti sirok ti agsasallupang a kangrunaan a sangsanga ti maysa a nakarangrangpaya a dakkel a kayo, iti kasta naisalat ti ulona iti dakkel a kayo, ket isu nabissayot iti nagbaetan ti langlangit ken ti daga,+ bayat a ti mismo a mulo nga adda idi iti babana naglayon. 10  Idin nakita dayta ti maysa a lalaki ket imbagana ken Joab+ ket kinunana: “Adtoy! Nakitak ni Absalom a nakabitin iti dakkel a kayo.” 11  Gapu itoy kinuna ni Joab iti lalaki a nangibaga kenkuana: “Ket adtoy nakitam dayta, ket apay a saanmo nga impasag sadiay iti daga? Kalpasanna pagrebbengak koma nga ikkanka iti sangapulo a kapisi a pirak ken maysa a sinturon.”+ 12  Ngem ti lalaki kinunana ken Joab: “Ket nupay mangtimbangak koma kadagiti dakulapko iti sangaribu a kapisi a pirak, saan a rebbeng nga iyunnatko ti imak maibusor iti anak ti ari; ta iti pagdengngegtayo imbilin ti ari kenka ken ni Abisai ken ni Ittai, a kinunana, ‘Uray siasinokayo, aluadanyo ti agtutubo, ni Absalom.’+ 13  Ta no saan a kasta nakilangenak koma a sigugulib maibusor iti kararuana ket ti met laeng intero a banag saan a mailemmeng iti ari,+ ket sika agpaspasulika latta koman.” 14  Iti daytoy kinuna ni Joab: “Saanak nga agtaktak a kastoy iti sangom!” Gapuna nangpetpet iti tallo nga urong ket impalokna+ ida iti puso ni Absalom bayat a sibibiag pay laeng idi iti tengnga+ ti dakkel a kayo. 15  Kalpasanna limmikmut ti sangapulo a katulongan nga agaw-awit kadagiti igam ni Joab ket kinabilda ni Absalom, tapno isu papatayenda.+ 16  Pinuyot ita ni Joab ti tangguyob,+ tapno agsubli dagiti umili manipud panangkamatda iti Israel; ta inggawid ni Joab dagiti umili. 17  Kamaudiananna innalada ni Absalom ket impalladawda idiay bakir iti dakkel a lungog ket nangibangonda iti rabawna iti dakkel unay a gabsuon ti batbato.+ No maipapan iti intero nga Israel, nagtalawda tunggal lalaki nga agturong iti pagtaenganna. 18  Ita ni met laeng Absalom, idi sibibiag pay, nangala ken imbangonanna ti bagina iti adigi,+ nga adda iti Nababa a Tanap ti Ari,+ ta kinunana: “Awananak iti anak a lalaki a mamagtalinaed a malaglagip ti naganko.”+ Gapuna pinanagananna ti adigi iti bukodna a nagan,+ ket nagtultuloy a maawagan iti Monumento ni Absalom agingga itoy nga aldaw. 19  Ita no maipapan ken Ahimaaz+ nga anak ni Sadok, kinunana: “Bay-am nga agtarayak, pangngaasim, ket ibagak ti damag iti ari, agsipud ta isu inukom ni Jehova tapno wayawayaanna iti ima dagiti kabusorna.”+ 20  Ngem kinuna kenkuana ni Joab: “Saanka a tao ti damag itoy nga aldaw, ket ibagamto ti damag iti sabali nga aldaw; ngem itoy nga aldaw dika ibaga ti damag, iti met laeng rason a ti mismo nga anak ti ari natay.”+ 21  Kalpasanna kinuna ni Joab iti Cusita:+ “Inka, ibagam iti ari no ania ti nakitam.” Iti kasta ti Cusita nagruknoy ken Joab ket rinugianna ti agtaray. 