Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Samuel 12:1-31

12  Ket ni Jehova imbaonna ni Natan+ a mapan ken David. Gapuna simrek a napan kenkuana+ ket kinunana kenkuana: “Adda idi dua a lallaki iti maysa a siudad, ti maysa nabaknang ket ti sabali bassitan iti sanikua.  Ti nabaknang a lalaki addaan idi iti adu unay a karnero ken baka;+  ngem ti lalaki a bassitan iti sanikua awanan iti aniaman no di maymaysa a kabaian a kordero, bassit, a ginatangna.+ Ket tagtaginayonenna idi dayta a sibibiag, ket dimmakkel a kaduana ken kadua ti annakna, sangsangkamaysada. Manipud iti sangkapisina mangan dayta, ket manipud iti kopana uminum dayta, ket iti barukongna agidda dayta, ket nagbalin a kas anak a babai kenkuana.  Idi agangay maysa a sangaili ti dimteng iti nabaknang a lalaki, ngem liniklikanna ti mangala manipud kadagiti bukodna a karnero ken bukodna a baka tapno isagana dayta a maipaay iti agdaldaliasat a dimteng kenkuana. Gapuna innalana ti kabaian a kordero ti lalaki a bassitan iti sanikua ket insaganana maipaay iti tao a dimteng kenkuana.”+  Gapu itoy bimmara unay ti unget ni David iti lalaki,+ iti kasta kinunana ken Natan: “Kas sibibiag ni Jehova,+ ti lalaki nga agar-aramid iti kastoy maikari a matay!+  Ket ti kabaian a kordero rebbeng a sukatanna+ iti uppat,+ kas imbunga ti kinapudno nga inaramidna daytoy a banag ken agsipud ta saan a naasian.”+  Idin ni Natan kinunana ken David: “Sika a mismo ti lalaki! Daytoy ti kinuna ni Jehova a Dios ti Israel, ‘Siak pinulotanka+ kas ari iti Israel, ket siak inispalka+ iti ima ni Saul.  Ket situtulokak idi a mangited kenka ti balay ti apom+ ken dagiti assawa ti apom+ ita barukongmo, ken mangited kenka ti balay ti Israel ken ti Juda.+ Ket no saan koma nga imdas, situtulokak idi a manginayon kenka ti bambanag a kaasping dagitoy kasta met ti sabsabali pay a bambanag.+  Apay nga inumsim ti sao ni Jehova babaen ti panangaramidmo iti dakes+ kadagiti matana? Ni Urias a Heteo kinabilmo babaen ti kampilan,+ ket ti asawana innalam a kas asawam,+ ket isu pinataymo babaen ti kampilan ti annak ni Ammon. 10  Ket ita ti kampilan+ saanto a sumina iti bukodmo a balay agingga iti tiempo a di nakedngan,+ kas imbunga ti kinapudno nga inumsinak iti kasta innalam ti asawa ni Urias a Heteo tapno agbalin nga asawam.’ 11  Daytoy ti kinuna ni Jehova, ‘Adtoy mangpatanorak maibusor kenka iti didigra nga agtaud iti bukodmo a balay;+ ket alaekto dagiti assawam iti mismo nga imatangmo ket itedko ida iti padam a tao,+ ket pudno unay a makikaiddanto kadagiti assawam iti imatang daytoy nga init.+ 12  Yantangay sika nagtignayka a sililimed,+ siak, iti biangko, aramidekto daytoy a banag iti sango ti intero nga Israel+ ken iti sango ti init.’”+ 13  Ni David kinunana+ ita ken Natan: “Nagbasolak a maikaniwas ken Jehova.”+ Gapu itoy ni Natan kinunana ken David: “Ni Jehova, kalpasanna, palabasenna ti basolmo.+ Saankanto a matay.+ 14  Nupay kasta, agsipud ta di pagduaduaan a saanmo a rinaem ni Jehova+ babaen itoy a banag, ti met mismo nga anak, a kayanak kenka, di bumurong a matayto.”+ 15  Kalpasanna napan ni Natan iti bukodna a balay. Ket kinabil ni Jehova+ ti ubing nga impasngay ken David ti asawa ni Urias iti kasta nagsakit. 