Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Samuel 17:1-29

17  Ket ni Ahitofel kinunana ken Absalom: “Bay-annak a mangpili, pangngaasim, iti sangapulo ket dua a ribu a lallaki ket tumakderkami ken kamatenmi ni David ita a rabii.+  Ket dumtengakto kenkuana inton isu napakil ken nakapsut ti agpadpada nga imana,+ ket pudno unay a pagpigergerekto; ket agtalawto dagiti amin nga umili a naikuyog kenkuana, ket pudno unay a papatayekto ti ari nga is-isuna.+  Ket bay-am nga isublik kenka dagiti amin nga umili. Ti tao a sapsapulem katupag ti isusubli ti isuamin; ket dagiti amin nga umili sitatalnadanto a mismo.”  Ket ti sao apagpag-isu kadagiti mata ni Absalom+ ken kadagiti mata dagiti amin a lallakay ti Israel.  Nupay kasta, kinuna ni Absalom: “Ayabam met, pangngaasim, ni Husai+ nga Arquita, ket denggentayo no ania ti adda iti ngiwatna, iti mismo a ngiwatna.”  Gapuna ni Husai simrek a napan ken Absalom. Idin kinuna kenkuana ni Absalom: “Maitunos itoy a sao ti panagsao ni Ahitofel. Agtignaytayto kadi iti saona? No saan, sika agsaoka.”  Gapu itoy ni Husai kinunana ken Absalom: “Ti pammatigmaan nga impatigmaan ni Ahitofel ket saan a nasayaat iti daytoy a gundaway!”+  Ket intultuloy a kunaen ni Husai: “Sika pagaammom unay ni amam ken dagiti tattaona, a mannakabalinda,+ ken sipapait ti kararuada,+ a kas iti kabaian nga oso a nakapukaw kadagiti urbonna iti tay-ak;+ ket ni amam maysa a mannakigubat,+ ket saannanto a busbosen ti rabii a kadua dagiti umili.  Adtoy! Ita isu aglemlemmeng+ iti maysa kadagiti lungog wenno iti maysa kadagiti sabali a lugar; ket pudno unay a mapasamakto nga, apaman nga isu matnag kadakuada iti rugi, daydiay makangngeg iti dayta sigurado a mangngegnanto ket kunaenna, ‘Napasamak ti pannakaabak kadagiti umili a sumursurot ken Absalom!’ 10  Ket uray ti maingel a lalaki a ti pusona kas iti puso ti leon+ sigurado a lumuknengto iti kinakapuy;+ ta ti intero nga Israel ammona a ni amam ket nabileg a lalaki+ ken kasta, met, dagiti maingel a lallaki a naikuyog kenkuana.+ 11  Siak sawek kas pammatigmaan: Di bumurong a maurnong koma kenka ti intero nga Israel, manipud Dan agingga iti Beer-seba,+ kas kadagiti binukel ti darat nga adda iti igid ti baybay ti kinaaduda,+ a sika a mismo ti mapan iti dangadang.+ 12  Ket umaytayto a bumusor kenkuana iti maysa kadagiti disso a sigurado a pakasarakan kenkuana,+ ket datayo agtinnagtayto kenkuana kas iti linnaaw+ nga agtinnag iti daga; ket sigurado nga awanto ti matedda uray maysa kenkuana ken iti amin a lallaki a naikuyog kenkuana. 13  Ket no iti siudad ti pagsanudannanto, ti intero nga Israel agawitto met kadagiti tali nga ipan iti dayta a siudad, ket pudno unay nga ulodentayto dayta agingga iti naapres a ginget, agingga nga awan masarakan sadiay nga uray maysa a bagging.”+ 14  Kalpasanna kinuna ni Absalom ken dagiti amin a lallaki ti Israel: “Ti pammatigmaan ni Husai nga Arquita nasaysayaat+ ngem ti pammatigmaan ni Ahitofel!” Ket ni met laeng Jehova imbilinna+ a paayen ti pammatigmaan+ ni Ahitofel nupay naimbag,+ tapno iti kasta maiyeg ni Jehova ti didigra+ ken Absalom. 15  Idi agangay kinuna ni Husai kada Sadok+ ken Abiatar a papadi: “Kastoy ken kasdiay ti impatigmaan ni Ahitofel ken Absalom ken kadagiti lallakay ti Israel; ket kastoy ken kasdiay ti impatigmaanko a mismo. 