22  Ni Ahimaaz nga anak ni Sadok kinunana ita iti naminsan manen ken Joab: “Ita, mapasamak ti aniaman a mapasamak, bay-am met, pangngaasim, nga agtarayak a sumaruno iti Cusita.” Nupay kasta, kinuna ni Joab: “Apay a kasapulan nga agtarayka, anakko, idinto ta awan ti masarakan a damag maipaay kenka?” 23  Kaskasdi kinunana: “Ita, mapasamak ti aniaman a mapasamak, bay-am nga agtarayak.” Gapuna kinunana kenkuana: “Agtarayka!” Ket rinugian ni Ahimaaz ti agtaray a dumalan iti Distrito,+ ket iti kamaudiananna nalabsanna ti Cusita. 24  Ita situtugaw idi ni David iti nagbaetan ti dua a ruangan.+ Kabayatanna, ti managwanawan+ napan iti pangatepan ti ruangan iti sibay ti pader. Idi agangay intangwana dagiti matana ket kimmita ket, adtoy! adda lalaki nga agtartaray nga is-isuna. 25  Gapuna nagpukkaw ti managwanawan ket imbagana iti ari, nga iti dayta kinuna ti ari: “No is-isuna, adda damag iti ngiwatna.” Ket isu um-umay, a nagtultuloy nga umas-asideg. 26  Ti managwanawan nakakita ita iti sabali pay a lalaki nga agtartaray. Gapuna ti managwanawan pinukkawanna ti agay-aywan iti ruangan ket kinunana: “Adtoy! Sabali pay a lalaki nga agtartaray nga is-isuna!” nga iti dayta kinuna ti ari: “Maysa met daytoy nga agaw-awit iti damag.” 27  Ket kinuna ti managwanawan: “Makitkitak a ti estilo ti panagtaray ti immuna kasla iti estilo ti panagtaray+ ni Ahimaaz+ nga anak ni Sadok,” nga iti dayta kinuna ti ari: “Naimbag a lalaki daytoy,+ ket umay nga addaan naimbag a damag.”+ 28  Iti kamaudiananna nagpukkaw ni Ahimaaz ket kinunana iti ari: “Nasayaat!” Gapuna nagruknoy iti ari a ti rupana dumanon iti daga. Ket kinunana: “Bendito+ koma ni Jehova a Diosmo, a nangisuko+ kadagiti lallaki a nangitag-ay iti imada maibusor iti apok nga ari!” 29  Nupay kasta, kinuna ti ari: “Nasayaat kadi ni agtutubo nga Absalom?” Iti daytoy kinuna ni Ahimaaz: “Nakitak ti dakkel a panaggugulo idi tiempo nga imbaon ni Joab ti adipen ti ari ken ti adipenmo, ket saanko nga ammo no ania daydi.”+ 30  Gapuna kinuna ti ari: “Agpaigidka, agsaadka ditoy.” Iti kasta nagpaigid ket nagtalinaed a sitatakder. 31  Ket adtoy ti Cusita+ a sumsumrek, ket rinugian a kunaen ti Cusita: “Awaten koma ti apok nga ari ti damag, ta inukomnaka ni Jehova ita nga aldaw tapno wayawayaannaka iti ima dagidiay amin a tumakder maibusor kenka.”+ 32  Ngem kinuna ti ari iti Cusita: “Nasayaat kadi ni agtutubo nga Absalom?” Iti daytoy kinuna ti Cusita: “Dagiti kabusor ti apok nga ari ken amin dagidiay timmakder a maibusor kenka maipaay iti dakes agbalinda koma a kas iti agtutubo.”+ 33  Idin nariribukan ti ari ket immuli iti siled iti pangatepan+ iti ngatuen ti pagserkan ket nagsangit; ket daytoy ti kinunana bayat ti pannagnana: “Anakko nga Absalom, anakko, anakko+ nga Absalom! O siak la koman ti natay, siak, imbes a sika, Absalom nga anakko, anakko!”+

Footnotes