Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

2 Pedro 3:1-18

3  Dungdungnguen, daytoy itan ti maikadua a surat nga isuratko kadakayo, a ditoy, kas iti daydi immuna,+ parayrayek dagiti nasin-aw a pannakabalinyo nga agpanunot babaen iti pammalagip,+  tapno malagipyo koma ti sasao a napalabasen nga insawang dagiti nasantuan a mammadto+ ken ti bilin ti Apo ken Manangisalakan babaen kadagiti apostolyo.+  Ta umuna nga ammuenyo daytoy, a kadagiti maudi nga aldaw+ umayto dagiti managuy-uyaw+ agraman ti panguy-uyawda, nga agtultuloyda maitunos iti bukodda a tartarigagay+  ket kunkunada:+ “Sadino ti ayan daytoy naikari a kaaddana?+ Ay ket, nanipud iti aldaw a naturog ken patay dagidi ammami, amin a bambanag nagtultuloy nga isu latta nanipud idi panangrugi ti sangaparsuaan.”+  Ta, maitunos iti kayatda, malibasan ida daytoy a kinapudno, nga adda idi langlangit+ nanipud idi ugma ken maysa a daga nga agtaktakder a sititibker manipud iti danum+ ken iti tengnga ti danum+ babaen ti sao ti Dios;  ket babaen kadagidiay a pamay-an nagpasar iti pannakadadael ti lubong iti daydi a tiempo idi nalayus iti danum.+  Ngem babaen iti isu met laeng a sao naidulin ti langlangit+ ken ti daga+ nga adda ita maipaay iti apuy+ ket maisagsaganada iti aldaw ti panangukom+ ken ti pannakadadael dagiti di nadiosan a tattao.+  Nupay kasta, dikay ipalubos a malibasannakayo daytoy maysa a kinapudno, dungdungnguen, a ti maysa nga aldaw ken Jehova kasla sangaribu a tawen ket ti sangaribu a tawen kasla maysa nga aldaw.+  Saan a nabannayat ni Jehova maipapan iti karina,+ kas ti panangibilang ti dadduma a tattao a kinabannayat, no di ket an-anusannakayo agsipud ta saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.+ 10  Nupay kasta, ti aldaw ni Jehova+ umayto a kasla mannanakaw,+ nga iti dayta aglabasto ti langlangit+ buyogen ti sumayetset a daranudor,+ ngem marunawto dagiti elemento yantangay nakapudpudotda unay,+ ket ti daga+ ken ti ar-aramid nga adda iti dayta matakuatanto.+ 11  Yantangay marunawto a kasta dagitoy amin a banag, anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion, 12  nga ur-urayenyo+ ken agtaltalinaedkayo a silalagip unay iti kaadda ti aldaw ni Jehova,+ a babaen iti dayta marunawto ti langlangit yantangay maur-uramda+ ket malunagto ti el-elemento yantangay nakapudpudotda unay! 13  Ngem adda baro a langlangit+ ken baro a daga+ nga ur-urayentayo sigun iti karina, ket kadagitoy agtaeng ti kinalinteg.+ 14  Gapuna, dungdungnguen, yantangay ur-urayenyo dagitoy a banag, aramidenyo ti amin a kabaelanyo tapno iti kamaudiananna masarakannakayo a di namulitan+ ken awan pakapilawanna ken sitatalna.+ 15  Kanayonanna pay, ibilangyo ti kinaanus ni Apotayo kas pannakaisalakan, kas iti insurat met kadakayo ni dungdungnguentayo a kabsat a Pablo maitunos iti sirib+ a naited kenkuana,+ 16  nga agsasao maipapan kadagitoy a banag a kas iti inaramidna met iti amin a sursuratna. Kadagita, nupay kasta, adda sumagmamano a banag a narigat a maawatan, a tirtiritiren dagiti di nasursuruan ken dagiti di agtaltalinaed, a kas met iti ar-aramidenda iti dadduma a Kasuratan,+ nga agturong iti bukodda a pannakadadael. 17  Dakayo, ngarud, dungdungnguen, nga addaan iti daytoy naipakpakauna a pannakaammo,+ agaluadkayo tapno saankayo a mayadayo a maikanunong kadakuada babaen iti biddut dagiti managsalungasing-linteg a tattao ket matnagkayo manipud bukodyo a kinatibker.+ 18  Saan, no di ket itultuloyyo ti rumang-ay iti di kaikarian a kinamanangngaasi ken pannakaammo iti Apo ken Manangisalakantayo a ni Jesu-Kristo.+ Kenkuana maadda koma ti dayag agpadpada ita ken iti aldaw ti kinaagnanayon.+

Footnotes