16  Ket rinugian ni David a sapulen ti pudno a Dios maigapu iti ubing, ket ni David nagayunar a siiinget+ ket simrek ket binusbosna ti rabii ket nagidda iti daga.+ 17  Gapuna timmakder iti sibayna dagiti lallakay ti balayna tapno bangonenda manipud iti daga, ngem saan nga immannugot ket saan a nangan iti tinapay+ a kadua ida. 18  Ket naaramid iti maikapito nga aldaw a ti ubing nagin-inut a natay. Ket nagbuteng dagiti adipen ni David a mangibaga kenkuana a natayen ti ubing; ta kinunada: “Adtoy! Bayat a sibibiag pay ti ubing nagsaotayo kenkuana, ket saan nga immimdeng iti timektayo; gapuna kasano a maikunatayo kenkuana, ‘Natayen ti ubing’? Kalpasanna sigurado nga agaramidto iti banag a dakes.” 19  Idi nakita ni David nga agiinnarasaas dagiti adipenna, nangrugi a matarusan ni David a natayen ti ubing. Gapuna kinuna ni David kadagiti adipenna: “Natay kadin ti ubing?” Iti daytoy kinunada: “Natayen.” 20  Idin bimmangon ni David manipud iti daga ket nagbuggo ket sinapsapuanna+ ti bagina iti lana ket sinukatanna dagiti kagayna ket immay iti balay+ ni Jehova ket inruknoyna+ ti bagina; a kalpasan dayta simrek iti bukodna a balay ket nagkiddaw, ket madagdagus a nangidasarda iti tinapay iti sanguananna ket nangrugi a mangan. 21  Iti kasta kinuna kenkuana dagiti adipenna: “Ania ti kaipapanan daytoy banag nga inaramidmo? Maipagapu iti ubing bayat a sibibiag nagayunarka ken nagsangsangitka; ket apaman la unay a natay ti ubing bimmangonka ket nangrugika a mangan iti tinapay.” 22  Iti daytoy kinunana: “Bayat a sibibiag pay laeng idi ti ubing nagayunarak+ ken nagsangsangitak,+ agsipud ta kinunak iti bagik, ‘Siasino ti makaammo no ipaayannak ni Jehova iti parabur, ket pudno unay nga agbiagto ti ubing?’+ 23  Ita ta natayen, apay nga agayunarak? Kabaelak aya a pasublien manen?+ Mapanak kenkuana,+ ngem, no maipapan kenkuana, saanto nga agsubli kaniak.”+ 24  Ket rinugian ni David a liwliwaen ni Bat-seba nga asawana.+ Kanayonanna, simrek a napan kenkuana ket nakikaidda kenkuana. Idi agangay nangipasngay iti anak a lalaki,+ ket napanaganan iti Solomon.+ Ket inayat ni Jehova a mismo.+ 25  Gapuna nagbaon babaen ken Natan+ a mammadto ket pinanagananna iti Jedidias, maipagapu ken Jehova. 26  Ket ni Joab+ nagtultuloy a nakirupak iti Rabba+ ti annak ni Ammon ket nakautibona ti siudad ti pagarian. 27  Gapuna nangibaon ni Joab kadagiti mensahero a mapan ken David ket kinunana: “Nakirupakak iti Rabba.+ Nakautibok met ti siudad ti dandanum. 28  Ket ita ummongem ti natedda kadagiti umili ket agpakarsoka maibusor iti siudad, ket kautibuem dayta; tapno saan a siak ti mangkautibo iti siudad, ket saan a mayawag iti dayta ti naganko.” 29  Iti kasta inummong ni David dagiti amin nga umili ket napan idiay Rabba ket nakirupak iti dayta ket kinautibona. 30  Ket naalana ti korona ni Malcam manipud ulona,+ a ti dagsenna maysa a talento a balitok, agraman napapateg a batbato; ket naiparabaw dayta iti ulo ni David. Ket adu unay idi ti inruarna a samsam+ ti siudad. 31  Ket dagiti tattao nga adda iti dayta, inruarna tapno isaadna ida iti panagragadi iti batbato ken kadagiti natadem nga alikamen a landok+ ken kadagiti wasay a landok, ket pinagserbina ida iti panagaramid iti ladrilio. Ket kasta ti inaramidna kadagiti amin a siudad ti annak ni Ammon. Kamaudiananna ni David ken dagiti amin nga umili nagsublida idiay Jerusalem.

Footnotes