16  Ket ita agbaonkayo a sipapardas ket ibagayo ken David,+ a kunaenyo, ‘Dika agdagus iti desierto a tantanap ti let-ang ita a rabii, no di ket rebbeng met a bumallasiwka a di bumurong,+ ta amangan no maalun-on+ ti ari ken dagiti amin nga umili a naikuyog kenkuana.’” 17  Bayat a sitatakder da Jonatan+ ken Ahimaaz+ idiay En-rogel,+ napan ti maysa nga adipen a babai ket imbagana kadakuada. Gapuna isuda napanda, ta kasapulan nga ibagada ken Ari David; ta saanda a mabalin ti agparang a sumsumrek iti siudad. 18  Nupay kasta, nakita ida ti maysa nga agtutubo a lalaki ket imbagana ken Absalom. Gapuna isuda a dua napanda a sipapardas ket dimtengda iti balay ti maysa a tao idiay Bahurim,+ nga addaan bubon iti paraanganna; ket bimmabada iti dayta. 19  Kalpasan dayta ti babai nangala ken nangyaplag iti tabing iti ngarab ti bubon ket nangibunton iti riniid a bukel iti rabaw dayta;+ ket awan ti naammuan maipapan iti dayta. 20  Dagiti adipen ni Absalom dimtengda ita iti babai iti balayna ket kinunada: “Sadino ti ayan da Ahimaaz ken Jonatan?” Gapu itoy kinuna kadakuada ti babai: “Limmabasda manipud ditoy nga agturong iti dandanum.”+ Idin intultuloyda ti nagbirok, ket saanda a nasarakan ida+ ket ngarud nagsublida idiay Jerusalem. 21  Ket naaramid kalpasan ti ipapanawda nga idin rimmuarda manipud iti bubon ket nagtultuloyda a napan ket imbagada ken Ari David ket kinunada ken David: “Dakayo, tumakderkayo ket lumasatkayo a sipapardas iti dandanum; ta kastoy ti impatigmaan ni Ahitofel+ maibusor kadakayo.” 22  Madagdagus a timmakder ni David ken kasta met dagiti amin nga umili a naikuyog kenkuana, ket intultuloyda a binallasiw ti Jordan agingga a naglawag ti bigat,+ agingga nga awan ti maysa a nagkurang a saan a nakalasat iti Jordan. 23  No maipapan ken Ahitofel, nakitana a saan a naitungpal ti pammatigmaanna,+ ket siniliaanna ti maysa nga asno ket timmakder ket napan iti balayna idiay bukodna a siudad.+ Kalpasanna nangited kadagiti bilin iti sangakabbalayanna+ ket nagbekkel+ ket iti kasta natay.+ Gapuna naitabon+ iti lugar a pagitabonan dagidi ammana. 24  No maipapan ken David, dimteng iti Mahanaim,+ ket ni met laeng Absalom bimmallasiw iti Jordan, isu ken dagiti amin a lallaki ti Israel a naikuyog kenkuana. 25  Ket ni Amasa+ ti inkabil ni Absalom iti saad ni Joab+ a mamangulo iti buyot; ket ni Amasa isu ti anak ti lalaki nga agnagan Itra+ nga Israelita, a nakidenna ken Abigail+ nga anak a babai ni Nahas, ti kabsat a babai ni Zeruia, ina ni Joab. 26  Ket ti Israel ken ni Absalom nagpakarsoda idiay daga ti Galaad.+ 27  Ket naaramid nga, apaman a dimteng ni David iti Mahanaim, ni Sobi nga anak ni Nahas manipud Rabba+ iti annak ni Ammon,+ ken ni Maquir+ nga anak ni Amiel+ manipud Lo-debar, ken ni Barzillai+ a Galaadita manipud Rogelim+ 28  nangyegda kadagiti pagiddaan ken kadagiti palanggana ken kadagiti basehas ti agdamdamili, ken trigo ken sebada ken arina+ ken kinirog a bukbukel+ ken patani+ ken lentehas+ ken namagmagan a bukbukel; 29  ket ti diro+ ken mantekilia+ ken karnero ken nagbalay a gatas ti baka inyegda nga agpaay ken David ken kadagiti umili a naikuyog kenkuana tapno kanenda,+ ta kinunada: “Dagiti umili mabisinda ken nabannogda ken mawawda idiay let-ang.”+

Footnotes