Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

2 Pedro 1:1-21

1  Ni Simon Pedro, maysa nga adipen+ ken apostol+ ni Jesu-Kristo, agpaay kadagidiay nakagun-od iti pammati, a naibilang kadakami iti maipada a pribilehio,+ babaen iti kinalinteg+ ti Diostayo ken ti Manangisalakan a ni Jesu-Kristo:+  Ti di kaikarian a kinamanangngaasi ken talna rumang-ay koma kadakayo+ babaen iti umiso a pannakaammo+ iti Dios ken ni Jesus nga Apotayo,  yantangay ti nadibinuan a pannakabalinna sibubulos nga intedna kadatayo ti amin a bambanag a mainaig iti biag+ ken nadiosan a debosion,+ babaen iti umiso a pannakaammo iti daydiay nangayab+ kadatayo babaen iti dayag+ ken kinasingpet.  Babaen kadagitoy a banag sibubulos nga intedna kadatayo dagiti napateg ken naindaklan unay a kari,+ tapno babaen kadagitoy agbalinkayo a makiraman iti nadibinuan+ a nakaparsuaan,+ yantangay nakalapsutkayon iti panagrupsa nga adda iti lubong+ babaen iti derrep.  Wen, iti daytoy met laeng a rason, babaen ti panangipaayyo iti isuamin a napasnek a panagregget+ kas isusungbat, inayonyo iti pammatiyo ti kinasingpet,+ iti kinasingpetyo ti pannakaammo,+  iti pannakaammoyo ti panagteppel, iti panagteppelyo+ ti panagibtur, iti panagibturyo ti nadiosan a debosion,+  iti nadiosan a debosionyo ti nainkabsatan a panagayat, iti nainkabsatan a panagayatyo ti ayat.+  Ta no adda kadakayo dagitoy a banag ken aglippiasda, lapdandanto ti panagbalinyo a di aktibo wenno di nabunga+ maipapan iti umiso a pannakaammo ken ni Apotayo a Jesu-Kristo.  Ta no dagitoy a banag awanda iti asinoman, isu ket bulsek, nga ikidkidemna dagiti matana iti lawag,+ ken nagbalin a mananglipat+ iti pannakadalusna+ kadagiti nabayagen a basolna. 10  Iti daytoy a rason, kakabsat, ad-adda pay nga aramidenyo ti amin a kabaelanyo tapno pagbalinen a sigurado maipaay iti bagbagiyo ti pannakaayab+ ken pannakapiliyo;+ ta no itultuloyyo nga aramiden dagitoy a banag saankayto a pulos mapaay.+ 11  Iti kinapudnona, no kasta sibabaknang a pannakaipaayto kadakayo ti iseserrek+ iti agnanayon+ a pagarian ti Apo ken Manangisalakantayo a ni Jesu-Kristo.+ 12  Iti daytoy a rason madadaanak a kanayon a mangipalagip+ kadakayo kadagitoy a banag, nupay ammoyo ida ken sititibker a naipasdek iti kinapudno+ nga adda kadakayo.+ 13  Ngem ibilangko nga umiso, bayat nga addaak itoy a tabernakulo,+ a parayrayenkayo babaen ti panangpalagip kadakayo,+ 14  yantangay pagaammok a ti pannakaikkat ti tabernakulok ket dandanin,+ a kas met iti imparipirip kaniak ni Apotayo a Jesu-Kristo.+ 15  Gapuna aramidekto met ti amin a kabaelak iti tunggal tiempo tapno, kalpasan ti ipapanawko,+ mabalinyo a dakamaten iti bagbagiyo dagitoy a banag. 16  Saan, saan a babaen ti panangsurot iti nalaing pannakapartuatna nga ulbod a sarsarita+ a pinakaammuandakayo iti pannakabalin ken kaadda ni Apotayo a Jesu-Kristo,+ no di ket babaen ti pannakasaksi iti kinatan-okna.+ 17  Ta inawatna ti dayaw ken dayag manipud iti Dios nga Ama,+ idi a ti sasao a kas kadagitoy naipaayda kenkuana babaen iti natan-ok a dayag: “Daytoy ti anakko, ti dungdungnguek, nga inanamongak a mismo.”+ 18  Wen, dagitoy a sasao nangngegmi+ a naipaay manipud langit bayat nga addakami a naikuyog kenkuana idiay nasantuan a bantay.+ 19  Gapu itoy addaankami iti naimpadtuan a sao+ nga ad-adda a naipasigurado;+ ket naimbag ti ar-aramidenyo iti panangimdengyo iti dayta kas iti pagsilawan+ nga agsilsilnag iti nasipnget a disso, agingga nga agbannawag ti aldaw ket lumgak ti baggak,+ kadagiti pusoyo. 20  Ta ammuenyo nga umuna daytoy, nga awan ti padto ti Kasuratan nga agtaud iti aniaman a kabukbukodan a panangipaulog.+ 21  Ta ti padto saan a naiyeg uray kaano babaen ti pagayatan ti tao,+ no di ket dagiti tattao nagsaoda manipud iti Dios+ bayat nga idaldalan ida ti nasantuan nga espiritu.+

Footnotes